Руски државјанин се обидел да прошверцува артефакт од османлиската епиграфија на граничниот премин Табановце.
Царинската управа, при контрола на автобус со македонски регистарски таблички, кој сообраќал на редовната линија Охрид – Белград, пријавен за излез од државата, запленила артефакт, мермерена плоча испишана со арапски букви.
Мермерната плоча била пронајдена во ќесе сместено во пластична торба, сопственост на руски државјанин, патник во автобусот.
Пронајдената плоча е предадена на Националната установа Археолошки музеј на Македонија, заради вештачење. Оттаму било констатирано дека мермерната плоча преставува „дел од надгробен споменик, кој, според наведените карактеристики, може да датира од втората епоха од османлиската епиграфија, поточно од 16 до 18 век“, со што претставува споменик на културата.
Против сторителот е поднесена кривична пријава поради постоење основан сомнеж дека сторил кривично дело изнесување, односно извезување во странство добра под привремена заштита или културно наследство или природни реткости, а судија на претходна постапка му изрече мерка за безбедност – одземање на пасошот.
