Погонот за флотација и управната зграда на рудникот „Индоминерали и метали“ останаа без вода и струја затоа што се исклучени поради неплатени сметки. Рудникот му должи 25.000 евра на Јавното комунално претпријатие „Никола Карев“ за неплатена вода за околу една година. Исто толкав период рудникот ги нема намирено ниту сметките за струја на „ЕВН Макодонија“.
Директорот на ЈКП „Никола Карев“, Игор Бошков, изјави дека ова била последна мерка што претпријатието морало да ја преземе.
– Рудникот добиваше неколку опомени, па откако не ги намири сметките, поднесовме тужба. Ова е последна мерка што моравме да ја преземеме – изјави Бошков.
Рудникот, сепак, работи затоа што водата и струјата не се исклучени во јамите поради опасност за рударите. Без погонот за флотација, рудникот може да работи само уште три-четири дена.
Рудникот „Индоминерали и метали“ ѝ должи и на Општина Пробиштип, 250.000 евра, за годишна концесија.
