Влада: Сите помагачи за бегството на Груевски ќе бидат изведени пред правдата


Скопје, 18 јануари, 2019 - 16:52 (META) 

По денешното соопштение од седум граѓански организации кои побараа политичка одговорност, односно оставки од министерот за внатрешни работи Оливер Спасовски, директорот на Управата за безбедност и контраразузнавање (УБК) Горан Николовски и директорот на Агенцијата за разузнавање (АР), Зоран Иванов, Владата порача дека сите вклучени во бегството на Никола Груевски од земјава ќе бидат изведени пред лицето на правдата. Притоа посочи и дека има сознанија оти во бегството биле вклучени и граѓани од „трети земји“.

„Владата и МВР се одлучни дека ќе ги почитуваат законите и дека нема да дозволат извршната власт да ја нарушува истрагата која ја води Јавното обвинителство, што беше редовна пракса во минатото. Укажуваме дека е неопходно целосно затворање на сите прашања во истрагата за да се добијат одговори кои недвосмислено и без сомнеж ќе ја прикажат комплетната слика и сите инволвирани“, порача Владата.

Во соопштението се нагласува дека „МВР по налог и супервизија на министерот Оливер Спасовски, со сите свои ресурси и професионални капацитети учествува во асистирање на истрагата“.

„Истовремено, Одделот за внатрешна контрола, криминалистички истраги и професионални стандарди,  ги завршува истрагите за можна инволвираност на полициски службеници, а Секторот за внатрешни работи – Скопје за начинот на бегство и можните помагатели“, уверува Владата, нагласувајќи дека „ќе ги прифати сите докажани резултати на истрагата, и дека ќе поддржи преземање одговорност и правосудна постапка“.


Граѓански организации побараа оставки од Спасовски и директорите на УБК и АР за бегството на Груевски


Скопје, 18 јануари, 2019 - 14:04 (META) 

Седум граѓански организации денеска побараа оставки да поднесат министерот за внатрешни работи Оливер Спасовски, директорот на Управата за безбедност и контраразузнавање (УБК) Горан Николовски и директорот на Агенцијата за разузнавање (АР), Зоран Иванов. Невладините порачуваат дека тие лица мора да понесат  политичка одговорност за бегството на Никола Груевски.

„Сметаме дека навршувањето на втор календарски месец од бегството е разумен рок за на јавноста да и’ бидат соопштени информации околу истрагите кои се водат како и да се утврдат пропустите на институциите кои што во конкретниот случај биле надлежни да постапуваат. Одолговлекувањето ги подгреа сомнежите на јавноста и дополнително придонесе да се зголеми перцепцијата дека културата на неказнивост опстојува во Македонија. Затоа сметаме дека е неопходно да се преземе политичка одговорност, односно да следуваат оставки“, порачуваат граѓанските организации.

Зад повикот застанаа Институт за демократија Социетас Цивилис- Скопје, Институт за европска политика, Институт за човекови права, Коалиција „Сите за правично судење“, Младински образовен форум, НВО Инфоцентар и Центар за економски анализи.


Со најавената реформа Спасовски му препушта дел од ингеренциите на Николовски


Скопје, 14 јануари, 2019 - 14:00 (META) 

Со најавената реформа на безбедносно-разунавачкиот систем во Македонија голем дел од надлежностите на министерот за внатрешни работи (во моментов  Оливер Спасовски ) преоѓаат во рацете на директорот на новоформираната Агенција за внатрешно разузнавање со чие основање ќе се укине постоењето на Управата за безбедност и контраразузнавање (сега директор е Горан Николовски).

На Единствениот национален регистар на прописи на Република Македонија се објавени повеќе нацрт закони кои се однесуваат на оваа реформа меѓу кои се предлог законот за Агенција за внатрешно разузнавање, предлог закон за изменување на законот за следење на комуникациите, предлог закон за изменување на законот за внатрешни работи и предлог законот за изменување на законот за странци.

Според предложената регулатива, новата Агенција за внатрешно разузнавање би требало да почне да функционира од јуни, 2019 година, а се основа „заради заштита на националната безбедност на државата,  независноста, суверенитетот, уставното уредување, основните слободи и права на човекот и граѓанинот гарантирани со Уставот на Република Македонија, како и други работи од интерес на националната безбедност на државата“.

Таа ќе се основа како самостоен орган на државната управа со статус на правно лице. Се предвидува директорот на Агенцијата да го именува и разрешува Владата на Република Македонија на предлог на претседателот на Владата на Република Македонија.

Мандатот на директорот изнесува пет години со право на повторен избор за уште еден мандат. Владата на Република Македонија ќе го именува директорот во периодот од 20 мај до 1 јуни 2019 година.

Со измените на законот за следење на комуникациите овластувањата кои произлегуваат за министерот за внатрешни работи, а се однесуваат на барањето за издавање наредба за спроведување на мерките за следење на комуникациите кои се однесуваат на заштита на интересите на безбедноста и одбраната на државата се пренесуваат на директорот на Агенцијата за внатрешно разузнавање.

Според предлог законот за изменување на законот за странци, Министерството за надворешни работи по поднесено барање за издавање виза ќе обезбедува претходна согласност од Агенцијата за внатрешно разузнавање, во случаи кога постои сомневање дека странецот претставува опасност за јавниот ред и поредок и националната безбедност на Република Македонија.


Големата реформа на безбедносно-разузнавачкиот систем ќе ги „поткачи“ и странците


Скопје, 11 декември, 2018 - 16:47 (META) 

Министерството за внатрешни работи (МВР) подготвува нови и менува повеќе постоечки закони во насока на реформирање на безбедносно-разузнавачкиот систем во Македонија. На Единствениот национален електронски регистар на прописи е објавена подготовка на повеќе прописи, а меѓу другите и на предлог за изменување на законот за странци со цел, како што се вели, усогласување со предложените закони во врска со реформата во безбедносно-раузнавачкиот систем.

Истовремено, се подготвува нов закон за Агенција за внатрешно разузнавање.

„Со усвојување на предложениот закон ќе се овозможи реформирање на Управата за безбедност и контраразузнавање односно основање на Агенција за внатрешно разузнавање, со цел воспоставување на моделот на реформа на безбедносно-разузнавачкиот систем во Република Македонија“, се вели во образложението објавено на ЕНЕР.

МВР подготвува и предлог на закон за изменување на Законот за следење на комуникациите, за кој се вели дека е дел од сетот прописи предвиден во рамки на активностите за реформа на безбедносно-разузнавачкиот систем во Република Македонија.

Во фаза на подготовка е и законот за внатрешни работи, а се подготвува и нов предлог на Закон за координација на безбедносно-разузнавачката заедница во Република Македонија.

Реформите на безбедносно-разузнавачкиот систем почнаа со формирањето на новата Оперативно-техничка агенција (ОТА) која треба да биде гаранција за спречување на злоупотребата на системите на следење на комуникациите, а која веќе почна со работа.


Поранешниот шеф на УБК, Владимир Атанасовски, доби 30 дневен притвор


Скопје, 5 декември, 2018 - 9:41 (META) 

Судија на претходна постапка му одреди 30 дневен притвор на поранешниот директор на Управата за безбедност и контраразузнавање (УБК), Владимир Атанасовски по вечерашниот распит во Кривичниот суд.

Атанасовски беше уапсен синоќа, пред зграда спроти МВР.

Тој се товари за кривично дело „здружување заради непријателска дејност“, откако на минатите рочишта за случајот за упадот во Собранието на 27 април минатата година, од дел обвинети беше директно посочуван како главен организатор на насилниот упад во Собранието минатата година.

Атанасовски беше спроведен во Кривичниот суд на распит, а обвинителството побара притвор по сите три основи.

– Побарав мерка притвор по 3 основи, опасност од бегство, влијание врз сведоци за што е способен со оглед на функцијата што ја извршувал и опасност од повторување на кривичното дело – изјави шефицата на Обвинителството за организиран криминал и корупција, Вилма Русковска.

Атанасовски беше на чело на УБК, откако Сашо Мијалков даде оставка во септември 2016 година, до јуни 2017, а сега е советник за безбедност на претседателот на ВМРО-ДПМНЕ, Христијан Мицкоски.


Иванов, „згрозен и злоупотребен“, негира сè и бара одговор од УБК зошто е прислушуван


Скопје, 16 ноември, 2018 - 16:38 (META) 

Претседателот Ѓорге Иванов денеска ги негираше и наводите од службената белешка на УБК од објавеното решение за притвор за Кирил Божиновски, исто како и во случајот со Миле Јанакиески.

Од кабинетот на претседателот велат дека се „згрозени“, дека ниту е побарана, ниту одржана средба со Божиновски, ниту со негов посредник и негираат дека е остварена средба со посредник на Јанакиески.

„На идентичен начин се злоупотребува Претседателот на Република Македонија. Единствената разлика во содржината на цитираната белешка е што во првиот случај се посочува на остварена средба со посредник на Миле Јанакиески, а во вториот на средба со посредник на Кирил Божиновски. Кабинетот на Претседателот на Република Македонија јавно прашува дали се уште незаконското следење на комуникации се прикрива со користење на измислени извори“, велат од кабинетот на Иванов и ги повикаа МВР и УБК одговорат врз основа на што се следат активностите на Претседателот на Република Македонија и неговиот Кабинет, од страна на УБК.

Од таму бараат собраниската Комисија за надзор над работата на УБК, Советот на јавни обвинители, Судскиот совет и Дирекцијата за безбедност на класифицирани информации да утврдат одговорност за целиот случај и да го известат Иванов.

„Кабинетот на Претседателот на Република Македонија нема добиено одговор за барањата упатени вчера, до министерот за внатрешни работи, до директорот на УБК и до претседателот на Основниот суд Скопје 1, за достава на службената белешка на МВР-УБК, која е со лажна содржина и наведува на сомневање дека се следат активностите на Претседателот на Република Македонија, а воедно е употребена како аргумент при определувањето мерка притвор на Миле Јанакиески и Кирил Божиновски“, додаваат од кабинетот и потенцираат дека за ова биле известени странски дипломатски претставници во Република Македонија.


Иванов: Лага е дека се одржала средба со посредник на Јанакиески


Скопје, 15 ноември, 2018 - 16:00 (META) 

Ниту е побарана, ниту одржана средба со посредник на Миле Јанакиески, како што е наведено во службената белешка на УБК, класифицирана „строго доверливо“, а која е основ за определување на мерката притвор, велат од кабинетот на претседателот Ѓорге Иванов, по објавата на решението на Основниот суд Скопје 1 за определување на мерка притвор за Јанакиески.

„Миле Јанакиески телефонски побара средба со Претседателот Иванов која е одржана на 13.11.2018 година, вторник во 16 часот во кабинетот на Претседателот на Република Македонија. На средбата, воопшто не беа дискутирани темите амнестија, на која се повикува судот во решението за притвор, која е во надлежност на Собранието на Република Македонија, ниту пак темата аболиција. Сметаме дека станува збор за конструкција на лаги врз основа на претпоставки со цел да се инволвира Претседателот на Република Македонија, видливо од јавно објавеното образложение на решението на Судот“, велат од претседателскиот кабинет.

Од таму додаваат дека ова претставува груба полициска манипулација и инволвирање на полициски службеници со што се извршени кривични дела злоупотреба на службена положба и овластување, фалсификување на исправа, употреба на исправа со невистинита содржина.

„Останува нејасно, врз основа на што се следат активностите на претседателот Иванов и неговиот Кабинет од страна на УБК? Очекуваме итни одговори од Министерот за внатрешни работи, од директорот на УБК, од претседателот на Основниот суд Скопје 1 на дописите од Кабинетот на Претседателот на Република Македонија коишто беа испратени денеска“, додаваат од кабинетот.


Во Собрание презентирани модели за реформа на безбедносно-разузнавачкиот систем


Скопје, 8 ноември, 2018 - 12:46 (META) 

Mинистерот за внатрешни работи Оливер Спасовски денеска ги презентираше моделите за реформа на безбедносно-разузнавачкиот систем пред Комисијата за одбрана и безбедност на Собранието.
Појдовна точка за оваа реформа е Извештајот на експертската група на Прибе од 2015 година, каде беа дадени сериозни критики за злоупотребата на Управата за безбедност и контраразузнавање (УБК) преку системот за следење на комуникациите и преку концентрацијата на моќ.

– Една од забелешките велеше дека состојбата е резултат на „непочитување на професионалната етика, основните принципи на ризично управување и недостаток на познавање на чувствителноста на разузнавачите задачи во рамките на УБК. Беа дадени и забелешки за начинот на вработување и селекција во службата, како и недостатокот од изграден систем на постојана обука и усовршување на кадарот во Управата. И токму овие забелешки ги даваат насоките во кои треба да се движи и спроведе реформата на управата. Реформата на УБК не треба и не смее да се сведе само на нови законски решенија. Мора да постои долгорочна стратегија за тоа како да се реформира, но и како во иднина да се развива Управата. Изминатиов период работевме на враќање на угледот на професионална и релевантна служба, углед кој беше сериозно нарушен. Но, активностите не се доволни. Нужно се потребни структурни промени, воспоставување на нови, современи методи на работа на оваа служба. Ова е мотивирано од две причини. Првата е заштита на националните интереси на државата, што впрочем е и најважната улога на оваа служба. Втората е издигнување на службата на нивно на релевантен партнер во рамките во глобалната мрежа на безбедносно-разузнавачките служби – рече Спасовски.

Владата формираше меѓуресорска работна група, која има задача да понуди најсоодветен модел за реформа пред се на УБК, но и осврт на потребата од реформи во Агенцијата за разузнавање и военото разузнавање, како и другите институции од оваа област.

– Реформата е неопходна и таа не смее да биде спроведена само проформа, туку напротив треба да биде сеопфатна и долгорочна. Токму затоа и не ветуваме дека реформата ќе ја завршиме одеднаш, за три месеци во целиот безбедносно-разузнавачки сектор.Како министер и човек кој долги години е дел од општествено-политичките процеси во нашата земја, ќе ги споделам со вас моите очекувања од оваа реформа: Да се создаде ефикасен систем за заштита на националната безбедност, кој нема да биде злоупотребен за партиско-политички цели. Функционирање на службите согласно меѓународните стандарди и правила, притоа штитејќи ги и гарантирајќи ги државните интереси, а тоа пред се значи дејствување на службите ослободени од политички влијанија. Воведување на современи методи на работење, преку кое ќе се зголеми нивната превентивна улога во справувањето со современите безбедносни закани – рече Спасовски.


Меѓуресорска работна група треба да предложи модел за реформа на УБК


Скопје, 3 октомври, 2018 - 10:49 (META) 

На предлог на Министерството за внатрешни работи, Владата на 91. седница ја разгледа и усвои информацијата за потребата од формирање на Меѓуресорска работна група која ќе предложи модел на реформа на безбедносно – разузнавачкиот систем во Македонија со план за негово воспоставување, информираат од Владата.

„Министерот за внатрешни работи во рок од три дена од добивањето на номинациите е задолжен да достави до Владата, предлог- одлука за формирање на Меѓуресоска работна група која ќе предложи модел на реформа на безбедносно – разузнавачкиот систем во Македонија со план за негово воспоставување“, се вели во соопштението.

Министерот за внатрешни работи вчера информираше дека следниот период ќе се избере моделот по кој ќе се реформира УБК.

Во рамки на проектот изработен со ДИКАФ направена е анализа на оваа реформа, за која, како што истакна, постојат три модели.

– Ќе ги разгледаме во периодот на консултации, ќе разговараме со новинарите, дипломатскиот кор, академскиот сектор и на крај ќе одлучиме. Сакаме да ги видиме предностите и слабостите на секој од нив – додаде тој.


Спасовски: Следниот период ќе се избере моделот по кој ќе се реформира УБК


Скопје, 2 октомври, 2018 - 12:59 (META) 

Министерот за внатрешни работи Оливер Спасовски денеска на прес-конференција најави дека во следниот период ќе се избере моделот, по кој ќе се одвива реформата на УБК.

– На седница на Влада денеска ќе поднесам информација, со која ќе ги образложам причините за ваквата реформа. Предвидено е МВР да одржи повеќе консултации и дебати со релеванти чинители, по што ќе биде избран најсоодветниот модел. Овој процес ќе го води работна група, која ќе се формира од надлежните државни институции, но и со претставници од академската област и граѓанското општество – појасни Спасовски.

По завршувањето на консултациите заклучоците ќе бидат проследени до Владата со соодветен акционен план.

– Целта е добиеме служба која ќе се темели на високи професионални стандарди, почитување на етички кодекс и современи методи на работа и дејствување, служба која ќе биде заштитена од негативни политички влијанија и нејзина единствена задача и должност ќе биде да ги штити безбедноста и сигурноста на граѓаните – истакна Спасовски.

Тој потсети дека злоупотребата на безбедносно-разузнавачките служби, особено на УБК предизвика сериозна политичка криза во земјава и го наруши угледот на демократијата. Во рамки на проектот изработен со ДИКАФ направена е анализа на оваа реформа, за која, како што истакна, постојат три модели.

– Ќе ги разгледаме во периодот на консултации, ќе разговараме со новинарите, дипломатскиот кор, академскиот сектор и на крај ќе одлучиме. Сакаме да ги видиме предностите и слабостите на секој од нив – додаде тој.

Директорот на УБК, Горан Николовски изрази уверување дека на крајот од консултативниот процес ќе се постигне успех и ќе се одбере модел, кој ќе гарантира професионална и департизирана служба, кој ќе гарантира трансапрентност и ќе успее да ги заштити интересите на државата и ќе работи во интерес на граѓаните.

Спасовски посети дека реформите на системот на следење на комуникации од кои произлезе формирањето на ОТА, како дел од посеопфатната задача за реформирање на безбедносно-раузнавачкиот систем успешно се спроведуваат. Додаде дека се преземаат сите оперативни и логистички активности и согласно Законот за следење на комуникации ќе почне со работа не подоцна од 1 ноември оваа година.