!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Шекеринска на 27 септември во посета на НАТО во Брисел


Брисел, 16 септември, 2017 - 16:18 (META) 

Министерката за одбрана, Радмила Шекеринска, на 27 септември ќе го посети седиштето на НАТО во Брисел, каде ќе има средба со генералниот секретар на алијансата, Јенс Столтенберг.

Генералниот секретар на НАТО со писмо ја информирал Шекеринска дека Aлијансата го прифатила барањето на Владата, Македонија да биде дел од програмата на НАТО за унапредување на образованието во одбраната, а во дописот тој наведува и дека со нетрпение ја очекува посетата на министерката за одбрана на седиштето на НАТО.

„Со нетрпение ја очекуваме нашата засилена соработка и продолжувањето на нашата дискусија за време на вашата посета на седиштето на НАТО во Брисел на 27 септември“, стои во писмото од Столтенберг до Шекеринска, соопшти Министерството за одбрана.

Во врска со приклучувањето на Македонија во програмата на НАТО, Столтенберг навел дека во следниот период тим од секторот за политички прашања и за безбедносна политика на НАТО ќе организира студиска посета на Македонија за утврдување на поддршката која е потребна.

„Врз основа на успехот на програмата досега, убеден сум дека таа ќе ги зајакне вашите институции за образование во одбраната, особено вашата Воена академија. Образованието е критичен фактор на трансформација и нашата соработка во оваа област ќе ги поддржи и ќе ги унапреди вашите напори за реформи во одбраната“, стои во писмото од генералниот секретар на НАТО.

Програмата за унапредување на образованието во одбраната, како што информираат од Министерството за одбрана, е „моторот зад реформите во одбраната на земјите во развој и на нивните професионални воено-образовни институции“.

Македонија првпат добива пристап до оваа програма на НАТО.


Британија ќе помага со стратегијата за реформи во одбраната и членство во НАТО


Скопје, 29 август, 2017 - 15:49 (META) 

Стратешкиот одбранбен преглед, кој е клучен документ за водењето на одбранбените реформи и за членството на Македонија во НАТО, треба да биде готов до средината на следната година. Министерката за одбрана, Радмила Шекеринска, за ова на денешната средба го информирала советникот за одбрана и безбедност во Одделот за стабилизација на Велика Британија, Стивен Гловер, кој е во дводневна посета на Македонија.

На средбата, на која присуствувале и амбасадорот на Британија во земјава, Чарлс Герет, и одбранбеното аташе, потполковник Ричард Пери, биле разменети мислења и искуства поврзани со изработката на новиот стратешки одбранбен преглед, а станало збор и за можностите за поддршка во изработката на овој исклучително важен документ за одбраната, од страна на Обединетото Кралство.

„Британскиот советник за одбрана изрази подготвеност и интерес за советодавна поддршка од британска страна на овој важен реформски процес. Тој воедно ги истакна и британските искуства и научени лекции во поглед на изработка, но и имплементација на стратегиските одбранбени прегледи“, стои во соопштението за средбата.

За време на посетата на Македонија, се додава во соопштението од Министерството за одбрана, Гловер ќе се сретне и со високи претставници од кабинетот на премиерот Зоран Заев, задолжени за одбраната и за безбедноста, а средба ќе има и со претседателот на Комисијата за одбрана и безбедност во Собранието на Република Македонија, Максим Димитриевски.


Војниците бараат откако ќе наполнат 45 години да работат во МВР


Скопје, 23 август, 2017 - 15:57 (META) 

Професионалните војници бараат откако ќе наполнат 45 години старост да бидат прераспоредени од Министерството за одбрана во Министерството за внатрешни работи.

Ова било тема на денешната средба на министерот за внатрешни работи, Оливер Спасовски со претставници на Независниот синдикат на професионалните војници.

„Претставниците од Независниот синдикат му го образложија своето барање на министерот Спасовски. Тие се повикуваат на членот 40 од Законот за служба во Армијата на Република Македонија, според кој професионалните војници со навршување на 45 години може да бидат прераспределени во други институции. Во конкретниот случај, од Независниот синдикат бараат превземање од Министерството за внатрешни работи, односно граничната полиција“, стои во соопштението на МВР.

Спасовски на состанокот рекол дека барањето на синдикатот ќе го отвори на седница на Владата.


Иванов и Шекеринска ќе говорат на свеченоста за Денот на АРМ


Скопје, 17 август, 2017 - 18:41 (META) 

Централната свеченост по повод одбележувањето на 25-годишнината од формирањето на Армијата на Република Македонија (АРМ) ќе се одржи утре на воениот стадион во Градскиот парк во Скопје. Според протоколот, на свеченоста, која ќе почне во 19 часот, свои обраќања ќе имаат претседателот на државата, Ѓорге Иванов и министерката за одбрана, Радмила Шекеринска.

Претседателот Иванов ќе додели одликувања на командата за обука и доктрини, баталјонот за почести и четвртиот механизиран пешадиски баталјон од првата механизирана пешадиска бригада.

На свеченоста, како што информираат од Министерството за одбрана и Генералштабот на АРМ, ќе присуствуваат највисоки претставници од сите државни институции, локални самоуправи, амбасади во Македонија и граѓански здруженија.

Од касарната „Илинден“ во чест на Денот на АРМ и почетокот на централната прослава, ќе бидат истрелани 10 плотуни од артилериски орудија.

Во рамките на одбележувањето на 18 Август – Денот на АРМ, утре во 9 часот на градските гробишта во Бутел во Скопје, повеќе делегации со воени почести ќе положат венци со свежо цвеќе на партизанските гробишта, на гробот на загинатиот претседател Борис Трајковски, на гробот на поранешниот претседател Киро Клигоров и на гробот на генерал Михаило Апостолски.

На воениот стадион во Градскиот парк во Скопје ќе биде поставена целодневна изложба на борбени средства, техника и воена опрема на АРМ. Во текот на изложбата ќе бидат изведени и показни вежби од страна на припадниците на полкот за специјални намени, баталјонот за почести и центарот за обука и дресура на кучиња.


Шекеринска не сака да ги коментира барањата на Москва за транскрипти


Скопје, 15 август, 2017 - 19:27 (META) 

Министерката за одбрана Радмила Шекеринска не планира да ги бара транскриптите од интервјуто за британската новинска агенција „Блумберг“, соопштија за „Мета“ од Министерството од одбрана.

„Министерката за одбрана нема намера да се меша во работата ниту на домашните, ниту на странските медиуми и оттаму воопшто не би сакале да го коментираме барањето на руското МНР за транскрипт“, велат од МО.

Оттаму истакнуваат дека министерката Шекеринска има дадено изјави и за други медиуми кои се достапни до јавноста.

„Позициите на Владата и на министерката Шекеринска за стратешката цел за членство во НАТО и добри односи со партнерските земји во меѓународната заедница како и со Русија се единствени, јасни и недвосмислени“, велат од МО.

Портпаролката на руското МНР, Марија Захарова по повод интервјуто на Шекеринска изјави дека обвинувањата на сметка на Москва за наводното мешање во внатрешните прашања на Македонија се исконструирани и неосновани. Таа оцени дека таквите изјави се во спротивност со ставот на официјално Скопје и на настојувањата на македонските власти за развој на конструктивни односи со Русија поради што побара агенцијата да го објави целиот текст од интервјуто, како и аудио и видео снимката од разговорот со Шекеринска. Захарова исто така рече дека руското МНР ја повикува Македонија да појасни дали зборовите на Шекеринска, кои ги објави „Блумберг“ се вистинити, имајќи предвид дека досега никој тоа не го демантирал.


Шекеринска: Ќе се залагам за поголем буџет на АРМ и за партиите да се држат подалеку од неа


Скопје, 6 јуни, 2017 - 16:24 (META) 

„Силно ќе се залагам за зголемување на буџетот на АРМ и за подобрување на професионализацијата во неа. Армијата да биде забрането место за сите политички партии, вклучително и за партијата од која доаѓам“, нагласила министерката за одбрана, Радмила Шекеринска, на денешната средба со началникот на АРМ, генерал потполковник Методија Величковски, соопшти Министерството за одбрана.

Министерката му порачала на генералот Величковски дека стои на располагање и дека ќе има блиска соработка, која ќе биде во интерес на Армијата и на Владата на Република Македонија.

–  Тука сум за да се вратиме на нашата определба за членство во Алијансата, за да направиме вистински реформи, реформи што ќе бидат корисни за сите – нагласила Шекеринска.

Министерката се осврнала и на основните потреби на припадниците на АРМ, како што се опрема, униформа, чизми и друго, и додала дека ќе сторат сè за да најдат решенија за искористување на домашните компании, што ќе влијае и на подигнување на домашната економија.

Величковски ѝ го честитал на Шекеринска назначувањето на функцијата министер за одбрана и изразил задоволство што Министерството за одбрана добило влијателен министер во ликот на првата жена на таа функција.


МВР и АРМ да сносат одговорност поради непрофесионалност во Собранието, бараат од ДР-ДПА


Скопје, 5 мај, 2017 - 15:58 (META) 

Министерството за одбрана и Министерството за внатрешни работи, да понесат правна и институционална одговорност поради тоа што не постапиле професионално во Собранието каде што физички беа нападнати пратеници и новинари.

Ова денеска на прес-конференција го побараа од Движењето за реформи на ДПА, кои го осудија учеството на припадници на АРМ и на МВР, како што рекоа, во насилничкиот и крвавиот акт врз пратениците.

– Тие ги прекршија Законот за одбрана, Законот за служба во АРМ, Законот за МВР и кодексот на професионализмот, дозволувајќи им на насилниците слободно да влезат во Собранието за да извршат насилство врз народнитие пратеници. Тие го урнаа угледот на Армијата и на полицијата, го доведоа во опасност животот, здравјето на присутните, извршија прекршок со елементи на насилство, учествуваа во дисциплински прекршок и во кривични дела. Против овие лица бараме да се преземат соодветни мерки и да се казнат – изјави Таип Јусуфи од секторот за одбрана и за безбедност на Движењето за реформи на ДПА.

Јусуфи ги повика сите политички партии, невладини организации и граѓани, да се воздржат од какви било акции што предвидуваат примена на сила.


Пожар во Министерството за одбрана, предизвикан од дефект на инсталацијата


Скопје, 29 април, 2017 - 14:01 (META) 

Министерството за внатрешни работи денеска во билтенот соопшти дека вчера избил пожар во Министерство за одбрана и во Генерал-штабот на АРМ.

Пожарот се случил околу 17 часот, поради дефект во електрична инсталација во зградата, при што бил зафатен и дел од покривната конструкција.

Пожарот бил изгаснат од екипа на Бригадата за противпожарна заштита. Повредени лица нема, а материјална штета дополнително ќе биде утврдена.


СДСМ: МО да каже дали со пари од граѓаните Јолевски бил во САД


Скопје, 17 февруари, 2017 - 14:16 (META) 

Министерството за одбрана е должно да каже дали со пари на граѓаните е платена посетата на Зоран Јолевски на САД, порача денеска СДСМ.

Оттаму потсетуваат дека Јолевски за време на посетата на САД имал средба со американскиот конгресмен Дана Рорабакер, кој потоа ја даде контроверзната изјава за распад и поделба на Македонија!

„Ако според официјалните информации, посетата на Јолевски на САД била и приватна и службена, тогаш кој ги платил трошоците за таквите посети, се вели во партиското соопштение од СДСМ. Министерството за одбрана го избегна одговорот на ова прашање. Дали тоа значи дека признава дека посочената посета на Јолевски на САД е платена со пари од граѓаните?! Приватниот дел на посетата на министерот за одбрана Јолевски упатува дека тој од позиција на министер лобирал и за партиски интереси. Не смее пари од Буџетот да се користат за партиски активности!“, стои во соопштението од СДСМ.

Од СДСМ велат дека ако посетата на Јолевски е платена со пари од граѓаните, тогаш Министерството за одбрана е должно да каже и со кој друг се сретнал министерот.

„Дали тоа биле приватни или службени средби? Дали јавноста во Македонија треба да очекува нови контроверзни изјави како резултат на посетата и средбите на Јолевски? Преклопувањето на државни со приватни агенди, како оваа, е уште еден пример на партизацијата на државните институции во десетгодишното несовесно владеење на ВМРО-ДПМНЕ, за што ќе има одговорност“, порача СДСМ.


МО до СДСМ: Јолевски секогаш се залагал за територијалниот интегритет на Македонија


Скопје, 16 февруари, 2017 - 17:25 (META) 

Министерот Зоран Јолевски на сите средби што ги имаше во Вашингтон, како и секогаш, се залагал за територијалниот интегритет, суверенитет и унитарниот карактер на Република Македонија, се вели во реакцијата на Министерството за одбрана на денешната прес-конференција на портпаролот на СДСМ, Петре Шилегов.

„Сакаме да го потсетиме господинот Шилегов дека министерот за одбрана Зоран Јолевски, во 2008 година додека беше амбасадор на Република Македонија во САД го преговараше текстот за Декларацијата за стратешко партнерство меѓу Соединетите Американски Држави и Република Македонија во која САД експлицитно го поддржува територијалниот интегритет и суверенитет, како и унитарниот карактер на Република Македонија“, стои во соопштението од МО.

Од Министерството велат дека Јолевски за време на официјални и работни посети независно во која земја во светот, „на средбите, конференциите, билатерални и мултилатерални средби, безбедносни форуми и тн., секогаш достоинствено ја претставува Македонија“.

Портпаролот на СДСМ на денешната прес-конфернција го повика Јолевски „да објасни што се зборувало на неговата средба со американскиот конгресмен Дана Рорабакер и дали таа средба е повод за контроверзните изјави на конгресменот за поделба на Македонија“.