Шекеринска утре и задутре ќе учествува на Северноатлантскиот совет на НАТО


Скопје, 12 февруари, 2019 - 16:31 (META) 

Министерката за одбрана, Радмила Шекеринска утре и задутре (13-14 февруари) во Брисел ќе учествува на состанокот на Северноатлантскиот совет на НАТО на ниво на министри за одбрана, што е прво учество на министер од нашата земја на официјален состанок на Алијансата по потпишувањето на Протоколот за пристапување, информираат од Министерството за одбрана.

„Министерката во седиштето на Алијансата ќе има голем број билатерални средби и тоа со генералниот секретар на НАТО, Јенс Столтенберг, како и со министрите за одбрана на Велика Британија, Канада, Грција, Бугарија,  Белгија и Турција. Со учеството на министерката Шекеринска на состанокот на Северноатлантскиот совет, стануваме активен дел од Алијансата, а по процесот на целосна ратификација на пристапниот протокол, кој веќе заврши во грчкиот и во словенечкиот парламент, и официјално ќе имаме право на глас на сите состаноци на НАТО“, соопштуваат од МО.


Нема кој да крои капи за АРМ – никој не се пријавил на огласот


Скопје, 15 јануари, 2019 - 9:59 (META) 

Ниту една фирма не се пријавила на огласот на Министерството за одбрана за конфекционирање на капи и ветровки за маскирни теренски униформи за АРМ, објавен на 30 ноември лани. Поради тоа, Министерството минатата недела го поништило огласот.

Министерството за одбрана на 30 ноември лани објави оглас за конфекционирање на ветровки од ткаенина за воено теренска униформа во основна маскирна шара и на капи од ткаенина за воено теренска униформа во универзална маскирна шара. Вредноста на набавката, без ДДВ, била околу 2 милиона денари, од кои околу 1,8 милиони за ветровки, а околу 165.000 денари за капи. Набавката била деллива, а за обата дела на 21 декември требало да се одржат електронски јавни аукции.

Од фирмите се барало по спецификација на Министерството да сошијат околу 1.240 ветровки со влошки од 4.231 метар платно во маскирна шара што Министерството за одбрана ќе му го достави на конфекционерот, со обврска остатокот да го врати.

Во вториот дел од набавката, конфекционерот требало да сошие околу 1.500 капи за борбена униформа од 800 метри платно, доставено од Министерството за одбрана.

Конфекционерот готовите ветровки и капи требало да и ги испорача на АРМ во рок од 60 дена од добивањето на маскирната ткаенина.

АРМ до крајот на март треба да добие 14.000 комплети воено теренска униформа со договор што Министерството за одбрана го склучи на 25 декември. Со набавката, војската за околу 840.000 евра ќе добие комплети од капа, палто и панталони изработени по нејзина спецификација. Платното ќе го изработи и униформите ќе ги шие подизведувач, фирма од Турција.


Навалица од новогодишни државни тендери околу 31 декември


Скопје, 29 декември, 2018 - 8:20 (META) 

Министерства, агенции, здравствени установи, државни претпријатија и други буџетари очекуваат понуди по распишаните огласи за јавни набавки и на 31 декември, последниот ден од годината.

Забележително е дека станува збор за јавни набавки за кои огласите се распишани во последните десетина дена од декември, а за краен рок за доставување на понудите е определен последниот ден од 2018 година.

Така, неколку часа пред дочекот на Новата година во Министерство за одбрана – сектор за логистика очекуваат да пристигнат понудите по распишаниот тендер за набавка на софтвер за дигитална форензика. Огласот за набавката бил распишан на 24.12.2018, а за краен рок е определен 31.12.2018 во 10.30 часот.

Во Агенцијата за администрација на на 31.12.2018 година во 10 часот ќе ги очекуваат понудите по огласот за набавка на одржување на системот за снимање на полагањето и емитувањето во живо, кој бил распишан на 26.12.2018.

Секретаријат за спроведување на Рамковниот договор понудите за набавка на услуга перење, полирање и хемиско чистење на возила по огласот распишан на 24.12.2018 ќе ги очекуваат на 31.12.2018 во 11.00 часот.

АД Електрани на Македонија – Скопје очекува понуди по огласот за набавка на електричен алат на 31.12.2018 во 09 часот, а по оглас кој бил распишан на 26 декември.

Јавната здравствена установа Универзитетска клиника за дигестивна хиругија на 25 декември распишала оглас за набавка на услуга – изработка дизајн, лого, хостирање и одржување на веб-платформата за потребите на Клиника за дигестивна хирургија Скопје, а понудите ќе ги очекува на 31 декември во 10.30 часот.

ЈП Водовод и канализација – Скопје по огласот за одржување на клима уреди со вградување на резервни делови распишан на 20.12.2018 понудите ќе ги очекува на 31.12.2018 во 09 часот.

Општина Карпош, пак, распишала оглас за осигурување на имот и опрема за потребите на општината на 20.12.2018, а понудите ќе ги очекува на 31.12.2018 во 09 часот.


АРМ денеска купи 14.000 униформи за 60 евра по комплет – ќе ги добие во март


Скопје, 25 декември, 2018 - 13:14 (META) 

Министерството за одбрана денеска објави известување за склучен договор за јавна набавка на 14.000 комплети воено-теренска униформа.

По цена од околу 840.000 евра, АРМ до крајот на март треба да добие комплети од капа, палто и панталони изработени по нејзина спецификација. Набавката, чиј главен критериум била најниската цена, ја добила фирма од Штип, а платното и униформите ќе ги изработи фирма од Истанбул, Турција, како подизведувач, стои во договорот.

Министерството за одбрана огласот за оваа набавка го распишало на 18 септември, а сите пријавени биле обврзани да достават примероци за утврдување на квалитетот.

Набавката на униформи е дел од категоријата „стоки и услуги“ за која Министерството за одбрана догодина ќе има 30 милиони евра. Со тие пари војската треба да купи и чизми, храна, резервни делови, да плати обуки и школувања на припадниците на АРМ. Тоа е една од поголемите категории во армискиот буџет за 2019 година, кој, како што во ноември најави министерката за одбрана  Радмила Шекеринска, е за третина поголем од годинешниот.

– Минатата година одбранбениот буџет порасна за 15 отсто, а зголемувањето за 2019 во споредба со ребалансираниот буџет за 2018 изнесува над 33 отсто – рече Шекеринска.

Во буџетот за следната година, кој е околу 135 милиони евра, АРМ ќе има повеќе пари за опремување и модернизација. Оваа ставка од досегашните 10 е зголемена на 15 проценти, или на повеќе од 20 милиони евра. Со нив, како што најави министерката,  ќе се започне процесот на модернизација на Армијата, почнувајќи со единиците декларирани за учество во меѓународни операции.


Војниците со 45 години ќе може да се вработат во АРМ и MO како цивили без конкурс


Скопје, 21 декември, 2018 - 10:13 (META) 

Министерство за одбрана подготвува предлог-закон за дополнување на Законот за служба во Армијата на Република Македонија за решавање на статусни прашања на професионалните војници на кои работниот однос им престанал со навршување на 45 години возраст како и решавање на статусни прашања на лицата со посебни специјалности од особено значење за Армијата.

„Професиналните војници на кои им престанал работниот однос со навршување на 45 години возраст да можат да се вработат во Армијата на Република Македонија како цивилен пероснал и лицата со песебни специјалности од особено значење за АРМ да можат да се вработат во МО без објавување на јавен оглас, со спогодба за преземање од органот каде што претходно работеле“, се вели во образложението објавено на Единствениот национален регистар на прописи на Република Македонија.


И со зголемен буџет, на АРМ ќе и треба најмалку една деценија да се доопреми


Скопје, 30 октомври, 2018 - 10:31 (META) 

На АРМ ќе и требаат најмалку четири години за со најавените буџети, кои ќе се зголемуваат, да го купи само минималниот неопходен број на оклопни транспортери, а најмалку една деценија за да ја купи сета потребна опрема, покажуваат пресметките направени врз основа на постоечката формација на АРМ и проекциите на Министерството за финансии во Фискалната стратегија за 2019-2021 година.

Владата на седница на 25 септември ја прифати информацијата за планирање на опремувањето и модернизацијата на армијата на Република Македонија во предлог-буџетот на Министерството за одбрана за периодот 2019 – 2021 година.

„Приоритет во опремувањето и модернизацијата имаат декларираните сили за НАТО/ПзМ (Партнерство за мир) активности прифатени во рамките на НАТО Процесот на планирање и преглед (PARP), вклучително и Лесната пешадиска баталјонска група како најголема декларирана борбена единица со која Република Македонија придонесува во НАТО базенот на сили“, соопшти Владата.

По овој документ, Министерството за одбрана треба да почне да планира повеќе пари за опремување во буџетот за следната година, кој се подготвува. За опремување треба да бидат наменети 20 отсто од парите за одбраната.

Според Фискалната стратегија на Република Македонија за 2019-2021, министерството за финансии предвидува дека буџетот на одбраната, кој сега е 106 милиони евра, ќе расте по околу 200 милиони денари или 3,2 милиони евра годишно во следните три години. АРМ, според овие проекции, во следните три години ќе има околу 65 милиони евра за нова опрема од сопствениот буџет. Но, одбраната до 2024 година треба да добие двојно повисок буџет, кој треба да изнесува 2 отсто од бруто домашниот производ, со што за опремување ќе бидат наменети по околу 40 милиони годишно.

За да ја опреми само Лесната пешадиска баталјонска група, на АРМ и требаат меѓу 34 и 40 пешадиски борбени возила или оклопни транспортери. Според сегашните цени, еден чини меѓу 2,5 и 3 милиони евра, но само како платформа, без целосно вооружување и опрема. Оклопните транспортери само за еден баталјон би чинеле меѓу 80 и 120 милиони евра, или во најевтината варијанта на АРМ би и требале најмалку четири години за со својот буџет да ги купи само транспортерите за еден баталјон.

За целосно да се опреми сегашната механизирана пешадиска бригада на АРМ, која има четири баталјони, ќе бидат потребни меѓу 136 и 160 оклопни транспортери, што би чинело од 340 до 480 милиони евра само за платформите-возилата без вооружување.

Покрај оклопните транспортери или пешадиски борбени возила, според Стратегискиот одбранбен преглед усвоен во јуни, на АРМ и требаат и тактички комуникациски систем, инженериски машини и опрема, опрема за сајбер-одбрана, воени транспортни возила, орудија за посредна огнена поддршка, индивидуална и колективна опрема за атомско-биолошко-хемиска одбрана и балистичка заштита, опрема за извидување, разузнавање, набљудување и определување на цели, комуникациска опрема…

Според овие проекции, АРМ би можела сама да ги опреми декларираните единици со буџетите за следните десет години. Но, не и целата своја формација.


Катич: ЕУ смета дека Владата на Македонија води добра политика


Скопје, 29 август, 2018 - 13:13 (META) 

Словенија ја потврдува поддршката за евроатланската интеграција на Македонија и заедно со државите членки на НАТО се надева дека Македонија успешно ќе го помине тој пат, а граѓаните ќе го направат вистинскиот избор на референдумот во септември и наскоро ќе седнете на истата маса како полноправна членка на НАТО, порача министерката за одбрана на Република Словенија, Андреја Катич, која престојува во официјална посета на Република Македонија.

Таа нагласува дека македонската влада спроведува вистински политики.

– Словенија го поздравува договорот со Република Грција. Се разбира дека требало попуштање и од двете страна, но јазикот ќе остане и натаму македонски, националноста македонска и се надевам дека македонските граѓани на референдумот ќе го направат вистинскиот избор. Сите членки на ЕУ сметаат дека македонската Влада добро ги спроведува активности кон нејзиното идно членство во Алијасната. Референдумот е институт на демократскиот поредок и овозможува изразување на волјата на народот. Затоа е уште поважно граѓаните на Македонија да учествуваат на него и да ја изразат нивната волја – изјави министерката Катич на заедничката прес-конференција со нејзината македонска колешка Радмила Шекеринска.

Шекеринска потенцира дека Македонија треба да го следи примерот на Словенија и да ја примени нејзината формула за успех, која, според министерката е вистинскиот пат за земјата и дека граѓаните треба на референдум да потврдат дека сакаат таква иднина.

– Македонија и Словенија по независноста избраа ист пат, но за жал со различна брзина. Словенија беше државата која прва стана членка на НАТО и прва се приклучи на ЕУ. И не случајно е што Словенија ги има највисоките и просечни и минимални плати во регионот и најдобрите стандарди во делот на областите што се важни за граѓаните. Примерот со Словенија е најдобар показател за формулата за успех и за нас. Македонија знае дека тоа е вистинскиот пат и убедени сме дека на 30 септември граѓаните на референдум ќе потврдат дека посакуваат таква иднина за себе, за своите семејства, за своите деца – истакна Шекеринска.

Двете министерки денеска потпишаа Меморандум за соработка со кој се унапредува и соработката во одбраната меѓу двете земји.


МО: На Криволак не се користел осиромашен ураниум и нема да се користи


Скопје, 16 август, 2018 - 17:20 (META) 

Министерството за одбрана денеска се огласи со демант на тврдењата на социјалните мрежи од вчера и денеска дека на воениот полигон Криволак се испукувале и проектили со осиромашен ураниум.

Шпекулациите почнаа вчера, откако беше соопштено дека министерката за одбрана Радмила Шекеринска присуствуваше на вежба на хеликоптерски единици за копнена поддршка од САД. Притоа бргу се проширија шпекулации дека се користат ракети и бомби со осиромашен ураниум.

Тоа не е вистина, велат од МО.

„Министерството за одбрана најодговорно тврди дека ниту сегашните, а ниту идните обуки и тренинзи на нашите партнери од НАТО на полигонот Криволак не се од било каква опасност по здравјето на граѓаните, ниту ќе се користат бомби со осиромашен ураниум. Ваквите лаги имаат за цел да ја поттикнат недовербата на граѓаните во НАТО и се во функција на негативна кампања за претстојниот референдум. Граѓаните да бидат спокојни, членството на Македонија во НАТО носи единствено поголема безбедност и сигурност за нашата земја“, порачаа од министерството.


Шекеринска: Убедени сме дека до Самитот на НАТО ќе обезбедиме поддршка од сите членки


Скопје, 22 јуни, 2018 - 14:22 (META) 

Министерката за одбрана Радмила Шекеринска е убедена дека на Самитот на НАТО, што треба да се одржи на 11 и 12 јули во Брисел Македонија ќе ја обезбеди поддршката од сите членки на Алијансата за да ја добие поканата за членство. Според Шекеринска, земјава исполнила големи домашни задачи, што, според неа, се силни аргументи во полза на нашето членство во Алијансата.

– Доколку тоа се случи, мислам дека и во поглед на Македонија ќе се почитува процедурата која важи и за другите земји членки и оти тој период би бил од една до една и пол година, во зависност од тоа каква е процедурата во државата и во земјите членки – рече Шекеринска, одговарајќи на новинарско прашања по потпишувањето на договор за времено користење на простории во Домот на АРМ од страна на Сојузот на борците од НОБ и антифашистичката војна на Македонија.

Во врска со тоа дали референдумот што би се организирал би бил консултативен или обврзувачки, министерката за одбрана посочи дека за ова ќе се прават консултации во Собранието и со опозицијата и ќе биде донесена одлука која ќе биде добра, не за поединечни политички партии или личности, туку за Македонија.

– Референдумот ќе биде важен дел и ќе ги поканиме, не политичарите, туку граѓаните на оваа држава сите да се вклучат и да дадат поддршка на европска и евроатланска Македонија – рече Шекеринска.

Според неа, за она што го сработила Владата и за позитивните промени сведочи и вчерашната одлука на Холандија, која како што рече е најстрога членка, во однос на исполнувањето на критериумите за членство да даде поддршка за одредување датум за почеток на преговорите.


Почнува расправата за новата стратегија за национална сајбер-безбедност


Скопје, 12 јуни, 2018 - 11:53 (META) 

Министерството за информатичко општество и администрација, Министерството за одбрана и Министерството за внатрешни работи заеднички изготвиле работна верзија на Националната стратегија за сајбер безбедност на Република Македонија. Расправата веќе почна по електронски пат, преку давање предлози, препораки и коментари на електронската адреса cyber_security@mioa.gov.mk, а утре ќе се одржи и првиот јавен настан од овој процес.

Во Клубот на пратениците во Скопје, со почеток во 10 часот, ќе се одржи првата јавна расправа на која ќе биде презентирана стратегијата. На настанот ќе бидат министерот за информатичко општество и  администрација, Дамјан Манчевски, министерката за одбрана, Радмила Шекеринска и министерот за внатрешни работи, Оливер Спасовски.

Во нацртот на 38 страници, се посочува дека е голема потребата од нов пристап кон сајбер-безбедноста, бидејќи постои огромна неподготвеност за справување со сајбер-заканите и кај граѓаните и кај фирмите, а заканите се сè побројни. Наспроти тоа, има недостиг на експерти и огромен проток на информации кои излегуваат од граѓаните или фирмите или доаѓаат до нив, и затоа стратегијата предвидува значително зголемување на капацитетите за заштита на податоците од лица и други субјекти со криминални намери со користење државни пари за развивање соодветна одбрана.

Според стратегијата, во првиот квартал на 2017 година, 73,6 отсто од домаќинствата имале пристап до интернет, а кај фирмите со 10 или повеќе вработени таа бројка била 91,2 отсто. Тоа наметнува потреба од подобро запознавање на корисниците со мерките на заштита, посебно во фирмите, од кои дел извршуваат работи за државата, па ризиците што ги имаат тие фирми значат и ризици од загрозување на податоци на државата. Исто така, се позастапен е и Интернет на нештата, односно поврзување на најразлични уреди на интернет, коишто може да бидат нападнати и така да се загрози не само нивното функционирање, туку и безбедноста на нивните сопственици.

Стратегијата за сајбер-безбедност предвидува засилени меѓусекторски мерки за справување со заканите, преку пет мерки. Тоа се зголемување на сајбер отпорноста и зголемување на сајбер-капацитетите, посодветна борба со сајбер-криминалот, потоа засилување на сајбер-одбраната и поголема соработка на институциите.

Исто така, предвидено е формирање на Национален совет за сајбер-безбедност и, како самостоен орган, Тело со оперативни капацитети за  сајбер-безбедност.