Дигиталното поврзување на Западен Балкан ќе биде финансирано со 200 милиони евра од ЕУ


Софија, 17 мај, 2018 - 11:44 (META) 

Заклучоците од првиот Дигитален Самит, што пред еден месец се одржа во Скопје, веќе се дел од агендата на Европската Унија, информираат од министерството за информатичко општество и администрација.

„Еврокомесарот за проширување Јоханес Хан, од самитот на ЕУ и Западен Балкан, информираше дека иницијативите за дигитална агенда и поголема поврзаност во регионот ќе бидат финансирани со повеќе од 200 милиони евра. Во фокусот на овие мерки е намалување на трошоците за роаминг, подобрување на широкопојасниот интернет, развој на е-Влада како и дигитализација на индустријата“, се вели во соопштението на МИОА.

Од таму додаваат дека МИОА по повод 17 мај, Меѓународниот ден на телекомуникации и информатичко општество, уште еднаш се обврзува на реализација на сите најавени активности во областа на информатичкото општество.

„Во наредниот период ќе ги објавиме националните стратегии за широкопојасен интернет и за сајбер безбедност, а до крајот на годината ќе ја објавиме и долгорочната стратегија за ИКТ“, се додава во соопштението.

Во август, МИОА ќе ги пушти во употреба националниот портал за е-услуги, и новиот портал за отворени податоци.

„Тоа што е од особена важност за сите граѓани е дека конечно услугите ги носиме до нивните домови. Најчесто бараните докуметни, граѓаните ќе можат да ги добија по електронски пат, брзо, едноставно и ефтино. Преку дигитализација и професионализација на администрацијата, конечно граѓаните ќе добијат институции кои се нивен сервис и одговараат на нивните потреби и барања“, велат од МИОА.


Мигрантските рути се затворени, владите во регионот ќе разменуваат информации


Скопје, 4 април, 2018 - 13:55 (META) 

Регионалната иницијатива за миграција, азил и бегалци (МАРРИ) ги поддржува шесте влади од Западен Балкан, Албанија, Босна и Херцеговина, Косово, Македонија, Црна Гора и Србија во усогласување на правната рамка со законодавството на Европска Унија, во изградбата на институции и персонал, како и размена на информации за мигрантите кои поминуваат низ овие држави.

На денешната презентација на МАРРИ, беше истакнато дека како делуваат на повеќе подрачја како азил, интегрирано гранично управување, визен режим, интеграција на бегалците, борбата против трговијата со луѓе.

– Ги поддржувме шесте влади за подобро да управуваат со миграцијата. Тоа е условено со евроатлантската перспектива на државите од регионот, а како членки на Обединетите Нации, одредени документи се обврзувачки. Државите исто така треба да имаат побрза соработка во размената на комунакции – изјави директорката на МАРРИ, Тамара Ругоша.

Иако рутата за мигрантите е затворена, сепак тие користат илегални премини преку државите од регионот за влез во државите од Европската Унија. Притоа, додаде Ругоша, постои опасност од нелегална трговија со луѓе, криумчарење на деца, трговија со органи.

Во следните две години, како предизвик за МАРРИ меѓудругото ќе биде и подигање на свеста во регионот од опасноста за криумчарење. Па оттука, граничните служби, посебно на аеродромите, ќе бидат обучувани од страна на Европската гранична служба, Фронтекс за препознавање на деца кои се жртви на криумчарење.

– Во моментов рутите се затворени, но опасноста од Блискиот Исток се уште ја има. Затоа овој период е потребно да превенираме. Кога беше кризата, на македонската и на српската граница имаше по 20.000 мигранти, а тоа навистина е тешко да се изменаџира. Властите овде и во Србија покажаа дека имаат капацитет за справување, но тој треба да се подобри и да биде поефикасен. Ние сме овде и да ги поврземе владите со донаторите, за тие да не трошат пари од буџетот. Имав информација дека вашата држава, ја чинело 50.000 евра дневно за регистрација, сместување, организација на мигрантите. Тоа е голем притисок – додаде Ругоша.

Во 2015 и 2016 година, низ територијата на Западен Балкан поминале еден милион бегалци.


Инфраструктурата и енергетиката, теми на Инвестицискиот самит во Лондон


Лондон, 27 февруари, 2018 - 10:43 (META) 

Инфраструктурното и енергетското поврзување на земјите од Западен Балкан биле едни од главните теми за кои, премиерите на земјите од Западен Балкан, разговарале на „Регионалната инвестициска платформа“ на Инвестицискиот самит за Западен Балкан во организација на Европската банка за обнова и развој (ЕБОР), што се одржа во Лондон.

„Зборувавме за Коридорот 8 и Коридорот 10, но и другите коридори кои поминуваат низ другите земји. Се работи за сериозни финансиски средства. Само проценката на Коридорот 8, во деловите во Македонија, Бугарија и Албанија, е две милијарди евра. Се зборува за железничкото и патното поврзување, но и со можност да се пуштат и оптички кабли заради дигиталната агенда и поврзаноста на регионот. Зборувавме за проекти кои значат поддршка на енергетиката, производството, енергетското поврзување, но и секако поддршката на компаниите кои треба да инвестираат во овој регион“, изјави премиерот Зоран Заев.

Тој додаде дека преку овие крупни инфраструктурни проекти финансирани од ЕБОР, ќе им се даде многу работа на домашните компании, а ќе се привлечат и голем број на инвестиции.

На панелот „Одржлив регионален енергетски модел“, вицепремиерот за економски прашања Кочо Анѓушев изјави дека енергетската иднина на земјите од регионот на Западен Балкан ја гледа во создавање на еден заеднички енергетски пазар, без административни граници.

„Доколку сакаме одржлив енергетски систем во регионот, верувам дека формирање на еден заеднички енергетски пазар, единствена регионална берза и воведување на универзален снабдувач за електрична енергија и гас е вистинско решение. Додека не стигнеме до тоа решение Владите треба да работат на унапредување на меѓусебната соработка и отстранување на административните бариери за слободен проток на енергија“, рече Анѓушев.


Железничките делници на Коридорот 8 се заеднички приоритет на земјите од регионот


Варшава, 25 октомври, 2017 - 14:15 (META) 

Министеркaта без ресор задолжена за странски инвестиции, Зорица Апостолска, денеска учествуваше на втората министерска конференција за транспорт што се оддржува во Варшава, Полска.

На конференцијата на која присуствуваат министрите за транспорт од земјите од Централна и од Источна Европа и од Кина, се разговара за развојните стратегии во насока на реализација на инфраструктурните и транспортни проекти и нивното регионално значење.

Апостолска ја нагласила потребата од изградба и модернизација на коридорите 8 и 10, како најважни транспортни врски со земјите од Централна и од Југоисточна Европа.

„Во моментов сме фокусирани на изградба на нови автопатишта и патишта, нови железнички пруги, како и реконструкција и модернизација на старите. Коридорот 10 е стратешки многу важен бидејќи наjголем дел од стоките што доаѓаат од странство се транспортираат главно низ овој коридор. Затоа неговата функционалност е од суштинска важност“, изјавила Апостолска.

На оваа конференција, Апостолска информирала дека стратешката цел на Владата е финализирање на оската Исток-Запад, конкретно железничките делници на Коридорот 8, што е заеднички приоритет за сите земји во регионот, а кој ги поврзува транспортните текови од Јадранското и од Јонското Море во Европа со Црното Море и со Азија.


Нема регионален развој без железничко поврзување


Скопје, 16 октомври, 2017 - 15:33 (META) 

Еврокомесарката за транспорт, Виолета Булц, која денеска учествува на „Самит 100“, на средбата со министерот за транспорт и врски, Горан Сугарески, порачала државите од Западен Балкан повеќе да се поврзат железнички и да ги искористат парите од ЕУ за таа намена.

Сугарески информираше дека темата на разговор била да се забрза железничкото поврзување помеѓу Македонија и Бугарија, за кој се одвоени 70 милиони евра по потпишувањето на Договорот за транспортна заедница. Исто така, важно е да се искористат финансисиите што се на располагање за железничката  делница Битола – Кременица за поврзување со Грција.

Крајниот рок за комплетно железничко поврзување со соседна Бугарија е од 2025 до 2027 година.

Еврокомесарката Булц порача дека без меѓугранично транспорно поврзување, не е можно да се развива заедничката економска средина на шесте држави од Западен Балкан. Таа гледа посветенот кај сите министри за транспорт од регионот по потпишување на Договорот за транспортна заедница што следеше по десетгодишни преговори.

– Инвестициите во инфраструктурата се многу значајни бидејќи секој процент вложен во инфраструктурата значи 2,4 проценти потенцијален пораст на БДП во наредните четири години. Затоа инвестициите во инфраструктурата се битни за сите држави од Западен Балкан и се надевам дека наскоро ќе видиме некој резултат покрај потпишувањето на договорот – рече Булц.


Булц: Поврзувањето на регионот е клучно за влез на земјите од Западен Балкан во ЕУ


Скопје, 16 октомври, 2017 - 12:26 (META) 

Западен Балкан има пореални можности за влез во Европската Унија во однс на изминатите 10 години, порача еврокомесарката за транспорт, Виолета Булц, која имаше специјално обраќање на „Самит 100“ за бизнис-лидери на Југоисточна Европа, што се одржува во Скопје.

Таа рече дека ЕУ има стратегија за проширување и тоа треба да биде голем мотив за земјите од Западен Балкан.

– „Самит 100“ е од клучно значење за регионот за поврзување на државите. Направете единствена плафрома на која ќе ги споите политичарите и бизнисмените, поставете ги приоритетите и работете на нив. Резултатите ќе будат неизбежни. Однесувајте се како да сте веќе членки на ЕУ – порача Булц.

Еврокомесарката за транспорт зборуваше за значењето на транспортот и за инфраструктурната поврзаност на регионот. Во тој поглед, таа нагласи дека целта на ЕУ е декарбонизација, односно намалување на загадувањето со јаглерод диоксид. Најави дека во ЕУ во ноември ќе се донесат девет закони поврзани со транспортот и со загадувањето.

На државите од регионот таа им порача да создадат поефикасен јавен превоз бидејќи, како што кажа, богатите држави и богатите луѓе користат јавен превоз.

– Губиме илјадници животи и финансиски средства поради загадувањето на животната средина. Во ЕУ се губат по 20 милијарди евра годишно како резултат на негативните последици од загудувањето. Илјадници животи се губат како последица, исто така, на загадувањето и на бучавата – рече Булц и додаде дека поради сето ова следува период на декарбонизација на транспортот.

Таа порача државите од регионот да инвестираат во електрификација пред да влезат во ЕУ, бидејќи оваа тема не познава граници.

Зелена енергија, односно електрификација на регионот, позната уште и како „Проект Едисон“, е една од главните теми на овој „Самит 100“, кој денеска и утре првпат се одржува во Скопје.


Заев во Софија договара заеднички енергетски проекти и ново поврзување на гасоводите


Софија, 21 јуни, 2017 - 13:56 (META) 

Во наредните седмици Македонија и Бугарија ќе договараат меморандум за развој на енергетиката, а се разговара и за изградба на ново поврзување меѓу гасоводот на Бугарија и македонскиот гасовод. Тоа се две од побитните работи за кои во Софија денеска разговарале македонскиот премиер Зоран Заев и Теменушка Петкова, министерка за енергетика на Република Бугарија.

На средбата, која се одржа на вториот ден од посетата на дел од македонската влада на Бугарија, покрај владина делегација биле и претставници на Бугарската асоцијација за гас.

На средбата било констатирано дека кај двете земји има подготвеност за заеднички проекти, за кои Македонија и Бугарија заеднички ќе бараат пари од ЕУ-фондовите.

Премиерот Заев, претходно, на брифингот со новинарите, истакна дека Република Македонија и Република Бугарија со средбите на највисоко ниво, со премиерот Бојко Борисов и со претставници на владино и на државно ниво во Софија, отвораат „ново златно поглавје“ во меѓусебната соработка.

Заев ја заврши посетата на Бугарија со средба со претседателката на бугарската опозициска партија БСП, Корнелија Нинова, која исто така ги поддржала реформските процеси и евроатлантските аспирации на Македонија, соопштија од службата за информирање при македонската влада.


ССК учествуваше на форумот „Еден појас, еден пат“ во Пекинг


Пекинг, 15 мај, 2017 - 12:27 (META) 

Сојузот на стопански комори на Македонија (ССК) промовираше договор во рамки на членството во Интернационална трговска комора на Патот на свилата (Silk Road Chamber of International Commerce – SRCIC), која има цел и работи на промовирање на кинескиот проект за инфраструктурно и за економско поврзување на Азија, Европа, Африка и на Блискиот Исток.

„Со ова и официјално се отвараат нови можности за македонските компании преку Сојузот на стопански комори за учество во транснационалното поврзување, како и унапредување на трговската и на инвестициската соработка. ССК и SRCIC ќе работат на просперитет на своите членови, нудејќи им можности за трговија и за инвестиции“, информираат од Комората.

Кинеската иницијатива има цел да ги поврзе нациите преку инфраструктура.

Кинескиот претседател вети 124 милијарди долари за иницијативата што треба да ја поврзе Кина со Африка, Азија и со Европа преку мрежа од пристаништа, пруги, патишта и од индустриски зони.

На форумот „Еден појас, еден пат“ учествува и рускиот претседател, Владимир Путин, како и генералниот секретар на ОН, Антонио Гутереш, и претставници од повеќе од 100 држави.


Шест земји од Западен Балкан во Сараево разговараат за економско поврзување


Сараево, 11 мај, 2017 - 14:06 (META) 

Агендата за регионалната економска интеграција е тема на состанок на претставници на шест земји од Западен Балкан, меѓу кои и Македонија, како една од последните подоготовки пред самитот планиран за јули годинава во Трст, соопшти Регионалниот совет за соработка (РСС).

Средбата на која учествуваат претставници од повеќе министерства и претставници на премиерите на земјите од Западен Балкан е организарана од РСС, од Европската комисија (ЕК) и од ЦЕФТА.

Се разгледува консолидиран преглед на клучните регионални економски иницијативи кои се, пред сè, насочени кон зголемување на економскиот пораст и на конкурентноста на регионот.

„Успешното намалување на цената на роамингот, напредокот во олеснувањето на трговијата и на транспортот, вмрежувањето во приватниот сектор, работата на изградбата на регионалната туристичка понуда, се некои од бројните области што докажуваат дека заедничките регионални напори носат дополнителна вредност – изјави Горан Свилановиќ, генерален секретар на РСС.

Бернард Брунет од Дирекцијата за соседство и за проширување на Европската комисија, изјави дека Брисел исклучително ги поддржува напорите на шесте земји од Западен Балкан за продлабочување на регионалната соработка.

„ЕК се надева дека на претстајниот самит во Трст ќе се усвои амбициозен акциски план“, изјави Брунет.

На работилницата присуствуваат високи претставници од министерства задолжени за трговија, инвестиции, труд, образование и за ИТ-секторите, исто како и претставници од министерствата за надворешни работи и од кабинетите на премиерите на Албанија, БИХ, Косово, Македонија Србија и на Црна Гора.

Регионалниот совет за соработка е меѓувладино тело на земјите членки на Процесот за соработка во Југоисточна Европа, каде што полноправна членка е и Република Македонија.


Азески: Од ЕУ ни треба помош за владеење на правото, корупцијата и за инфраструктурата


Белград, 10 март, 2017 - 10:02 (META) 

„Инфраструктурата останува најголем приоритет, бидејќи таа е основа на сите приказни околу регионалниот развој и пораст, а ние на тој план многу малку имаме направено. Најмногу имаме направено на планот на автопатиштата, најмалку за инфраструктурата на железницата, а и гасификацијата мора да остане голем приоритет,“ изјави претседателот на Стопанска комора на Македонија, Бранко Азески, на бизнис-форумот на Копаоник.

Според него, друга работа е прашањето на владеењето на правото во регионот и неговата хармонизација, бидејќи на тој план се наоѓаме во правен хаос.

„Трета работа која логично произлегува од првите две се парите. Ние немаме повеќе можности да се задолжуваме бидејќи го достигнавме максимумот, а се сомневам и во волјата на инвеститорите во вакви околности да инвестираат. Поради тоа неопходно е да побараме помош од Европската Унија, особоено на прашањата за инфраструктурата, владеењето на право, прашања околу корупцијата, како повторно би биле атрактивни за инвестирање“, додаде Азески.

На традиционалниот бизнис-форум на Копаоник, кој годинава се одржа од 7 до 9 март, учествуваа повеќе од 1.000 учесници, високи државни функционери и влијателни бизнис-лидери, кои ја разгледуваа програмата за реформи, не само во Србија, туку и во регионот.