Шекеринска: Убедени сме дека до Самитот на НАТО ќе обезбедиме поддршка од сите членки


Скопје, 22 јуни, 2018 - 14:22 (META) 

Министерката за одбрана Радмила Шекеринска е убедена дека на Самитот на НАТО, што треба да се одржи на 11 и 12 јули во Брисел Македонија ќе ја обезбеди поддршката од сите членки на Алијансата за да ја добие поканата за членство. Според Шекеринска, земјава исполнила големи домашни задачи, што, според неа, се силни аргументи во полза на нашето членство во Алијансата.

– Доколку тоа се случи, мислам дека и во поглед на Македонија ќе се почитува процедурата која важи и за другите земји членки и оти тој период би бил од една до една и пол година, во зависност од тоа каква е процедурата во државата и во земјите членки – рече Шекеринска, одговарајќи на новинарско прашања по потпишувањето на договор за времено користење на простории во Домот на АРМ од страна на Сојузот на борците од НОБ и антифашистичката војна на Македонија.

Во врска со тоа дали референдумот што би се организирал би бил консултативен или обврзувачки, министерката за одбрана посочи дека за ова ќе се прават консултации во Собранието и со опозицијата и ќе биде донесена одлука која ќе биде добра, не за поединечни политички партии или личности, туку за Македонија.

– Референдумот ќе биде важен дел и ќе ги поканиме, не политичарите, туку граѓаните на оваа држава сите да се вклучат и да дадат поддршка на европска и евроатланска Македонија – рече Шекеринска.

Според неа, за она што го сработила Владата и за позитивните промени сведочи и вчерашната одлука на Холандија, која како што рече е најстрога членка, во однос на исполнувањето на критериумите за членство да даде поддршка за одредување датум за почеток на преговорите.


Почнува расправата за новата стратегија за национална сајбер-безбедност


Скопје, 12 јуни, 2018 - 11:53 (META) 

Министерството за информатичко општество и администрација, Министерството за одбрана и Министерството за внатрешни работи заеднички изготвиле работна верзија на Националната стратегија за сајбер безбедност на Република Македонија. Расправата веќе почна по електронски пат, преку давање предлози, препораки и коментари на електронската адреса cyber_security@mioa.gov.mk, а утре ќе се одржи и првиот јавен настан од овој процес.

Во Клубот на пратениците во Скопје, со почеток во 10 часот, ќе се одржи првата јавна расправа на која ќе биде презентирана стратегијата. На настанот ќе бидат министерот за информатичко општество и  администрација, Дамјан Манчевски, министерката за одбрана, Радмила Шекеринска и министерот за внатрешни работи, Оливер Спасовски.

Во нацртот на 38 страници, се посочува дека е голема потребата од нов пристап кон сајбер-безбедноста, бидејќи постои огромна неподготвеност за справување со сајбер-заканите и кај граѓаните и кај фирмите, а заканите се сè побројни. Наспроти тоа, има недостиг на експерти и огромен проток на информации кои излегуваат од граѓаните или фирмите или доаѓаат до нив, и затоа стратегијата предвидува значително зголемување на капацитетите за заштита на податоците од лица и други субјекти со криминални намери со користење државни пари за развивање соодветна одбрана.

Според стратегијата, во првиот квартал на 2017 година, 73,6 отсто од домаќинствата имале пристап до интернет, а кај фирмите со 10 или повеќе вработени таа бројка била 91,2 отсто. Тоа наметнува потреба од подобро запознавање на корисниците со мерките на заштита, посебно во фирмите, од кои дел извршуваат работи за државата, па ризиците што ги имаат тие фирми значат и ризици од загрозување на податоци на државата. Исто така, се позастапен е и Интернет на нештата, односно поврзување на најразлични уреди на интернет, коишто може да бидат нападнати и така да се загрози не само нивното функционирање, туку и безбедноста на нивните сопственици.

Стратегијата за сајбер-безбедност предвидува засилени меѓусекторски мерки за справување со заканите, преку пет мерки. Тоа се зголемување на сајбер отпорноста и зголемување на сајбер-капацитетите, посодветна борба со сајбер-криминалот, потоа засилување на сајбер-одбраната и поголема соработка на институциите.

Исто така, предвидено е формирање на Национален совет за сајбер-безбедност и, како самостоен орган, Тело со оперативни капацитети за  сајбер-безбедност.


Владата ќе го разреши Џејсон Мико од почесен конзул


Скопје, 27 февруари, 2018 - 15:20 (META) 

На предлог на Министерството за надворешни работи, се очекува Владата  да го разреши Џејсон Мико од позицијата почесен конзул на Македонија во Тусон, Аризона, САД, на која беше именуван во 2013 година, дознава БИРН.

Неговиот ангажман за власта на ВМРО-ДПМНЕ вклучуваше консултантски услуги за кои бил платен од  буџетот. БИРН дошла до два договора со кои Министерството за одбрана го ангажира Мико во 2015 и 2016 година за интелектуални услуги во вкупна вредност од  17.875 американски долари.

Пред да биде платен од буџетот, Мико беше и лобист за ВМРО-ДПМНЕ. Според документите заведени на Американската агенција за регистрација за странски соработници – ФАРА, ВМРО-ДПМНЕ за 7.500 долари месечно го ангажирала Џејсон Мико да дава консултантски услуги непосредно пред изборите на 5 јули 2006 година, на кои партијата дојде на власт.

Џејсон Мико во текот на целото време на владеењето на ВМРО-ДПМНЕ пласираше ставови многу сродни со партијата. Во последните десетина години беше посебно активен и на социјалните мрежи.

Со буџетски пари сме го плаќале за да пишува на „Твитер“ против американскиот амбасадор во земјава Џес Бејли, но и за мешање во внатрешните одлуки на администрацијата на САД.

Од доаѓањето на власт на Доналд Трамп, Мико беше посебно критичен кон Бејли. Во еден твит од крајот на ноември минатата година, тој дури го повикуваше да се покае поради „неговата непријателска работа кон Македонија“ за да биде спасен од Господ!

Речиси еден месец подоцна, во декември минатата година, напиша и дека Бејли го саботира спроведувањето на политиките на претседателот на САД, Трамп, поради тоа што има дијаметрално спротивни ставови од неговите.


Десет тенкисти на АРМ ќе се обучуваат во Бугарија следната година


Струмица, 24 ноември, 2017 - 10:12 (META) 

Министрите за одбрана на Македонија и на Бугарија, Радмила Шекеринска и Красимир Каракачанов, вчера, во рамките на заедничката седница на двете влади, во Струмица потпишаа аранжман за соработка за обука на војници и на подофицери – возачи и механичари на тенк Т-72, соопшти денеска Министерството за одбрана.

Според аранжманот, 10 припадници на Армијата на Република Македонија следната година ќе бидат обучени за возачи и за механичари на тенкот Т-72 во тренинг-центарот за специјалисти во Сливен, Бугарија.

„Потпишувањето на аранжманот, како и двата договори за соработка во областа на военото воздухопловство и на лабораториските анализи на специјални горива, потпишани за време на неодамнешната официјална посета на министерката Шекеринска на Бугарија, се пример за новата енергија во соработката помеѓу двете земји, која е во духот на европските и на евроатлантските вредности“, стои во соопштението на Министерството за одбрана.


Шекеринска на министерски состанок на земјите членки на НАТО во Брисел


Скопје, 8 ноември, 2017 - 16:50 (META) 

На покана на генералниот секретар на НАТО, Јенс Столтенберг, министерката за одбрана, Радмила Шекеринска, утре во седиштето на НАТО во Брисел ќе учествува на состанок на министрите за одбрана на земјите членки на НАТО и на земјите – придонесувачи во мисијата „Одлучна поддршка“.

Шекериска, како што информираат од Министерството, ќе учествува и на состанокот со министрите од земјите кои се дел од регионалната команда Север, предводен од германската министерка за одбрана, Урсула фон дер Лејен.

Во рамки на посетата, Шекеринска ќе се сретне и со помошникот на генералниот секретар на НАТО за планирање и политика, Хајнрих Браус, и со помошникот на генералниот секретар за политички односи и за безбедносна политика, Алехандро Алваргонзалес.


Шекеринска – Јелениевски: Да се прошири воената соработка меѓу НАТО и АРМ


Скопје, 5 октомври, 2017 - 16:05 (META) 

Министерката за одбрана, Радмила Шекеринска, денеска имала средба со воена делегација на НАТО, предводена од бригадниот генерал, Маријан Јелениевски, заменик-директор на секторот за безбедносна соработка на Алијансата. На средбата, како што соопшти Министерството за одбрана, било разговарано за продлабочување на соработката меѓу НАТО и Армијата на Република Македонија (АРМ).

Генералот Јелениевски на средбата истакнал дека засилената политичка активност на Македонија кон НАТО треба да се поддржи со поблиска воена соработка и понудил три предлози за зголемување на соработка помеѓу воената структура на НАТО и АРМ, односно разговори на експертско ниво меѓу НАТО и АРМ еднаш годишно, редовен годишен состанок на Воениот комитет на НАТО со АРМ и подобра репрезентација на АРМ во НАТО-структурите преку испраќање национален воен претставник од Македонија во Сојузната команда на НАТО и пополнување на позиции за партнерски штабни офицери во воените команди на НАТО.

Шекеринска рекла дека Министерството за одбрана и Владата даваат „не само поддршка, туку и силен поттик на предлозите за подобра воена соработка“.

„Верувам дека без соработка на Министерството за одбрана и АРМ нема да има прогрес, а поблиската соработка на НАТО и на АРМ може да биде само од корист и за членството на Македонија во НАТО и за подобрување на статусот на Армијата“, рекла Шекеринска.


Шекеринска на 27 септември во посета на НАТО во Брисел


Брисел, 16 септември, 2017 - 16:18 (META) 

Министерката за одбрана, Радмила Шекеринска, на 27 септември ќе го посети седиштето на НАТО во Брисел, каде ќе има средба со генералниот секретар на алијансата, Јенс Столтенберг.

Генералниот секретар на НАТО со писмо ја информирал Шекеринска дека Aлијансата го прифатила барањето на Владата, Македонија да биде дел од програмата на НАТО за унапредување на образованието во одбраната, а во дописот тој наведува и дека со нетрпение ја очекува посетата на министерката за одбрана на седиштето на НАТО.

„Со нетрпение ја очекуваме нашата засилена соработка и продолжувањето на нашата дискусија за време на вашата посета на седиштето на НАТО во Брисел на 27 септември“, стои во писмото од Столтенберг до Шекеринска, соопшти Министерството за одбрана.

Во врска со приклучувањето на Македонија во програмата на НАТО, Столтенберг навел дека во следниот период тим од секторот за политички прашања и за безбедносна политика на НАТО ќе организира студиска посета на Македонија за утврдување на поддршката која е потребна.

„Врз основа на успехот на програмата досега, убеден сум дека таа ќе ги зајакне вашите институции за образование во одбраната, особено вашата Воена академија. Образованието е критичен фактор на трансформација и нашата соработка во оваа област ќе ги поддржи и ќе ги унапреди вашите напори за реформи во одбраната“, стои во писмото од генералниот секретар на НАТО.

Програмата за унапредување на образованието во одбраната, како што информираат од Министерството за одбрана, е „моторот зад реформите во одбраната на земјите во развој и на нивните професионални воено-образовни институции“.

Македонија првпат добива пристап до оваа програма на НАТО.


Британија ќе помага со стратегијата за реформи во одбраната и членство во НАТО


Скопје, 29 август, 2017 - 15:49 (META) 

Стратешкиот одбранбен преглед, кој е клучен документ за водењето на одбранбените реформи и за членството на Македонија во НАТО, треба да биде готов до средината на следната година. Министерката за одбрана, Радмила Шекеринска, за ова на денешната средба го информирала советникот за одбрана и безбедност во Одделот за стабилизација на Велика Британија, Стивен Гловер, кој е во дводневна посета на Македонија.

На средбата, на која присуствувале и амбасадорот на Британија во земјава, Чарлс Герет, и одбранбеното аташе, потполковник Ричард Пери, биле разменети мислења и искуства поврзани со изработката на новиот стратешки одбранбен преглед, а станало збор и за можностите за поддршка во изработката на овој исклучително важен документ за одбраната, од страна на Обединетото Кралство.

„Британскиот советник за одбрана изрази подготвеност и интерес за советодавна поддршка од британска страна на овој важен реформски процес. Тој воедно ги истакна и британските искуства и научени лекции во поглед на изработка, но и имплементација на стратегиските одбранбени прегледи“, стои во соопштението за средбата.

За време на посетата на Македонија, се додава во соопштението од Министерството за одбрана, Гловер ќе се сретне и со високи претставници од кабинетот на премиерот Зоран Заев, задолжени за одбраната и за безбедноста, а средба ќе има и со претседателот на Комисијата за одбрана и безбедност во Собранието на Република Македонија, Максим Димитриевски.


Војниците бараат откако ќе наполнат 45 години да работат во МВР


Скопје, 23 август, 2017 - 15:57 (META) 

Професионалните војници бараат откако ќе наполнат 45 години старост да бидат прераспоредени од Министерството за одбрана во Министерството за внатрешни работи.

Ова било тема на денешната средба на министерот за внатрешни работи, Оливер Спасовски со претставници на Независниот синдикат на професионалните војници.

„Претставниците од Независниот синдикат му го образложија своето барање на министерот Спасовски. Тие се повикуваат на членот 40 од Законот за служба во Армијата на Република Македонија, според кој професионалните војници со навршување на 45 години може да бидат прераспределени во други институции. Во конкретниот случај, од Независниот синдикат бараат превземање од Министерството за внатрешни работи, односно граничната полиција“, стои во соопштението на МВР.

Спасовски на состанокот рекол дека барањето на синдикатот ќе го отвори на седница на Владата.


Иванов и Шекеринска ќе говорат на свеченоста за Денот на АРМ


Скопје, 17 август, 2017 - 18:41 (META) 

Централната свеченост по повод одбележувањето на 25-годишнината од формирањето на Армијата на Република Македонија (АРМ) ќе се одржи утре на воениот стадион во Градскиот парк во Скопје. Според протоколот, на свеченоста, која ќе почне во 19 часот, свои обраќања ќе имаат претседателот на државата, Ѓорге Иванов и министерката за одбрана, Радмила Шекеринска.

Претседателот Иванов ќе додели одликувања на командата за обука и доктрини, баталјонот за почести и четвртиот механизиран пешадиски баталјон од првата механизирана пешадиска бригада.

На свеченоста, како што информираат од Министерството за одбрана и Генералштабот на АРМ, ќе присуствуваат највисоки претставници од сите државни институции, локални самоуправи, амбасади во Македонија и граѓански здруженија.

Од касарната „Илинден“ во чест на Денот на АРМ и почетокот на централната прослава, ќе бидат истрелани 10 плотуни од артилериски орудија.

Во рамките на одбележувањето на 18 Август – Денот на АРМ, утре во 9 часот на градските гробишта во Бутел во Скопје, повеќе делегации со воени почести ќе положат венци со свежо цвеќе на партизанските гробишта, на гробот на загинатиот претседател Борис Трајковски, на гробот на поранешниот претседател Киро Клигоров и на гробот на генерал Михаило Апостолски.

На воениот стадион во Градскиот парк во Скопје ќе биде поставена целодневна изложба на борбени средства, техника и воена опрема на АРМ. Во текот на изложбата ќе бидат изведени и показни вежби од страна на припадниците на полкот за специјални намени, баталјонот за почести и центарот за обука и дресура на кучиња.