!На 1 февруари 2017 година, заврши промотивниот период на слободно користење на содржините на „Мета“. Во периодот што претстои го воведуваме новиот систем за пристап и за претплата. За начинот на пристап и за претплатата ќе информираме дополнително

Г.г. Стефан: Тешко ги договараме работите од национален и државен интерес


Тетово, 21 април, 2017 - 14:16 (META) 

Поглаварот на Македонската православна црква – Охридска aрхиепископија, г.г. Стефан, по служењето на архиерејската литургија во црквата „Пресвета Богородица“ во Тетово, по повод празникот Источен Петок, во својата беседа повика на обединување на македонскиот народ и на заштита на државните интереси.

– Ние, но особено други забележале дека сме добродушен, кроток, гостопримлив народ. За други сме подготвени да дадеме сè што имаме и лебот од устата да го поделиме. Тоа е поради христијанското во нас. Но, сосема сме други кога се во прашање меѓусебни односи, македонските односи и работи. Тешко меѓу нас ги договараме работите од национален и од државен интерес. Го гледаме најпрвин личниот или партискиот интерес – порача пограварот на МПЦ – ОА, г.г. Стефан.


Петар Рупев од населбата Варош го фати крстот во Охрид


Охрид, 19 јануари, 2017 - 10:59 (META) 

Петар Рупев, од охридската населба Варош, беше најсреќниот кој прв стигна до крстот во осветеното Охридско Езеро. За централната манифестација по повод празникот Богојавление – Водици во Охрид, беа пријавени околу 300 лица, на кои не им пречеа студените води на езерото, од само 6 Целзиусови степени.

На Рупев, кој по четврти пат го фаќа крстот, црквата му подари крст, а од градоначалникот на општина Охрид, Никола Бакрачески, доби икона.

На оваа масовна црковно-народна манифестација, присуствуваа неколку илјади посетители, од другите градови во земјава, како и од регионот, пред сè, од Бугарија, Албанија, Грција и од Србија.

На богојавленските чествувања во Охрид присуствуваа и претставници на дипломатскиот кор во земјава.

Организатор на прославата годинава е посебно координативно тело, составено од претставници на локалната власт, Македонската православна црква – Охридска архиепископија и од други здруженија и институции кои помагаа во организацијата.

Црвениот крст, традиционално, денеска ќе организира масовна акција за дарување крв, а нивните екипи ги посетија и социјално загрозените лица, на кои им однесоа помош во храна и во облека.

И оваа година дел од угостителите и од хотелиерите во Охрид, по повод празникот, ги намалија цените на услугите за 10 до 15 отсто.


Православните верници денеска го слават празникот Богојавление – Водици


Скопје/Охрид, 19 јануари, 2017 - 10:07 (META) 

Православните верници денеска го слават празникот Богојавление – Водици, поврзан со крштевањето на Исус Христос во водите на реката Јордан од страна на Јован Крстител. Празникот, кој уште се нарекува Водици поради големото осветување на водите што го извршува црквата на овој ден, се празнува уште од вториот век од нашата ера.

На овој ден, традиционално во реките се положуваат крстови. Оној што ќе го фати светиот крст се верува дека ќе го следи среќа и благослов во текот на целата година.

Како и претходните години, најмасовна посетеност на манифестациите по повод Богојавление – Водици се очекува да има во Скопје и во Охрид. Во Скопје за учество на манифестацијата „Водици 2017“ се пријавени повеќе од 100 граѓани, а кум е сопственикот на ресторанот „Стара куќа“, Димитриј Јовановиќ.

Централната манифестација ќе се одржи напладне, кога архиепископот охридски и македонски г.г. Стефан ќе го положи крстот во реката Вардар од мостот Слобода. Претходно, од 9 часот, поглаварот на Македонската православна црква – Охридска архиепископија ќе богослужи Златоустова литургија во црквата „Рожденство на Пресвета Богородица“.

Утринава во сите православни храмови во Охрид се служеа богослужби, по што литиите се упатија кон градското пристаниште, каде во 10 часот ќе бидат осветени езерските води и ќе биде фрлен Светиот крст. Во водите на Охридското Езеро треба да влезат повеќе од стотитина граѓани.

– За оној што ќе го фати светиот крст ќе следуваат скромни подароци. Црквата ќе му подари крст, а од страна на локалната самоуправа ќе добие икона – вели претставникот од Дебарско-кичевската епархија, отец Илија Ристески.

За празникот во Охрид допатуваа бројни гости, во најголем дел од земјава и од регионот, пред сè, од Бугарија, Албанија, Грција и од Србија.

Најавено е на богојавленските чествувања во Охрид да присуствуваат и претставници на дипломатскиот кор во земјава, меѓу кои и евроамбасадорот Самуел Жбогар.

Градоначалникот на Охрид, Никола Бакрачевски, вели дека и годинава, како и минатата, манифестацијата е во организација на општинските служби и јавни претпријатија, а покрај нив се вклучени и сите здруженија и институции кои постојано помагаат околу настанот, меѓу кои општинскиот Црвен крст, Нуркачкиот центар „Амфора“, Капетанија и СВР од Охрид.

Бакрачевски ги повика граѓаните масовно да се вклучат во одбележувањето на празникот, а туристичките работници подготвено да им излезат во пресрет на барањата на бројните гости за празникот Богојавление – Водици.


Државниот врв денеска на традиционален божиќен ручек кај г.г. Стефан


Скопје, 9 јануари, 2016 - 9:59 (META) 

Поглаварот на Македонската православна црква – Охридска архиепископија (МПЦ – ОА), г.г. Стефан, по повод празнувањето на архиѓаконот и првомаченик Свети Стефан и трет ден Божиќ, денеска ќе приреди традиционален божиќен ручек за државниот врв.

Како што е најавено, на божиќниот ручек ќе присуствуваат претседателот на Република Македонија, Ѓорге Иванов, претседателот на Собранието, Трајко Вељаноски, и премиерот Никола Груевски.