Денеска ново рочиште за уривањето на „Космос“ на Фијат Цаноски


Скопје, 4 мај, 2018 - 10:18 (META) 

Случајот „ТНТ“ на Специјалното јавно обвинителство денеска ќе има ново рочиште во Основниот суд Скопје 1.

Обвинети за уривањето на станбено-деловниот комплекс „Космос“ на бизнисменот, поранешен пратеник и партиски лидер Фијат Цаноски, се поранешниот премиер Никола Груевски, поранешниот министер за транспорт и врски Миле Јанакиески, и поранешниот градоначалник на општина Гази Баба, Тони Трајковски.

Врховниот суд минатата недела донесе одлука да не ги изземе судиите во „ТНТ“, како што бараше одбраната.

Според обвинението на СЈО, обвинетите во 2011 година сториле кривично дело од политичка омраза со уривање на комплексот „Космос“ на нивниот политички противник Фијат Цаноски.


Адвокатот на Груевски тврди дека ќе имало кривично дело ако не се срушел „Космос“


Скопје, 16 март, 2018 - 11:11 (META) 

Ниту Никола Груевски, ниту Миле Јанакиески како ни Елисавета Најдовска и Насер Ралев кои ги застапувам не го извршиле кривичното дело кое им се става на товар. Ова на денешното рочиште за случајот „ТНТ“ го кажа адвокатот Димитар Дангов.

– Груевски ниту самостојно, ниту во договор со Јанакиески не го поттикнале Тони Трајковски незаконски да го сруши објектот „Космос“. Одбраната ќе докаже дека премиер и министер не се позиции на моќ, туку службени лица со надлежности пропишани во закон. Апсурдот е во тоа што не постои незаконско рушење кое го содржи описот на кривичното дело кое им се става на товар – рече Дангов.

Тој додаде дека неговите клиенти работеле законски.

– Законски постапувале. Доколку не било извршено рушењето тогаш ќе стореле кривично дело за незаконито вршење на службата – истакна Дангов.

На рочиштето присуствуваат сите обвинети – поранешниот премиер Никола Груевски, поранешниот министер за транспорт и врски Миле Јанакиески, поранешниот градоначалник на општина Гази Баба, Тони Трајковски, градежна инспекторка од Гази Баба и тројца членови на општинската комисија за набавки.

Според обвинителниот акт, со постапката на уривање на објектот на бизнисменот Цаноски е предизвикана штета од 16 милиони евра, а дополнително на буџетот на општина Гази Баба уште три милиони денари. Цаноски и фирмата ФИМЕТ најавија дека ќе поднесат побарувања за причинетата штета.


Цаноски бара отштета од 55 милиони евра за урнатиот „Космос“


Скопје, 24 јануари, 2018 - 14:34 (META) 

Бизнисменот Фијат Цаноски по завршувањето на првото рочиште од судењето за случајот „ТНТ“ денеска изјави дека очекува судот да донесе праведна одлука и обвинетите кои „и нанеле голема штета на Македонија” да бидат осудени.

Во процесот за уривањето на комплексот „Космос“ на Цаноски, покренат од Специјалното јавно обвинителство (СЈО), главни обвинети се поранешниот премиер и поранешен претседател на ВМРО-ДПМНЕ, Никола Груевски, поранешниот министер за траснпорт и врски Миле Јанакиески и поранешниот градоначалник на општина Гази Баба Тони Трајковски, како и уште четири лица.

Цаноски вели дека ќе бара отштета од 55 милиони евра, колку што ги цени неговите загуби од уривањето на станбено-деловниот комплекс.

Инаку, на денешното почетно рочиште, адвокатите на обвинетите рекоа оти ќе докажат дека комплексот морало да се урне, а нивните клиенти со постапките не ги прекршиле законите.

Откако обвинителот од СЈО, Бурим Рустеми, го кажа неговиот воведен збор, адвокатот Димитар Дангов реагираше околу наводите, по што побара пауза од 10-15 минути за консултација со другите адвокати. Тие потоа побараа од судот да им бидат доставени прислушуваните разговори и вештачењето од Тетовскиот универзитет за да можат да подготват и да дадат, како што рекоа, квалитетна одбрана при изнесувањето на воведните говори. Напоменаа дека вештачењето не го добил никој од одбраната.

Обвинителот Рустеми рече дека тие како обвинители немаат ништо против одбраната да ги има сите докази, меѓутоа, како што додаде, фактот дека бранителите не ја знаат содржината на разговорите е поради лошата стратегија што ја одбрале во текот на истражната постапка.

– Да дојдеа во СЈО и да ја слушаа содржината на разговорите како што ја слушавме ние, ќе ја имаа. Одбраната не го напрви тоа – рече Рустеми.

Адвокатот Дончо Наков рече дека ако судот не дозволи да ги добијат доказите пред воведните говори, тоа ќе биде кршење на принципот на „еднаквост на оружјата“.

Судијата Огнен Ставрев побара сите да излезат од судницата за петчлениот судски совет да донесе одлука по барањето на одбраната. Епилогот беше одбивање на барањата на адвокатите како неосновани, а судијата рече дека сите докази ќе и бидат дадени на одбраната во текот на доказната постапката.

На ваквата одлука, адвокатите на обвинетите бурно реагираа, повторувајќи дека не можат да дадат воведни говори без овие докази и рекоа дека судот  донел одлука врз основа на неточни тврдења на СЈО.

Судијата Ставрев на тоа возврати дека ако не сакаат, адвокатите не мора да дадат воведни зборови, но судењето ќе продолжи. Адвокатите ги повторија своите барања, а на крајот беше донесена одлука одбраната да даде воведни зборови, кои ќе ги дополнат кога ќе ги добијат бараните докази.

Судењето продолжува на 9 февруари.


Почна судењето за „Космос“, Груевски и Јанакиески велат дека не се виновни


Скопје, 24 јануари, 2018 - 11:28 (META) 

Во Основниот суд Скопје 1 претпладнево почна судењето за случајот ТНТ покренат од Специјалното јавно обвинителство (СЈО), во кое главни обвинети се поранешниот премиер и поранешен претседател на ВМРО-ДПМНЕ, Никола Груевски, поранешниот министер за траснпорт и врски Миле Јанакиески и поранешниот градоначалник на општина Гази Баба Тони Трајковски. Покрај нив, обвинети се уште четири лица за уривањето на комплексот „Космос“ на Фијат Цаноски, кој исто така дојде во судот.

Во своите искази, и Груевски и Јанакиески и Трајковски, но и останатите четиримина обвинети, рекоа дека не се виновни по ниту една точка од обвинението. Цаноски, пак, рече дека ќе бара отштета од обвинетите.

На почетокот, адвокатот Димитар Дангов даде приговор дека двете камери со коишто ќе се снима судењето се „свадбарски“ и дека не се дел од АКМИС-системот, односно она што го снимаат, не може директно да се внесе во записникот.

– Поради ова, судот не може да ги спроведе одредбите од Законот за кривична постапка и нема услови за водење на постапката – рече Дангов.

Судијата Огнен Ставрев рече дека приговорот е неоснован и дека камерите се в ред, па се што снимаат ќе биде внесено во записникот.

Забелешка имаше и адвокатот Боро Тасевски, кој побара од судот првин да ја расчисти ситуацијата дали снимките од прислушуваните разговори се доказ или не. Тој рече оти одбраната смета дека „бомбите“ со правосилна одлука на Кривичниот суд се издвоени од доказниот материјал.

Обвинителот од СЈО, Бурим Рустеми, пак, посочи дека со одлука на Апелацискиот суд, „бомбите“ може да се користат како доказ.

Оваа одлука беше донесена на 4 ноември лани.

Судијата Ставрев потоа истакна дека одбраната ќе ги добие сите материјали вклучително и „бомбите“.

Поранешниот министер за транспорт и врски, Миле Јанакиески, при читањето на генералиите на обвинетите, даде забелешка дека повеќе не е вработен во партијата ВМРО-ДПМНЕ, туку во компанијата „Пелистерка“.

Обвинителот на СЈО, Рустеми, во воведните зборови нагласи дека Груевски, како тогашен премиер и лидер на ВМРО-ДПМНЕ, и Јанакиески, како министер и висок функционер на партијата, незаконски го срушиле комплексот „Космос“ на Цаноски, само затоа што тој, како претседател на Партијата за европска иднина, одлучил да ја напушти коалицијата на ВМРО-ДПМНЕ и склучил коалиција со СДСМ за изборите во јуни 2011 година.

– Груевски и Јанакиески одмаздата ја сториле преку институциите на централната и локалната власт и со тоа го оштетиле Цаноски за 16 милиони евра. Ова ќе го докажеме преку исказите на Цаноски и на другите сведоци, аудио записите од телефонските разговори меѓу Груевски и Јанакиески, СМС пораките испратени до Јанакиески од сега покојниот Фиданчо Илиевски, преку стручните мислења од Архитектонскиот факултет и преку урбанистичките и екомско-финанските вештачења на документацијата – рече обвинителот на СЈО во обемниот говор.


Судењето на Груевски, Јанакиески и Трајковски за „ТНТ“ закажано за 24 јануари


Скопје, 3 јануари, 2018 - 14:58 (META) 

Поранешниот премиер и лидер на ВМРО-ДПМНЕ, Никола Груевски, поранешниот министер за транспрот и врски Миле Јанакиески и поранешниот градоначалник на општина Гази Баба, Тони Трајковски на 24 јануари треба да седнат на обвинителна клупа и за случајот „ТНТ“, за кога е закажно првото рочиште за овој предмет на Специјалното јавно обвинителство.

Засега е неизвесно кој судија ќе го суди предметот, бидејќи судијата Ивица Стефановски, кај кого првично беше распределен случајот, со новиот распоред на претседателот на Кривичниот суд, Иван Џолев, е прераспореден во друго одделението во судот, односно нема да суди организиран криминал.

Од судот велат дека кога новиот распоред во делот за Стефановски и официјално ќе стапи на сила, тогаш предметот „ТНТ“ ќе биде распореден кај друг судија.

Согласно пресудата на Апелацискиот суд од почетокот на ноември, минатата година прислушуваните разговори ќе бидат доказ во судската постапка и за овој случај.

Случајот „ТНТ“ се однесува на уривањето на комплексот „Космос“ на бизнисменот и претседател на Партијата за европска иднина (ПЕИ), Фијат Цаноски, а во него, покрај Груевски, Јанакиески и Трајковски, обвинети се уште четири лица.


Груевски и Јанакиески ќе одговараат и за „ТНТ“, судот го прифати обвинението на СЈО


Скопје, 17 ноември, 2017 - 11:11 (META) 

Кривичниот суд го прифати обвинението на Специјалното јавно обвинителство за случајот „ТНТ“, во кој обвинети се актеулениот лидер на ВМРО-ДПМНЕ, Никола Груевски, ексминистерот за транспорт и врски, Миле Јанакиески, и поранешниот градоначалник на Гази Баба, Тони Трајковски.

Од СЈО ни потврдија дека добиле известување од судот дека Советот за оценка на обвинителниот акт дал зелено светло за предметот да оди на главна расправа.

Судот сега треба да одреди судија што ќе го води предметот, кој треба да закаже датум за почеток на судењето.

Случајот „ТНТ“ се однесува на уривањето на комплексот „Космос“ на бизнисменот и претседател на Партијата за европска иднина (ПЕИ), Фијат Цаноски, а во него, покрај Груевски, Јанакиески и Трајковски, обвинети се уште четири лица.

Инаку, обвинението за предметот „ТНТ“ беше распределено за оценување кај судијката и поранешна в.д. претседателка на Кривичниот суд Скопје, Татјана Михајлова.

Апелацискиот суд Скопје на почетокот на месецов одлучи прислушуваните разговори да се користат како доказ во судската постапка за случајот.


Трајковски: Четири месеци се на власт, а не реализираа ниту еден проект во Гази Баба


Скопје, 10 октомври, 2017 - 20:14 (META) 

Кандидатот за градоначалник на ВМРО-ДПМНЕ за Гази Баба, Тони Трајковски, на денешниот митинг порача дека новата влада во изминатите четири месеци не само што не реализирала ниту еден проект во општина Гази Баба, туку ги намалила буџетските средства наменети за инвестиции во општината.

– Нашите противкандидати не за изминатите четири години, туку за изминатите 17 години не реализирале ниту еден проект во нашата општина. Велат не биле на власт, но каде се во изминативе четири месеци? Имаат власт и пари, а немаат ниту еден проект реализирано во нашата општина. Освен што немаат реализирано ниту еден проект, тие со ребалансот на буџетот ги кратат средствата за новата градинка во Стајковци, за новото училиште во Ченто, за новиот дом за стари лица во Маџари, за санација и за реконструкција на градинките и на училиштата, а последниве неколку месеци ни ги намалија и блок-дотациите за училиштата – рече Трајковски.

Тој се осврна на реализираните проекти, наведувајќи дека е изградено училиштето „Глигор Прличев“, детската градинка „Морковче“, пешачки и велосипедски патеки, спортски игралишта, детски забавни игралишта, спортска сала во населбата Ченто, асфалтирани се повеќе од 90 улици, а поставена е фекална и атмосферска канализација, како и водоводна мрежа.

Лидерот на ВМРО-ДПМНЕ, Никола Груевски, ги повика жителите на Гази Баба да им одржат лекција на Зоран Заев и на СДСМ на изборите на 15 октомври поради лошото раководење со државата. Тој истакна дека Владата не само што не ги исполнила ветувањата, туку работи на уништување на сработеното од владата на ВМРО-ДПМНЕ.

– Овие луѓе од власта се неспособни. Тие се практиканти без искуство и без капацитет. Тие не знаат економија, не знаат инвестиции, работа во локална самоуправа. Тие се толку вознемирени и немаат конкретна идеја и план што да направат во врска со тоа. Тие оставија сè друго настрана и само фрлаат кал врз мене. Тие велат: „Ние самите не можеме да сториме ништо, барем да го деградираме Груевски и да ја обесхрабриме ВМРО“. Не трошете го вашето време. Ова нема никаква смисла. Ние сме горд глас на оваа нација, ние сме независен глас на Македонија. Ние сме Македонија – рече лидерот на ВМРО-ДПМНЕ.

Груевски рече дека не бараат само победа за претстојните избори, туку дека размислуваат и имаат проекти за следните две децении. Во контекст на тоа ги повтори проектите кои ги планираат за општините во кои ќе победат, односно бесплатен здрав оброк за учениците, отпишување на долговите за вода и за комуналии на социјално загрозените семејства и стекнување дом за младите брачни парови.


ВМРО-ДПМНЕ во Скопје и во Гази Баба ќе ги кандидира Коце Трајановски и Тони Трајковски


Скопје, 13 септември, 2017 - 16:49 (META) 

ВМРО-ДПМНЕ најверојатно ќе ги кандидира актуелните градоначалници на Скопје и на општина Гази Баба, Коце Трајановски и Тони Трајковски, за свои кандидати за првите места во главниот град и во општината за локалните избори, соопшти Христијан Мицкоски, генерален секретар на ВМРО-ДПМНЕ.

Како што соопшти тој, партијата и во општина Росоман најверојатно ќе настапи со сегашниот градоначалник, Стојанче Лазов, а за градоначалник на општина Дебар ќе го кандидира лекарот Драган Клопчески.

Како што соопшти Мицкоски, тоа се имињата на кандидатите што централниот комитет на ВМРО-ДПМНЕ му ги предложил на партискиот извршен комитет, но според партиската практика, може да се очекува дека тие ќе бидат и официјално прогласени за кандидати вечерва.

Имињата на Трајановски и на Трајковски се слушаа во „бомбите“ и тоа во снимките за комплексот „Космос“ на Фијат Цаноски, во кој Груевски кажува дека и обајцата биле вознемирени да не бидат прогласени за виновни за целата постапка околу уривањето на комплексот. Во разговорите, пак, на Зоран Ставрески и на Гордана Јанкулоска, Трајановски се споменува во контекст на претседател на ЗЕЛС, од кого битолскиот градоначалник бара да му помогне државата да ги покрие долговите за превоз на ученици, а Јанкулоска дури и вели дека „Коце дава поддршка на сите матни работи“.


СДСМ: Градоначалникот на Гази Баба излажа и за пречистителна станица во Јурумлери


Скопје, 9 септември, 2017 - 13:38 (META) 

„Во Јурумлери требаше да има пречистителна станица за фекална канализација која актуелниот градоначалник на Гази Баба од ВМРО-ДПМНЕ, Тони Трајковски, со години ја ветува на граѓаните. Но, овде нема ниту пречистителна станица, ниту метар изградено фекална канализација. Продолжената рака на Никола Груевски, Тони Трајковски, ги излажа граѓаните“, обвини денеска Борче Георгиевски, претседател на општинската организација на СДСМ од Гази Баба.

– Недозволиво е во 21 век жителите на Јурумлери и на околните села да немаат елементарни услови за живот и да живеаат со септички јами кои ја загрозуваат природата, но и здравјето на граѓаните. Покрај ветената пречистителна станица и фекална канализација, нерелизирано е и ветувањето за изградба на клучката на регионалниот пат од Јурумлери кон Илинден. На жителите од Јурумлери лажно од страна на ВМРО-ДПМНЕ и Трајковски им беше ветувано чистење и одржување на каналите, но ништо од тоа, после секој пороен дожд овие наши сограѓани се со поплавени подруми и домови – рече Георгиевски, порачувајќи дека за решавање на проблемите во Гази Баба потребни се промени на локалната власт, односно дека СДСМ како нова локална власт ќе работи во интерес на граѓаните.


Димовски и Трајковски остануваат без пасоши, Апелација им ги одби жалбите


Скопје, 21 јули, 2017 - 12:07 (META) 

Тони Трајковски, актуелениот градоначалник на Гази Баба, и пратеникот во Собранието од ВМРО-ДПМНЕ, Илија Димовски, остануваат без пасоши и со обврска еднаш неделно да се јавуваат пред служебно лице во суд, откако Апелацискиот суд Скопје ги одби нивните жалби на одлуките на Кривичниот суд да им бидат одредени мерки на претпазливост.

Апелацискиот суд, истовремено, ја одбил како неоснована и жалбата со која Специјалното јавно обвинителство бараше на градоначалникот на Гази Баба, Трајковски, обвинет во случајот „ТНТ“, да му биде одредена мерка притвор, наместо мерки на претпазливост.

СЈО бараше притвор за Трајковски, бидејќи, како што навел обвинителот Гаврил Бубевски пред судот, иако уредно ги примал поканите за распит, градоначалникот на Гази Баба не доаѓал и не покажувал почит кон обвинителството.

Во врска со жалбата на Димовски, кој e обвинет во случајот „Титаник“, Апелацискиот суд, како што стои во решението, оценил дека таа е неоснована и дека Кривичниот суд правилно постапил кога го уважил предлогот на СЈО за определување мерки на претпазливост.

Димовски во жалбата навел дека се јавувал на сите покани во СЈО и дека доколку имал намера да бега, имал доволно време да го стори тоа досега.