Даниелсон: Фокусот да се насочи кон реформите, а не кон предвремени избори


Скопје, 29 јануари, 2019 - 16:58 (META) 

Кристијан Даниелсон, директорот на Директоратот за соседство и преговори за проширување на Европската комисија, на денешната прес-конференција во ЕУ Инфо центарот порача дека фокусот треба да насочи на реформите во пресрет на јуни кога Советот на ЕУ ќе одлучува за отворање на пристапните преговори, а дека предвремените избори ќе го одземат тој фокус и потребната енергија.

– Фокусот треба да биде на испорачување резултати. Таму треба да бидат насочени напорите. Веруваме дека предвремените избори ќе го одземат тој фокус и нема да бидете во можност да ја дадете потребната енергија се со цел да се адресираат останатите отворени прашања. Тука зборуваме за реформите во судството, борбата со корупцијата и организираниот криминал, реформата на безбедносните служби и функционирањето на јавната администрација – истакна Даниелсон.

Според него не станува збор само за законодавството, туку треба да се види и имплементацијата односно спроведувањето на законите.

Нагласи дека извештајот за земјата веќе се пишува и оти ЕК останува силно посветена да ги поддржи напорите за испорачување на реформите.

– Започнавме со подготвителната работа на извештајот и одблизу го мониторираме процесот кој ќе биде постигнат во сите сфери и области. Можам да ве уверувам дека ние ќе продолжиме да ги поддржуваме овие напори со сите средства кои ги имаме, тука зборуваме за техничка експертиза но и со важната финансиска помош која се обезбедува од ЕУ. Нашата определба е да ве поддржуваме во исполнувањето на оваа стратешка цел, токму поради следните чекори ќе бидат многу важни на патот за почнување на пристапните преговори – рече Даниелсон.


Заев-Даниелсон: Презедовме смели чекори за отпочнување на преговорите за членство во ЕУ


Скопје, 29 јануари, 2019 - 14:04 (META) 

Премиерот Зоран Заев, денеска се сретна со директорот на Директоратот за соседство и преговори за проширување на Европската комисија, Кристијан Даниелсон, кој, заедно со амбасадорот на ЕУ, Самуел Жбогар, учествуваа на состанокот на кој се презентираше актуелниот статус на процесот за интеграција на нашата земја во Европската Унија.

Даниелсон и Заев, како што соопштија од владата, имале тет-а-тет средба, по што се одржал и заедничкиот состанок со вицепремиерот и министер за внатрешни работи Оливер Спасовски, со вицепремиерот задолжен за европски прашања Бујар Османи, со министерката за правда Рената Дескоска, со министерот за информатичко општество и администрација Дамјан Манчевски, и со министерот за надворешни работи Никола Димитров.

Заев истакнал дека за нашата земја, поддршката на Европската комисија, институциите на Европската Унија, земјите членки на ЕУ, на нашите соседи и многу други лидери, била клучна за цврсто да зачекориме напред и Македонија да се врати на патот кон Европската Унија и НАТО.

– За Македонија, 2018 година беше година од историско значење, за конечно решавање на спорот помеѓу Република Македонија и Република Грција. Паралелно со овој процес, Владата работеше напорно на клучните реформски области кои ни ги зададе Европскиот совет во јуни 2018, како услов за ефективен почеток на преговорите за членство во ЕУ во јуни 2019 година, односно реформи во правосудството, реформи во безбедносните и разузнавачките служби, борба против криминалот и корупцијата и реформи во јавната администрација. Македонија направи извонреден напредок и презеде смели чекори и отпочнувањето на преговорите за членство во јуни 2019 година ќе испрати силен сигнал до Регионот на Западен Балкан, дека процесот на пристапување и понатаму е заснован на заслуги и резултати – ако земјата кандидат испорачува, тогаш и ЕУ испорачува – рече Заев.

Заев информираше дека веќе девет поглавја од преговарачкиот процес се опфатени и поминати низ заедничките објаснувачки подготвителни состаноци со Европската комисија, и дека оваа фаза дава значајна подготовка за преговорите кои следуваат.

Даниелсон во име Европската Комисија ги пренел честитките за историскиот договор со Грција, и дека таа останува и понатаму максимално посветена на поддршката за Република Македонија во претстојниот период за да се оствари договореното минатата година, отворањето на поглавјата да започне во јуни оваа година.


Даниелсон: Референдумот ќе ја одреди иднината на вашата земја


Скопје, 29 август, 2018 - 17:10 (META) 

На 30 септември граѓаните ќе направат избор што ќе ја одреди иднината на вашата земја и тој избор ќе има последици за идните генерации. Ве повикувам да го искористите вашето демократско право и да гласате на претстојниот референдум, порача Кристијан Даниелсон, директорот на Директоратот за проширување и соседска политика на Европската комисија, на промоцијата на новата кампања на ЕУ канцеларијата во Скопје наречена „Замисли иднина заедно“.

Тој упати честитки до премиерот и до македонските институции за постигнување на договорот со Грција за решавање на прашањето со името што, според него, го отвора патот на земјава кон Европа.

Евроамбасадорот во земјава Самуел Жбогар рече дека преку ЕУ-фондови во изминатите 20 години се внесени една милијарда евра европски пари преку проекти што генерирале огромни резултати.


Автопатот Демир Капија – Смоквица треба да обезбеди економски развој и безбедно патување


Гевгелија, 23 април, 2018 - 15:02 (META) 

Со отворањето на 28,2 километри од автопатот Демир Капија – Смоквица го додадовме делот од Коридор 10 кој недостасуваше во земјата, рече генералниот директор за соседски политики и преговори за проширување во Европската комисија, Кристијан Даниелсон.

Тој додаде дека овој автопат ќе го олесни движењето, ќе го поттикне економскиот развој и ќе обезбеди одржливо и побезбедно патување.

Новата автопатска делница Демир Капија – Смоквица, која е во рамки на Коридорот 10, е дел од вкупните вложувања на Европската Унија во транспортната инфраструктура на земјата, кои во изминатите неколку години достигнаа речиси 325 милиони евра. Со нив се изградени и обновени над 100 километри автопатска мрежа, 64 километри патишта во повеќе од 40 општини и 60 населени места, 16 километри железничка пруга и 11 железнички станици.

Премиерот Зоран Заев рече дека овој автопат поврзува и води кон ЕУ.

– Оваа делница од автопатот „Пријателство“ во себе ја има вградено и искрената приказна за поддршка и соработката. Нашата темелна вредност и определба, да ги издигнеме капацитетите на нашата земја на ниво достојно за да биде членка на ЕУ, е силна мотивација за усогласување на нашата, национална патна инфраструктурна стратегија, со онаа на Европската Унија – рече Заев.

Министерот за транспорт и врски Горан Сугарески рече дека оваа автопатска делница е прва од овој тип на Балканот.

– Автопатот ги содржи сите потребни каректеристики за сообраќајна безбедност што ни дава сигурност дека сообраќајот по оваа делница ќе се одвива побезбедно за сите учесници. Истиот е проектиран и изграден согласно нормите и стандардите на Европската унија за заштита на животната средина, што дополнително влијае на намалување на емисијата штетни гасови – рече Сугарески.

Продолжување на поддршката и инвестициите кои треба да обезбедат поефикасно инфраструктурно и енергетско поврзување на целиот регион е една од шестте приоритетни иницијативи во новата Стратегија на Европската Унија за поддршка на трансформацијата на Западен Балкан. Со неа се предвидуваат дополнителни инвестиции на ЕУ од над една милијарда евра во натамошниот развој и инфраструктурата на земјите од Западен Балкан.

На настанот беше означен стартот на „ЕУ за тебе“ кампањата за инвестициите на Европската Унија во транспортната инфраструктура“, велат од Делегацијата на ЕУ во Македонија.

На отворањето на автопатот, присуствуваше и министерот за транспорт и врски на Грција, Христос Спирцис.


Критериумите за земјите од Западен Балкан се построги од претходно, призна Даниелсон


Брисел, 5 декември, 2017 - 15:22 (META) 

Кристијан Даниелсон, директор на Комесаријатот за проширување на ЕУ, денеска изјави дека земјите од Западен Балкан минуваат низ многу потешки реформски процеси при пристапувањето во ЕУ во споредба со државите што се приклучиле на Унијата во претходната декада.

– Постои силен политички ангажман. Причината е прилично јасна: реформите на Западен Балкан се бараат затоа што сметаме дека на Западен Балкан има повеќе луѓе кои не сакаат да ги видат реформите и кои би биле задоволни со ситуацијата каква што е денес. Затоа политичките барања се поголеми – изјави Даниелсон.

Во својот говор на конференција „Западен Балкан на раскрсница“, која ја организираше бриселската организација „Пријатели на Европа“, Даниелсон на западнобалканските земји им порача да се фокусираат на регионалната соработка и на заедничкиот пазар затоа што тоа е паралела на заедничката царина, од која сите земји ќе бидат дел кога ќе станат дел од Унијата.

– Генерално, кога станува збор за трговија, мој цврст совет е да се фокусирате на регионалната трговија, а не на трговијата со ЕУ, затоа што таму се вистинските потенцијали за економски пораст – порача Даниелсон.


Адеми и Даниелсон разговарале за изборите, реформските приоритети и за ИПА-фондовите


Брисел, 16 септември, 2016 - 11:10 (META) 

Заменик-претседателот на Владата на Република Македонија задолжен за европски прашања, Арбер Адеми, се сретна со генералниот директор на Директоратот за проширување и за соседска политика на Европската комисија, Кристијан Даниелсон, со кој разговарал за актуелната политичка состојба во земјата, претстојните парламентарни избори, реформските приоритети, како и за ИПА-фондовите.

„Двајцата соговорници констатираа дека оценката на политичките лидери дека се исполнети условите за организација на парламентарните избори е позитивен исчекор. Во претстојниот период потребно е да се вложат напори да се организираат демократски, веродостојни и инклузивни избори чии резултати ќе бидат широко прифатени. Од аспект на реформските приоритети, Адеми нагласи дека е потребно да се продолжи со реализација на предвидените мерки и активности, имајќи предвид дека станува збор за области кои се од суштинско значење за реформите поврзани со процесот на европска интеграција на земјата“, соопштуваат од кабинетот на вицепремиерот Адеми.

Соговорниците, исто така, се согласиле дека треба да продолжи поддршката за работата на Специјалното јавно обвинителство, како и практиката на блиска соработка и координација меѓу државните институции и Европската комисија.


Тачи – Даниелсон: Единствен излез од кризата е вистински политички дијалог


Скопје, 27 мај, 2016 - 13:22 (META) 

Причинителите на кризата ВМРО-ДПМНЕ и ДУИ продолжуваат со еднострани и неодговорни одлуки за прашања кои беа дел до преговорите и за кои требаше да се постигне консензус меѓу најголемите политички партии, со посредство на претставниците на САД и ЕУ, истакнал претседателот на ДПА, Мендух Тачи на денешната средба со директорот на Директоратот за проширување на Европската комисија, Кристијан Даниелсон.

„Единствен излез од оваа ситуација е продолжение на вистински политички дијалог со посредство на меѓународниот фактор, кој бара нов пристап и силна политичка волја од сите страни. Решението на спорот за името и меѓуетничките односи, како и исполнувањето на демократските услови за организирање на веродостојни избори без оглед кога тие ќе се одржат, и понатаму остануваат клучни и неопходни прашања за Демократската партија на Албанците“, оценил Тачи на средбата.


Груевски со Даниелсон: Приоритет на ВМРО-ДПМНЕ е нормализирање на состојбата


Скопје, 27 мај, 2016 - 12:37 (META) 

Актуелната влада има легитимен мандат до 2018 година, но како партија ВМРО-ДПМНЕ е подготвена тие да се одржат и порано доколку опозицијата изрази подготвеност да излезе и се соочи со граѓаните, посочил претседателот на владејачката партија, Никола Груевски на денешната средба со директорот на директоратот за проширување во Европската комисија, Кристијан Даниелсон.

На средбата, на која двајцата соговорници размениле мислења за актуелната политичка состојба во земјава, Груевски истакнал дека приоритет на ВМРО-ДПМНЕ е „нормализирањето на политичката ситуација, внесување на сигурност кај граѓаните и враќање на патеките на напредокот и економскиот просперитет“

„ВМРО-ДПМНЕ ги поддржува процесите кои значат унапредување на стандардите во секоја област и притоа секое решение важно за иднидната на државата треба да биде базирано на волјата на граѓаните“, рекол Груевски, стои во соопштението на ВМРО-ДПМНЕ за средбата и додал дека во меѓувреме ќе се продолжи со работите и активностите кој ќе значат зголемување на довербата и кредибилноста на изборниот процес.

Во врска со интегративните процеси, лидерот на владејачката партија посочил дека стратешки интерес на државата претставува членството во Европската Унија и НАТО.

„Кога станува збор за европските интеграции Груевски истака дека во периодот што следи ќе има интензива агенда во поглед на исполнување на сугестиите од извештајот на Прибе и продолжување на реформите кои значат подигнување на стандардите во повеќе области како што е судството, безбедносните органи, медиумите, и антикорпцијата. Тоа е наш силен интерес, и преку еден конструктивен процес ќе бидат понудени решенија кои би значеле унапредување на критериумите и принципите на работа во посочените области“, се наведува во соопштението на ВМРО-ДПМНЕ.


Даниелсон: Има уште многу работа за спроведување веродостојни избори


Скопје, 5 април, 2016 - 17:29 (META) 

Останува уште многу работа што треба да се заврши за да се обезбедат услови за фер и демократски избори, изјави денеска во Скопје директорот на Директоратот за проширување во Европската комисија, Кристијан Даниелсон, по средбата со лидерите на четирите најголеми политички партии и со премиерот Емил Димитриев.

Даниелсон ги повика партиите и државните институции заедно да работат за да осигураат веродостојни избори.

– Особено ги охрабрувам сите државни институции да ја поддржат работата на Државната изборна комисија во прочистување на избирачкиот список. Тоа ќе помогне во враќање на довербата на граѓаните во процесот. Медиумите, особено јавниот сервис, исто така играат клучна улога за граѓаните да донесат соодветна одлука на денот на изборите – рече Даниелсон, додавајќи дека политичкиот договор и итните реформски приоритети мора целосно да се спроведат.

Даниелсон оцени дека Специјалното јавно обвинителство е особено важен дел од Договорот од Пржино и изрази загриженост поради опструкциите што ѝ се прават на институцијата. Тој ги повика политичките партии целосно да го поддржат СЈО и неговата работа.


Димитриев го информирал Даниелсон дека изборите ќе бидат фер и демократски


Скопје, 5 април, 2016 - 14:26 (META) 

Претседателот на Владата на Република Македонија за спроведување на изборите, Емил Димитриев, денеска се сретна со Кристијан Даниелсон, директор на Директоратот за проширување на Европската комисија.

На средбата стана збор за европските интеграции на Република Македонија, реформите кои се преземаат и за актуелната политичка ситуација во земјата.

„Соговорниците ја истакнаа потребата и заложбата од организацијата на фер, веродостојни и демократски избори, при што се согласија дека сите политички партии треба да покажат посветеност за унапредување на довербата во изборниот процес. Премиерот за спроведување на изборите Димитриев истакна дека приоритет на Владата е организацијата на фер, веродостојни и демократски избори на 5 јуни, што ќе овозможи решавање на политичката состојба во земјата и формирање на влада која ќе може да се посвети со полн интензитет на реформите и на проектите што се реално корисни за граѓаните. Тој ја истакна поддршката што Владата за спроведување на изборите ја обезбедува за потребите и за барањата на Државната изборна комисија во насока на прочистувањето на избирачкиот список и истакна дека и покрај ограничениот мандат и специфики, Владата, во границите на своите ингеренции, е посветена и на реализација на проектите и на реформите од владината програма“, стои во владиното соопштение.