МПЦ ја покани БПЦ на 1.000 годишнината на Охридската архиепископија, СПЦ ќе слави посебно


Скопје, 11 мај, 2018 - 10:09 (META) 

Македонската православна црква – Охридска архиепископија (МПЦ-ОА) ја поканила Бугарската православна црква (БПЦ) на одбележувањето на 1.000 годишнината на Охридската архиепископија.

Поглаварот г.г. Стефан за бугарската агенција БГНЕС потврдува дека поканата е испратена до бугарскиот патријарх Неофит и до државниот врв на Бугарија за заедничко одбележување на 1000-годишнината од основањето на Охридската архиепископија.

Според најавите од МПЦ-ОА, 1000-годишниот јубилеј ќе биде одбележан со црковно-државни свечености во Охрид на 27 и 28 мај.

Српската православна црква (СПЦ), исто така ќе ја одбележи илјадагодишнината од основањето на Охридската архиепископија, се наведува во соопштението издадено по годишното заседание на Светиот архиерејски собор на СПЦ, што заврши вчера.

Во соопштението се вели дека одбележувањето ќе биде „во текот на оваа година, молитвено и достоинствено“.

Исто така, на соборот е поздравена правосилната одлука на Големиот совет на Европскиот суд за човекови права „со која се констатира дека власта на Поранешна југословенска Република Македонија ја прекршиле меѓународната конвенција за човечки права и за слободата на вероиспосвеста и совеста одбивајќи да ја регистрираат канонската Охридска архиепископија.


Саборот на СПЦ ќе расправа за МПЦ-ОА и односите со БПЦ


Белград, 2 мај, 2018 - 9:47 (META) 

Барањето на Македонската православна црква – Охридска Архиепископија (МПЦ-ОА) до Бугарската православна црква (БПЦ) да и биде мајка-црква, како и новата територијална организација на СПЦ што релативно ја засега и Македонија, се работите за кои ќе се дискутира на пролетното заседание на Светиот архиерејски сабор на Српската православна црква (СПЦ).

Синодот на СПЦ досега формално не се огласи за релациите МПЦ-ОА – БПЦ. Сепак, дел од владиците тоа го оценија како преседан во меѓуправославните односи наведувајќи дека и покрај спорот околу статусот, официјално мајка црква на МПЦ може да биде само СПЦ, пишува „Данас“.

Во однос на новата територијална организација, во предложениот нов Устав на СПЦ се предвидува ПОА на Јован Вранишковски да добие статус на „автономна црква во составот на СПЦ“, а нејзиното историско седиште од Охрид да се премести во Скопје. Според новиот предлог Устав, изборот на архиепископот ќе го потврдува српскиот патријарх.

Саборот почна вчера, а се очекува да трае неколку дена.

Светиот архиерејски синод на Македонската православна црква – Охридска архиепископија (МПЦ-ОА)  во март излезе со реакција во која беше наведено дека Предлог-текстот за промена на Уставот на Српската православна црква содржи хегемонистички аспирации и националистички претензии врз суверенитетот и независноста на Република Македонија, како и грубо мешање во јурисдикцијата на МПЦ-ОА.


Почнува Велигденскиот пост


Скопје, 19 февруари, 2018 - 10:17 (META) 

Од денеска до 7 април, во текот на седум седмици, православните христијани ќе ги одбележуваат Велигденските пости, со воздржување од мрсна храна, лошо однесување и лоши помисли. Вчера на Прочка, тие побараа простување еден од друг.

Македонските владици преку веб страници на епархиите со коишто управуваат, порачуваат поради различната состојба, односно има и болни и работници што работат тешка физичка работа, верниците да побаваат од свештениците да им одредат поблаги мерки на постењето.

Верниците што постеле, ќе се причестат на Велигден.


Православните верници го слават Богојавление – Водици


Скопје, 19 јануари, 2018 - 9:52 (META) 

Православните верници денеска го слават празникот Богојавление – Водици, поврзан со крштевањето на Исус Христос во водите на реката Јордан од страна на Јован Крстител. Празникот, кој уште се нарекува Водици поради големото осветување на водите што го извршува црквата на овој ден, се празнува уште од вториот век од нашата ера.

На овој ден, традиционално во реките се положуваат крстови. Оној што ќе го фати Светиот крст се верува дека ќе го следи среќа и благослов во текот на целата година.

Како и претходните години, најмасовна посетеност на манифестациите по повод Богојавление – Водици се очекува да има во Скопје и во Охрид. Во Скопје за учество на манифестацијата „Водици 2017“ се пријавени повеќе од 150 граѓани.

Централната манифестација ќе се одржи напладне, кога архиепископот охридски и македонски г.г. Стефан ќе го положи крстот во реката Вардар од мостот „Слобода“. Претходно, од 9 часот, поглаварот на Македонската православна црква – Охридска архиепископија ќе богослужи Златоустова литургија во црквата „Рожденство на Пресвета Богородица“.

Во Охрид во сите православни храмови ќе се служат, по што литиите ќе се упатат кон градското пристаниште, каде во 10 часот ќе бидат осветени езерските води и ќе биде фрлен Светиот крст.

По повод празникот, претседателот на државата Ѓорге Иванов упати честитка до поглаварот на Македонската православна црква – Охридска архиепископија, Архиепископот охридски и македонски, г.г. Стефан и до сите православни верници.

„Богојавление е симбол на духовното раѓање и новиот почеток во животот на верникот. Како симбол на новиот почеток, Богојавление треба да нè потсетува да не се навраќаме на старото, туку да се стремиме кон живот исполнет со љубов, понизност, милост и солидарност. Да се престигнуваме со добрина, и да го градиме нашето мултиетничко, мултирелигиско и мултијазично општество во мир, соживот и почитување на различноста“, се вели во честитката на Иванов.


Г.г. Стефан и патријархот Неофит: Едногласно одлучивме БПЦ да ѝ биде мајка црква на МПЦ


Софија, 21 декември, 2017 - 16:27 (META) 

Поглаварот на Македонската православна црква – Охридска архиепископија (МПЦ-ОА), г.г. Стефан денеска бил примен од патријархот на Бугарската православна црква (БПЦ) Неофит, јавува бугарската новинска агенција БГНЕС.

Станува збор за прва средба на поглаварите на двете цркви, откако БПЦ прифати да и биде мајка црква на МПЦ, како чекор кој треба да доведе до признавање на нејзината автокефалност.

Архиепископот Стефан бил придружуван од митрополитот на преспанско-пелагониската епархија, Петар, одговорен за надворешните односи на МПЦ-ОА.

– Не е лесен крстот кој бугарската црква го има, бидејќи досега ништо не е сторено за проблемот со македонската архиепископија. Ајде сега, со Божјата премудрост, учесниците во меѓуцрковната комисија да го донесат резултатот што го сакаме – изјавил бугарскиот патријарх Неофит во емисијата „Вера и општество” на бугарската телевизија.

Поглаварот на МПЦ, архиепископот Стефан се заблагодарил на сите во Бугарија кои ја поддржуваат желбата на МПЦ да добие признание за својата незавиност и истакнал дека писмото со барањето до БПЦ било едногласно прифатено од Синодот на Македонската православна црква.

– Писмото што го испративме до Бугарската патријаршија дека таа може да е наша црква-мајка едногласно е прифатено од нашиот Свет синод. Некои од соработниците можеби и имаат свое видување, но важно е што решава и вели мнозинството – изјави архиепископот Стефан.

Синодот на Бугарската православна црква – Бугарска патријаршија го прифати барањето да ѝ биде мајка црква на Македонската православна црква и да ја застапува пред помесните православни цркви.

Писмото со барањето од архиепископот на МПЦ- ОА, г.г. Стефан беше испратено од БПЦ на 9 ноември.


Владиката Наум: Барањето БПЦ да биде наша мајка црква е нормално, логично и потребно


Софија, 26 ноември, 2017 - 17:48 (META) 

Барањето на Македонската православна црква – Охридска архиепископија (МПЦ-ОА) да ја прифати Бугарската православна црква (БПЦ) како мајка црква е нормално, логично и потребно, пишува струмичкиот митрополит Наум во анализата за бугарската новинска агенција БГНЕС.

Митрополитот Наум во својата кратка анализа ја објаснува врската меѓу БПЦ и МПЦ-ОА, на ден пред БПЦ да го разгледува писмото од МПЦ.

„Барањето на МПЦ да ја прифати БПЦ како мајка црква, како услов за признавање на автокефалноста на МПЦ-ОА, е барање кое со години наназад го слушаме од некои бугарски архиереи. Ова барање МПЦ го смета за нормално, логично и потребно, затоа што некоја црква и така мора да се јави како мајка црква, која ќе нè извлече од изолацијата што ни е наметната од СПЦ (Српската православна црква) и која, потоа ќе нè заштитува, застапува и ќе нè претставува пред вселенскиот патријарх и пред другите православни цркви, а најприродно тоа може да биде само БПЦ. Мајка црква не е толку заедничко за минатото, колку што е заедничко за иднината во богочовекот Христос. Мајка црква е љубов“, пишува владиката Наум.

Тој објаснува дека од моментот кога БПЦ ќе ја признае автокефалноста на МПЦ-ОА, двете цркви стануваат „сестрински цркви“, што значи дека ќе бидат рамноправни. Но, улогата на БПЦ како мајка црква, пишува митрополитот Наум, тука не престанува во однос на другите православни цркви – БПЦ и понатаму ја има честа да ја претставува пред другите православни цркви сè додека МПЦ не го добие „томосот за автокефалност“.

Според владиката, воспоставување на евхаристичката заедница меѓу БПЦ и МПЦ-ОА е природна последица дури и на Договорот за пријателство и соработка меѓу Бугарија и Македонија и е во согласност со евроатлантските интеграциски процеси кон кои се стреми Македонија со помош на Бугарија.

„Во светот на глобализацијата, повеќе е веројатно дека ќе нè молат да влеземе во единство со православните цркви или дури и ќе нè натераат сосила, отколку и понатаму да бидеме изолирани. Во случај на брзо решавање на спорот што Грција го има со нашето име, сигурно ќе се реши и статусот на МПЦ, а БПЦ дури тогаш ќе сфати што, пред Бог, пропуштила“, пишува владиката струмички Наум во анализата за БГНЕС.


Димитров: Во преговорите со Грција ќе влеземе со добра верба и без страв


Скопје, 26 ноември, 2017 - 12:01 (META) 

Во преговори со Грција ќе влеземе со добра верба и без страв, во обид да се надминат разликите, вели шефот на македонската дипломатија, Никола Димитров, во неделното интервју на „Радио Слободна Европа“.

– Ако има победена страна, тоа нема да биде добро ниту за победникот, ниту за губитнкот, бидејќи ќе развие ужасен национализам. Мора да најдеме начин двете страни да излезат со чувство дека најважното го заштитиле. Нема да преговараме од страв и не можеме да излеземе со решение што нема да ни ги покрие главните грижи – вели Димотров.

Прашан до каде е подготвена да оди Владата во преговорите и дали ќе има реципроцитет при евентуална промена на имињата на автопатот, спомениците и ревизија на учебници, шефот на македонската дипломатија вели дека за ова прашање не разговарале во Владата.

– Мислам дека е клучно да разбереме дека патриотизмот значи грижа за државноста и дека е клучно да им ги одземеме аргументите на оние политички сили во Грција, коишто имаат интерес да ја држат блокадата. Во основа и во изјавата на Коѕиас имаше или барем имплицираше дека ова ќе биде двонасочен процес – вели Димитров.

Во врска со динамиката со која ќе се одвиваат преговорите, министерот за надворешни работи вели дека тоа ќе зависи од проценката на посредникот Метју Нимиц и од извештаите и престојните состаноци и самити на ЕУ и на НАТО, како и од изборните циклуси во Македонија и во Грција.

Димитров не сакаше да го коментира барањето на МПЦ-ОА до Бугарската православна црква да ѝ биде црква мајка, додавајќи дека тоа е прашање за црковните власти и за нивниот напор да се обезбеди автокефалноста.

– Можеби од ова отворање со Бугарија извлекле некаков импулс. Сепак би се воздржал да коментирам какви ќе бидат импликациите. Сепак е тоа работа на МПЦ – подвлече Димитров.


Заев и Борисов не сакаат да се мешаат – ги охрабруваат црквите да најдат решение


Струмица, 23 ноември, 2017 - 14:26 (META) 

Македонскиот и бугарскиот премиер, Зоран Заев и Бојко Борисов, денеска изјавија дека го почитуваат секуларниот карактер на двете држави и не сакаат да се мешаат во работата и во соработката на двете цркви, но оти можат да ги охрабрат да најдат решение во духот на добрососедството и на пријателството.

– Јас се надевам дека ќе дојде до меѓусебно признавање, бидејќи за нас како Македонска православна црква – Охридска архиепископија, автокефалноста е многу важна. Прашањето е меѓу двете цркви. Наше е да охрабриме да се најде решение во духот на Договорот за добрососедство и пријателство меѓу двете земји – рече Заев, одговарајќи на новинарско прашање во врска со писмото што Македонската православна црква го упати до Бугарската православна црква.

И бугарскиот премиер, Борисов, истакна дека не сакаат да се мешаат во работите на црквите, но додаде дека ќе бидат среќни доколку двете цркви соработуваат и меѓусебно си помагаат, како што Македонија и Бугарија соработуваат на политички план.

Борисов упати благодарност до владиката Наум и до другите владици што денеска ги пречекаа двете државни делегации во манастирот „Водоча“ во Струмица.


Национална петиција во Бугарија за поддршка на БПЦ да ѝ биде мајка црква на МПЦ-ОА


Скопје, 22 ноември, 2017 - 21:29 (META) 

Во Бугарија почнала национална петиција за јавна поддршка на Бугарската православна црква да прифати да ѝ биде мајка -црква на Македонската православна црква – Охридска архиепископија (МПЦ-ОА), јавува бугарската новинска агенција БГНЕС.

Петицијата почнала неколку часа откако десетици истакнати јавни личности, научници, новинари и потомци на видни семејства од Македонија ја повикале Бугарската патријаршија „да ја прифати подадената рака на Македонската архиепископија“.

Според агенцијата, петицијата е поддршка на писмото, кое било упатено до бугарскиот патријарх Неофит и до Светиот синод, а текстот е отворен за поддршка од сите што сакаат.

„Како луѓе кои одамна ги следиме развојот на проблемот со македонската црковна независност, исто така сме свесни дека Бугарската патријаршија има свои основи, категорично да ја нагласи историската вистина за потеклото на Македонската православна црква – Охридска архиепископија, како и за нејзиното егзархиско наследство. Без подвигот на нашите предци, вклучувајќи ги од Вардарска и Беломорска Македонија, кои постигнаа црковна независност за поголемиот дел од православните Бугари на Балканот во 19 век, денес не би постоеле ниту Бугарската патријаршија, ниту Македонската архиепископија, која се јавува како наследник на македонските епархии на Бугарската егзархија. Добро е да потсетиме на општо познатиот факт дека Охридската архиепископија е создадена во 1018 година од царот Василиј Втори Бугароубиец на местото на Бугарската патријаршија, која тој ја уништил, а титулата на нејзиниот владика била архиепископ на Охрид и на цела Бугарија“, пишува во обраќањето до бугарскиот патријах Неофит и до Светиот синод.

Писмото на Светиот синод на Македонската православна црква беше испратено на 9 ноември 2017 година и во него се изразува подготвеност Бугарската патријаршија да биде признаена како нејзина мајка црква.


Агатангел: Синодот не беше едногласен за писмото до БПЦ, јас се спротивставив


Велес, 21 ноември, 2017 - 15:21 (META) 

Владиката Агатангел, кој е на чело на Повардарската епархија, денеска преку соопштение изрази несогласување со писмото на Синодот на МПЦ-ОА упатено до Синодот на Бугарската православна црква, со кое се бара БПЦ да се прогласи за мајка црква на МПЦ.

Тој вели дека се спротивставил во Синодот на таквиот потег, односно дека тезата за мајка црква „има цел да го затне изворот и да го затрупа бунарот од кој нашиот народ се напива веќе два милениуми“ и ги прашува своите колеги како може да се нарекуваат духовни водачи ако го разнебитуваат народот.

„Денес може некој ќе успее да го покрие македонското национално чувство, но сигурен сум дека нема да може да ја избрише библиската и свештената историја на македонскиот народ. Македонците го примиле христијанството уште од апостолско време и за ова имаме бројни примери во Новиот завет на Светото писмо, па затоа е апсурдно да се тврди дека некој ќе нè роди во иднина. Нашите великодостојници и интелектуалци кои ја промовираат оваа теза пред петнаесетина години на истиот начин и со истите методи го бранеа Нишкиот договор. Не можеш да бидеш духовен и национален водач ако го повредуваш, понижуваш и го разнебитуваш народот, тогаш го промашуваш основниот принцип на духовноста“, се вели во соопштението од владиката Агатангел, објавено на веб-страницата на Повардадската епархија.

Тој писмото до БПЦ го гледа како продолжение на Договорот за добрососедство меѓу Македонија и Бугарија и смета дека со двете постапки Македонија си наметнува улога на поразен во војна.