!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Груевски и Јанакиески ќе одговараат и за „ТНТ“, судот го прифати обвинението на СЈО


Скопје, 17 ноември, 2017 - 11:11 (META) 

Кривичниот суд го прифати обвинението на Специјалното јавно обвинителство за случајот „ТНТ“, во кој обвинети се актеулениот лидер на ВМРО-ДПМНЕ, Никола Груевски, ексминистерот за транспорт и врски, Миле Јанакиески, и поранешниот градоначалник на Гази Баба, Тони Трајковски.

Од СЈО ни потврдија дека добиле известување од судот дека Советот за оценка на обвинителниот акт дал зелено светло за предметот да оди на главна расправа.

Судот сега треба да одреди судија што ќе го води предметот, кој треба да закаже датум за почеток на судењето.

Случајот „ТНТ“ се однесува на уривањето на комплексот „Космос“ на бизнисменот и претседател на Партијата за европска иднина (ПЕИ), Фијат Цаноски, а во него, покрај Груевски, Јанакиески и Трајковски, обвинети се уште четири лица.

Инаку, обвинението за предметот „ТНТ“ беше распределено за оценување кај судијката и поранешна в.д. претседателка на Кривичниот суд Скопје, Татјана Михајлова.

Апелацискиот суд Скопје на почетокот на месецов одлучи прислушуваните разговори да се користат како доказ во судската постапка за случајот.


Трајковски: Четири месеци се на власт, а не реализираа ниту еден проект во Гази Баба


Скопје, 10 октомври, 2017 - 20:14 (META) 

Кандидатот за градоначалник на ВМРО-ДПМНЕ за Гази Баба, Тони Трајковски, на денешниот митинг порача дека новата влада во изминатите четири месеци не само што не реализирала ниту еден проект во општина Гази Баба, туку ги намалила буџетските средства наменети за инвестиции во општината.

– Нашите противкандидати не за изминатите четири години, туку за изминатите 17 години не реализирале ниту еден проект во нашата општина. Велат не биле на власт, но каде се во изминативе четири месеци? Имаат власт и пари, а немаат ниту еден проект реализирано во нашата општина. Освен што немаат реализирано ниту еден проект, тие со ребалансот на буџетот ги кратат средствата за новата градинка во Стајковци, за новото училиште во Ченто, за новиот дом за стари лица во Маџари, за санација и за реконструкција на градинките и на училиштата, а последниве неколку месеци ни ги намалија и блок-дотациите за училиштата – рече Трајковски.

Тој се осврна на реализираните проекти, наведувајќи дека е изградено училиштето „Глигор Прличев“, детската градинка „Морковче“, пешачки и велосипедски патеки, спортски игралишта, детски забавни игралишта, спортска сала во населбата Ченто, асфалтирани се повеќе од 90 улици, а поставена е фекална и атмосферска канализација, како и водоводна мрежа.

Лидерот на ВМРО-ДПМНЕ, Никола Груевски, ги повика жителите на Гази Баба да им одржат лекција на Зоран Заев и на СДСМ на изборите на 15 октомври поради лошото раководење со државата. Тој истакна дека Владата не само што не ги исполнила ветувањата, туку работи на уништување на сработеното од владата на ВМРО-ДПМНЕ.

– Овие луѓе од власта се неспособни. Тие се практиканти без искуство и без капацитет. Тие не знаат економија, не знаат инвестиции, работа во локална самоуправа. Тие се толку вознемирени и немаат конкретна идеја и план што да направат во врска со тоа. Тие оставија сè друго настрана и само фрлаат кал врз мене. Тие велат: „Ние самите не можеме да сториме ништо, барем да го деградираме Груевски и да ја обесхрабриме ВМРО“. Не трошете го вашето време. Ова нема никаква смисла. Ние сме горд глас на оваа нација, ние сме независен глас на Македонија. Ние сме Македонија – рече лидерот на ВМРО-ДПМНЕ.

Груевски рече дека не бараат само победа за претстојните избори, туку дека размислуваат и имаат проекти за следните две децении. Во контекст на тоа ги повтори проектите кои ги планираат за општините во кои ќе победат, односно бесплатен здрав оброк за учениците, отпишување на долговите за вода и за комуналии на социјално загрозените семејства и стекнување дом за младите брачни парови.


ВМРО-ДПМНЕ во Скопје и во Гази Баба ќе ги кандидира Коце Трајановски и Тони Трајковски


Скопје, 13 септември, 2017 - 16:49 (META) 

ВМРО-ДПМНЕ најверојатно ќе ги кандидира актуелните градоначалници на Скопје и на општина Гази Баба, Коце Трајановски и Тони Трајковски, за свои кандидати за првите места во главниот град и во општината за локалните избори, соопшти Христијан Мицкоски, генерален секретар на ВМРО-ДПМНЕ.

Како што соопшти тој, партијата и во општина Росоман најверојатно ќе настапи со сегашниот градоначалник, Стојанче Лазов, а за градоначалник на општина Дебар ќе го кандидира лекарот Драган Клопчески.

Како што соопшти Мицкоски, тоа се имињата на кандидатите што централниот комитет на ВМРО-ДПМНЕ му ги предложил на партискиот извршен комитет, но според партиската практика, може да се очекува дека тие ќе бидат и официјално прогласени за кандидати вечерва.

Имињата на Трајановски и на Трајковски се слушаа во „бомбите“ и тоа во снимките за комплексот „Космос“ на Фијат Цаноски, во кој Груевски кажува дека и обајцата биле вознемирени да не бидат прогласени за виновни за целата постапка околу уривањето на комплексот. Во разговорите, пак, на Зоран Ставрески и на Гордана Јанкулоска, Трајановски се споменува во контекст на претседател на ЗЕЛС, од кого битолскиот градоначалник бара да му помогне државата да ги покрие долговите за превоз на ученици, а Јанкулоска дури и вели дека „Коце дава поддршка на сите матни работи“.


СДСМ: Градоначалникот на Гази Баба излажа и за пречистителна станица во Јурумлери


Скопје, 9 септември, 2017 - 13:38 (META) 

„Во Јурумлери требаше да има пречистителна станица за фекална канализација која актуелниот градоначалник на Гази Баба од ВМРО-ДПМНЕ, Тони Трајковски, со години ја ветува на граѓаните. Но, овде нема ниту пречистителна станица, ниту метар изградено фекална канализација. Продолжената рака на Никола Груевски, Тони Трајковски, ги излажа граѓаните“, обвини денеска Борче Георгиевски, претседател на општинската организација на СДСМ од Гази Баба.

– Недозволиво е во 21 век жителите на Јурумлери и на околните села да немаат елементарни услови за живот и да живеаат со септички јами кои ја загрозуваат природата, но и здравјето на граѓаните. Покрај ветената пречистителна станица и фекална канализација, нерелизирано е и ветувањето за изградба на клучката на регионалниот пат од Јурумлери кон Илинден. На жителите од Јурумлери лажно од страна на ВМРО-ДПМНЕ и Трајковски им беше ветувано чистење и одржување на каналите, но ништо од тоа, после секој пороен дожд овие наши сограѓани се со поплавени подруми и домови – рече Георгиевски, порачувајќи дека за решавање на проблемите во Гази Баба потребни се промени на локалната власт, односно дека СДСМ како нова локална власт ќе работи во интерес на граѓаните.


Димовски и Трајковски остануваат без пасоши, Апелација им ги одби жалбите


Скопје, 21 јули, 2017 - 12:07 (META) 

Тони Трајковски, актуелениот градоначалник на Гази Баба, и пратеникот во Собранието од ВМРО-ДПМНЕ, Илија Димовски, остануваат без пасоши и со обврска еднаш неделно да се јавуваат пред служебно лице во суд, откако Апелацискиот суд Скопје ги одби нивните жалби на одлуките на Кривичниот суд да им бидат одредени мерки на претпазливост.

Апелацискиот суд, истовремено, ја одбил како неоснована и жалбата со која Специјалното јавно обвинителство бараше на градоначалникот на Гази Баба, Трајковски, обвинет во случајот „ТНТ“, да му биде одредена мерка притвор, наместо мерки на претпазливост.

СЈО бараше притвор за Трајковски, бидејќи, како што навел обвинителот Гаврил Бубевски пред судот, иако уредно ги примал поканите за распит, градоначалникот на Гази Баба не доаѓал и не покажувал почит кон обвинителството.

Во врска со жалбата на Димовски, кој e обвинет во случајот „Титаник“, Апелацискиот суд, како што стои во решението, оценил дека таа е неоснована и дека Кривичниот суд правилно постапил кога го уважил предлогот на СЈО за определување мерки на претпазливост.

Димовски во жалбата навел дека се јавувал на сите покани во СЈО и дека доколку имал намера да бега, имал доволно време да го стори тоа досега.


Трајковски: Јанева за „Космос“ презентираше обвинувања и манипулации без докази


Скопје, 12 јуни, 2016 - 12:12 (META) 

Катица Јанева срамно и непрофесионално игнорираше десетици решенија, вештачења и судски пресуди во корист на Општина Гази Баба, кои јасно докажуваа дека објектот „Космос“ на Фијат Цаноски е дивоградба, рече градоначалникот на Гази Баба, Тони Трајковски, на денешната прес-конференција.

Според Трајковски, специјалната јавна обвинителка Јанева пред месец и половина во јавноста презентирала обвинувања и манипулации, без никаков доказ за дивоградбата „Космос“ и со тоа му го нарушила угледот.

– Без ниту еден доказ, чисто политичко обвинување и конструкција од која секој правник би се засрамил. Катица Јанева ги сокри сите факти и аргументи и отворено застана на ставот дека некои дивоградби мора да се третираат поинаку од другите. Селективност спроведена по налог на Зоран Заев. И покрај сите докази кои беа доставени од наша страна до СЈО, Катица Јанева, сепак, излезе на прес-конференција и одлучи мене и моите колеги да ни го наруши угледот преку пласирање лаги и клевети – рече Трајковски.

Во врска со барањето на СЈО да се спроведе мерка за претпазливост, Трајковски вели дека нема намера никаде да замине, особено кога е сигурен дека вистината е на негова страна.


Јанакиески ги избегна новинарите по распитот во Кривичниот суд


Скопје, 10 јуни, 2016 - 17:38 (META) 

Поранешниот министерот за транспорт и врски, Миле Јанакиески по денешниот распит во Кривичен суд, ги избегнал камерите и го напуштил судот од задната страна, јавува „novatv.mk.“

Јанакиески како и поранешниот премиер Никола Груевски и градоначалникот на Гази Баба, Тони Трајковски беа повикани на распит кај судија на претходна постапка, откако Специјалното јавно обвинителство побара да им се изречат мерки за претпазливост за случајот „ТНТ“, за уривањето на комплексот „Космос“ на бизнисменот Фијат Цаноски.

Поранешниот премиер и актуелен лидер на ВМРО-ДПМНЕ, Никола Груевски, по распитот пред судија на претходна постапка во Кривичниот суд, на кој се задржа околу еден час, изјави дека не се чувствува виновен, додавајќи дека и во иднина очекува да има нови обиди за негово малтретирање и повикување во судот.