Скопското јавно обвинителство ја звршило истрагата за сообраќајната несреќа што се случи минатиот месец, а во која животот го загуби Сузана Тодоровска-Павловска, новинарка во Македонското радио, и поднело обвинителен акт против, сега веќе, обвинетиот за несреќата, соопшти Јавното обвинителство.
„По завршената истрага, Основното јавно обвинителство Скопје до Основниот суд Скопје 1 поднесе обвинителен акт против едно лице за кривично дело тешки дела против безбедноста на луѓето и имотот во сообраќајот, од член 300, став 2, во врска со член 297, став 1 од Кривичниот законик“, стои во соопштението на Обвинителството.
Според истрагата, обвинетиот под дејство на алкохол, односно со 1,52 промили во крвта и 2,42 промили во урината и наркотични средства, канабис (марихуана) го управувал своето возило „опел корса“ со брзина од 83 километри на час, изгубил контрола и удрил во Тодоровска-Павловска.
Во исто време со обвинителниот акт, скопското обвинителство поднело и преллог за продолжување на мерката притвор на обвинетиот.
Според кривичното дело за кое се товари, на обвинетиот му се заканува казна затвор од најмалку четири години.
