Ланската реколта на тутун се откупи целата до крајниот законски рок, 15 март. Откупени се вкупно 19.000 тони тутун со просечна цена од 185 денари за килограм.
– Иако квалитетна, реколтата потфрли за 25 до 30 отсто. Наместо 25.700 тони колку што откупувачите пријавија во Министерството за земјоделство, се откупија 19.000 тони. На ниските приноси, главно влијаеја три фактори: проблеми со расадо-производството, површините кои требаше да се засадат со тутун не се обработија поради обилните пролетни дождови и големите жештини изминатото лето, не дозволија тутунот да има повеќе листови – информираше Васко Ристовски од Стопанска комора на Македонија.
Наспроти малата количина, ланската реколта е квалитетна и тутунарите постигнаа добра просечна цена. Тутунарите, заедно со субвенциите од државата вкупно добија во просек по 4 евра за килограм тутун.
Во 2015 година, откупот на тутун беше намален за 24 отсто во однос на претходната година, додека просечната откупна цена беше зголемена за 58 отсто споредено со 2014 година, односно 21 отсто во однос на 2013 година.
