Панчевски на распит во обвинителтво, осомничен е за две кривични дела


Скопје, 20 септември, 2018 - 11:53 (META) 

Судијата Владимир Панчевски денеска е на распит во Јавното обвинителство, како осомничен за злоупотреби со АКМИС системот (електронски систем за распределба на предмети) во периодот кога беше претседател на Кривичниот суд во Скопје.

Тој се товари за две кривични дела, за злоупотреба на службената положба и овластувања и за несовесно работење во служба.

Поканата за распит од обвинителството, Панчевски ја сподели и на социјалните мрежи.


„Паднаа“ кривичните пријави на Владимир Панчевски


Скопје, 7 мај, 2018 - 16:49 (META) 

Основното јавно обвинителство – Скопје соопшти дека ги отфрлила трите кривични пријави што против Специјалната обвинителка Катица Јанева, судијката Злата Попова од Основен суд Гевгелија и вработени во СЈО и МВР, односно вкупно 10 лица ги поднесе судијата во Основен суд Скопје 1, а поранешен претседател на судот, Владимир Панчевски.

„Надлежен обвинител оцени дека во дејствијата на пријавените нема битни елементи на кривични дела наведени во пријавите, ниту на други дела што се гонат по службена должност и со Решение ги отфрли пријавите“, соопштија од јавното обвинителство, каде Панчевски ги поднел пријавите.

Тој ги товарел за Злоупотреба на службена положба и овластување, а три лица за Противправно присвојување на предмети при претрес, поради претресите што во октомври минатата година беа извршени во неговата канцеларија во судот и во неговиот дом.

„Според прибавените докази, Јавното обвинителство за гонење на кривични дела поврзани и кои произлегуваат од содржината на незаконското следење на комуникации во тек на истражна постапка, доставило барање за издавање на наредба за претрес на дом и лице, како законски предвидено истражно дејствие. Со оглед на тоа што лицето за кое е побаран претрес е судија во Основниот суд Скопје 1 Скопје, а заради постоење на висок ризик од нарушување на тајноста на дејствието и на предистражната постапка, барањето за издавање на наредба било поднесено до Основниот суд – Гевгелија, што е во согласност со воспоставената практика на Европскиот суд за човекови права. Обвинителството утврди дека истражните дејствија на пријавените биле преземени согласно Законот за кривична постапка“ се вели во соопштението.


Панчевски и Стаменковски на чекор до физички инцидент


Скопје, 18 јануари, 2018 - 13:57 (META) 

Судијата Владимир Панчевски, поранешен претседател на Основниот суд Скопје 1, тврди дека утрово бил нападнат на работното место во судот за прекршоци, каде е прераспореден по доаѓањето на Иван Џолев за претседател на Кривичниот суд.

– Додека бев во судница, влезе Горан Стаменковски, вработен како раководител во Кривичниот суд, и почна да ми се заканува. Извикуваше дека ќе сум видел што ќе ме снашло, а почна да изговара и вулгарности, споменувајќи ја во тој контекст мојата сопруга – изјавил Панчевски за „Фокус“, додавајќи дека сведок на вербалниот напад била записничарката.

Панчевски веднаш повикал полиција, по што оттаму му било кажано да поднесе приватна тужба бидејќи така било решено по консултација со јавен обвинител.

Стаменковски, пак, вели дека во канцеларијата влегол службено.

– Правевме ревизија во судот, и кога влегов во канцеларијата на Панчевски, јас не ни знаев која е негова канцеларија, тој почна да ми вика „излегувај, излегувај“. На масата имаше полициски пендрек и го зема, не ме удри, но ме истурка надвор од канцеларија. Обвинувањата на Панчевски се лажни и сега јас ќе одам во полициска станица да го пријавам – изјавил Стаменковски.

Инаку, Стаменковски го тужеше судијата за мобинг, додека Панчевски беше претседател на Кривичниот суд.

Основниот суд Скопје 2 пресуди во корист на Стаменковски, но пресудата сè уште не е правосилна.


Панчевски поднесе кривична против Катица Јанева и претседателката на гевгелискиот суд


Скопје, 7 ноември, 2017 - 16:05 (META) 

Поранешниот претседател на Основниот суд Скопје 1, судијата Владимир Панчевски, поднесе кривична пријава против специјалната јавна обвинителка, Катица Јанева, и против претседателката на Основниот суд во Гевгелија, Злата Попова.

Панчевски во пријавата ги товари Јанева и Попова дека по претходен договор ги пречекориле своите службени овластувања и го прекршиле законот со издавањето и со спроведувањето на наредбата за претрес на стан во Скопје, во врска со предистражна постапка што ја води Специјалното јавно обвинителство.

Панчевски во кривичната пријава наведува дека Јанева ја повредила тајноста на предистражната постапка и „јавно“ извршила претрес, истражно дејство, кое, како што стои во пријавата, за да биде спроведено, мора претходно да биде донесена наредба за почнување на истражна постапка.

Претседателката на гевгелискиот Основен суд, Злата Попова, според Панчевски, незаконски издала налог за претрес на неговиот дом, бидејќи, како што се наведува во пријавата, гевгелискиот суд не бил надлежен за кривичните дела за кои се однесува налогот за претрес. Панчевски наведува и дека Попова не смеела да издаде таков налог, бидејќи не е судија на претходна постапка, туку работи како граѓански судија и претседател на Основниот суд Гевгелија.

Поранешниот претседател на скопскиот Кривичен суд во пријавата тврди дека при претресот му била нанесена материјална штета, односно незаконски му биле одземени повеќе електронски апарати и други предмети во вредност од околу 300.000 денари (околу 5.000 евра), а му бил, како што вели, украден и клучот од станот.


ДЗЛП: Панчевски смеел да снима дома, но не смеел да ги објавува снимките


Скопје, 30 октомври, 2017 - 10:49 (META) 

Поранешниот претседател на Основниот суд Скопје 1, судијата Владимир Панчевски, не се огрешил спрема Законот за заштита на личните податоци со тоа што поставил камера и снимал во својот дом, но објавувањето на снимките во јавност е проблематично и повлекува одговорност, велат за „Мета“ од Дирекцијата за заштита на личните податоци (ДЗЛП).

Панчевски на почетокот на октомври оваа година, преку медиумите, во јавноста објави снимки од претресот во неговиот дом што го изврши Специјалното јавно обвинителство во врска со предистражна постапка. Тој тогаш, а и подоцна изјави дека снимката од претресот ја објавил како доказ за неговите тврдења дека еден од истражителите му го украл клучот од станот за време на претресот.

„Во согласност со член 4, став 1 од Законот за лични податоци, одредбите од Законот за лични податоци не се применуваат врз обработката на личните податоци што се врши од страна на физички лица исклучиво заради лични активности или активности во домот“, стои во првиот дел од одговорот на ДЗПЛ, што го добивме денеска, на нашето прашање дали е законски лице да снима и да објавува снимки во јавност од видеонадзор во својот дом, што го испративме до Дирекцијата на 9 октомври.

На одговорот е потпишан директорот на ДЗЛП, Горан Трајковски.

За објавувањето на снимките во јавност, од ДЗЛП велат дека без разлика дали постои или не постои повреда на правото на заштита на личните податоци на лицата кои се на снимките, снимањето во домот и јавното објавување на снимките не ја исклучува одговорноста предвидена со друг закон.

„Во однос на второто прашање, односно објавувањето на снимките од домот во јавност и евентуалната повреда на правото за заштита на личните податоци, потребно е истото да се поврзе и да се оценува низ призма на дефициницијата за тоа што претставува личен податок, која е дадена во членот 2, став 1, точка 1 од Законот за заштита на личните податоци:

Личен податок е секоја инфромација која се однесува на идентификувано физичко лице или физичко лице кое може да се идентификува, а лице кое може да се идентификува е лице чиј идентитет може да се утврди директно или индиректно, посебно врз основа на матичен број на граѓанинот или врз основа на едно или повеќе обележја специфични за неговиот физички, физиолошки, ментален, економски, културен или социјален идентитет.

Оттука доколку од објавените снимки не може на директен или индиректен начин да се утврди идентитетот на субјектот на личните податоци, објавувањето на таквата снимка не претставува повреда на прописите за заштита на личните податоци. Во спротивно, доколку од објавените снимки може на директен или индиректен начин да се утврди идентитетот на субјектот на личните податоци, а притоа таквата снимка е направена без нивно претходно информирање и согласност, би можело да претставува повреда на прописите за заштита на личните податоци. Во секој случај, без разлика на постоењето или непостоењето на повреда на правото на заштита на личните податоци на субјектите на личните податоци, таквото постапување (снимање во домот и јавно објавување на снимките ) не ја исклучува и одговорноста предвидена со друг закон“, стои во одговорот од Дирекцијата за заштита на личните податоци.

Инаку, според членот 152 од Кривичниот законик, „тој што неовластено ќе направи фотографски, филмски или видеоснимки на друго лице или на неговите лични простории без негова согласност, повредувајќи ја неговата приватност или тој што таквите снимки непосредно ги пренесува на трето лице или му ги покажува или на друг начин му овозможува со нив да се запознае, ќе се казни со парична казна или со затвор до една година. Ако делото противзаконито го стори службено лице во вршење на службата, ќе се казни со затвор од три месеци до три години. Гонењето за делото од став 1 се презема по приватна тужба.

Во членот 149, пак, се вели дека тој што спротивно на условите утврдени со закон без согласност на граѓанинот прибира, обработува или користи негови лични податоци, ќе се казни со парична казна или со затвор до една година, а ако делото го стори службено лице во вршење на службата, ќе се казни со затвор од три месеци до три години.


Панчевски: Судските предмети не сум ги распределувал рачно


Скопје, 18 октомври, 2017 - 20:57 (META) 

Судијата Владимир Панчевски во вечерашното гостување на „Топ тема“ на телевизија „Телма“, уште еднаш повтори дека како поранешниот претседател на Кривичниот суд не го злоупотребил автоматизираниот систем за управување со судските предмети (АКМИС). Тој додаде и дека во врска со овој случај се работи за предистражна постапка за друго лице, а не за него.

На новинарско прашање дали судските предмети ги распределувал рачно, тој негираше.

„База на податоци на сите предмети има во Врховен суд и никој не може да интервенира по завршување на тековниот месец. Потребно е посебно барање до Судскиот совет за да се изврши интеревенција. Не сум Џемс Бонд да правам паралелен систем и да местам случаи“, одговори Панчевски.

Во врска со објавување на снимката од претресот на Специјалното јавно обинителство во неговиот дом во медиумите, тој рече дека „во неговиот дом има налепница“ која информира за постоење на видеонадзор и во домот „може да снима и да прави што сака“.

На прашањето, дали додека бил претседател на Кривичниот суд трпел притисоци од политичарите, рече дека тој не познава политичари, немал контакти со нив, не бил фаворизиран од никого и на функцијата бил избран од Судски совет поради постигнати резултати во работата.

Специјалната јавна обвинителка, Катица Јанева, со истражители од МВР, на 5 октомври изврши претрес во канцеларијата на Панчевски, против кого, како што тогаш изјави таа, СЈО води предистражна постапка поради злоупотреби на системот за распределба на судски предмети и за оддавање службена тајна.

Претрес беше извршен и во домот на Панчевски, за што тој изјави дека тогаш настапил целосен мрак за правдата во Македонија.


Вангеловски ќе врши контроли во судовите за функционирањето на АКМИС


Скопје, 13 октомври, 2017 - 13:50 (META) 

Претседателот на Врховниот суд, Јово Вангеловски, вчера бил во Основниот суд Гевгелија за да изврши контрола во функционирањето на автоматизираниот систем за управување со судските предмети (АКМИС) во судот, соопшти денеска Врховниот суд.

Од судот велат дека по добивањето на извештајот од анализата на функционирањето на АКМИС, ќе бидат „донесени соодветни заклучоци, за кои јавноста ќе биде информирана“.

Вакви посети во наредниот период се планирани во сите судови во Македонија, велат од Врховниот суд.

„Се работи за вообичаени активности во насока на подобрување на функционирањето на автоматизираниот систем за управување со судските предмети“, стои во соопштението.

Најавата за проверка на АКМИС во судовите од страна на Вангеловски доаѓа неколку дена откако комисијата што ја формираше Министерството за правда го заврши увидот во Кривичниот суд во Скопје, кој треба да покаже дали имало злоупотреби на автоматизираниот систем за управување со судските предмети, односно дали се местело одредени предмети да бидат распределени кај одредени судии.

Наодите од ревизијата на комисијата, како што е најавено, треба да бидат познати следната недела.

Инаку, од Врховниот суд не информираат зошто Вангеловски прв за контрола го одбрал Основниот суд во Гевгелија. Дел од медиумите шпекулираат дека посетата на Вангеловски на гевгелискиот суд е поради налогот што Специјалното јавно обвинителство го добило од овој суд за претрес на домот на судијата, Владимир Панчевски, кој е поранешен претседател на скопскиот кривичен суд.


Јанева: Затоа што снимал, Панчевски треба да биде предмет на психијатриска опсервација


Скопје, 9 октомври, 2017 - 16:41 (META) 

Апсолутно не е одземен клуч од домот на Панчевски, а тоа што тој снимал нешто во својот стан, тоа веќе треба да биде предмет на друга психијатриска опсервација, изјави денеска специјалната јавна обвинителка, Катица Јанева.

– Многупати во такви ситуации кога нè напаѓале, сме мислеле дека е поважно да ја вршиме нашата работа и да ги оставиме таквите маргинални работи сами по себе да се средат, бидејќи прво и основно е тоа што се знае зошто ние влеговме во неговиот стан, се знае и зошто отидовме и во судот, да видиме дали тој ја злоупотребува својата службена должност и овластување, односно дали оддава државна службена тајна. Тоа е важното прашање. А другото, не е воопшто важно –  вели Јанева, одговарајќи на новинарско прашање дали ќе поведе постапка против Панчевски бидејќи објавил снимка од предистражна постапка.

Јанева вели дека претресот во станот на поранешниот претседател на Кривичниот суд во Скопје, за цело време бил сниман и од криминалистичката полиција на МВР и уште еднаш нагласи дека не е одземен клучот од станот на Панчевски.

– Апсолутно не е одземен клучот. Можеби ви изгледа на камерата како да го одзема, но тоа не е така и тоа мислам дека во еден момент ќе биде објаснето – изјави Јанева.

Во врска со „еуфоријата што се навлече во јавноста во врска со претресот“, таа вели дека СЈО сакало колку што може да биде професионално и тајно во тој дел на предистражната постапка, а самото наметнување од страната на Панчевски за нивната работа, според Јанева, е резултат на неговата загриженост и незадоволство од тоа што СЈО професионално си ја врши работата.

Јанева изјави дека е извршен попис на сите предмети што се одземени од кај Панчевски и дека ќе се почне со нивна анализа од страна на стручни лица.


Панчевски: Со претресот на СЈО настапи целосен мрак за правдата во Македонија


Скопје, 9 октомври, 2017 - 16:25 (META) 

Судијата Владимир Панчевски денеска обвини дека во четвртокот минатата недела настапил „целосен мрак за правдата во Македонија“ со, како што вели, „незаконитиот и брутален претрес“ што врз него го извршиле Специјалното јавно обвинителство и истражители на Министерството за внатрешни работи.

Панчевски, во интервју за „Алсат-М“, тврди дека не бил извршен претрес во простории во Кривичниот суд во Скопје, туку станувало збор за личен претрес врз него. Тој ја оспорува и наредбата за претрес, издадена од гевгелискиот суд, и вели дека стварната надлежност за постапување против него ја има Основниот суд Скопје 1, а доколку имало потреба од „конспиративност“, постапката во ваков случај ја одредува Апелацискиот суд Скопје.

– Од канцеларијата на в.д. претседателот на судот, бев спроведен во канцеларијата каде ја извршувам судската функција, без да ми се објасни зошто ми е ограничена слободата и сум спроведен на друго место да ми се врши претрес. Насилно ми одзедоа мобилни телефони. Женско лице, инспектор, односно припадник на истражителите на МВР, ми ги одзеде (телефоните) од џебовите на панталоните иако според сите стандарди, меѓународни, домашни и секакви, женско лице не врши претрес на машко лице, додека двајца инспектори ми ги држеа раширени рацете – вели Панчевски, кој во интервјуто за себе зборува во трето лице.

Тој тврди дека за време на претресот во судот имало вооружени лица и полицајци насекаде.

– Незаконитата процедура на крај заврши со кражба на клуч, што се гледа од снимката од видеонадзорот што го доставив до медиумите. Снимката е таа, може да ме распнат, да ме судат и да ме осудат. Панчевски е со чиста совест за сè досега, како претседател на Основниот суд Скопје 1 и како судија во тој суд. Сум постапувал секогаш чесно, во согласност со закон и никако поинаку – вели судијата.

Прашан дали ги предупредил обвинителите на СЈО дека има видеонадзор и околу законитоста на снимањето, Панчевски вели дека тој не бил должен да предупредува за тоа дали има видеонадзор и дека тој бил поставен поради здравствената состојба на неговата мајка, која починала пред 20 дена.

– Го прегледав видеонадзорот бидејќи кога требаше да го заклучам станот, по завршувањето на претресот, го немаше клучот. Знаејќи го начинот на работење на СЈО како судија во Основниот суд Скопје 1 и сите незаконитости за кои сум кажувал претходно во мои изјави, што писмени што усни до медиумите и до јавноста, се посомневав дека можеби некој го зел. Од кои причини го зеле клучот не знам. Генерално, морам да кажам дека се плашам за личниот живот повеќе, со овој мрак на правдата. Не е битно дали ќе водат постапки за Панчевски, Панчевски е веќе осуден и лежи казна затвор во нечија глава. Тие ќе ги реализираат своите намери и слободно можат да ги реализираат, јас сум со чиста совест и не се плашам – вели Панчевски.

Тој тврди дека никогаш не местел предмети, а шпекулациите за постоење на двоен АКМИС, преку кој тој ги следел предметите од дома, ги оценува како „параноидни халуцинации за некакво сценарио во нечија глава“.


Јанева не може да потврди дали материјалите земени од Панчевски водат до Иванов


Скопје, 6 октомври, 2017 - 13:03 (META) 

Специјалното јавно обвинителство почнало со анализа на материјалите одземени при вчерашните претреси во канцелариите и во домовите на судијата Владимир Панчевски и на двајца информатичари вработени во судот, изјави денеска специјалната јавна обвинителка, Катица Јанева.

Специјалната обвинителка рече дека запленетите материјали се предадени на вештачење во Министерството за внатрешни работи, но не открива повеќе детали за вчерашниот претрес во Основниот суд Скопје 1, бидејќи, како што додаде, податоците сè уште се анализираат.

– Вчера вечерта се состанаа нашите екипи и полицијата во врска со претресите. Синоќа и денеска се составуваат записници и сè што е земено ќе биде доставено до Обвинителството. Мислам дека тоа што го баравме и најдовме во домовите го зедовме. Дали е сè што е потребно, не можам да кажам – рече Јанева, која денеска присуствуваше на дебатата „Двојба во корист на обвинетиот – виновен надвор од разумно сомневање“, во организација на Здружението за кривично право и криминологија на Македонија и на Мисијата на ОБСЕ во Скопје.

Одговарајќи на новинарско прашање дали земените податоци од поранешниот претседател на Кривичниот суд во Скопје, Владимир Панчевски, упатуваат на тоа дека од судот биле изнесувани информации за претседателот на државата, Ѓорге Иванов, пред неговата одлука за аболиција лани во април, Јанева изјави дека не може да коментира, бидејќи податоците уште се анализираат.

– Не можам ништо да потврдам бидејќи во овој момент податоците што се одземени уште се анализираат. Откако ќе заврши анализата, ќе бидете известени. Ги видов написите на социјалните мрежи, тоа воопшто не можам да го потврдам, тоа се само шпекулации и претпоставки – рече Јанева.

СЈО, како што вчера соопшти Јанева, по судска наредба изврши личен претрес кај Владимир Панчевски и со друга наредба од судот ги одзеде сите податоци од компјутерскиот систем за распоредување предмети во Основниот суд Скопје 1.

Специјалното јавно обвинителство води предистражна постапка и го сомничи Панчевски дека местел кои судии да ги добиваат предметите на СЈО, а покрај тоа, постојат и сомнежи дека тој оддавал службени тајни на лица надвор од судот.