!На 1 февруари 2017 година, заврши промотивниот период на слободно користење на содржините на „Мета“. Во периодот што претстои го воведуваме новиот систем за пристап и за претплата. За начинот на пристап и за претплатата ќе информираме дополнително

Саудиска Арабија ќе ги покрива потребите за струја од обновливи извори на енергија


Ријат, 18 април, 2017 - 11:42 (META) 

Саудиска Арабија сака 10 проценти од своите потреби за електрична енергија да ги покрие од обновливи извори на енергија следните неколку години, во рамки на трансформацијата на својот енергетски сектор, најави министерот за енергетика Калед ал Фалих.

Ал Фалих најави дека ќе бидат реализирани 30 проекти за следната деценија да се постигне целта, производство на 10 гигавати електрична енергија од обновливите избори.

– Овие проекти ќе чинат помеѓу 30 и 50 милијарди долари, а уделот на енергијата од обновливите извори во вкупната потрошувачка на енергија до 2023 година ќе изнесува 10 проценти – изјави Ал Фалих.

Моментно целокупната електрична енергија во Саудиска Арабија се добива од нафтата или природниот гас.


ВМРО-ДПМНЕ: Инвестиравме повеќе од една милијарда евра во енергетски проекти


Скопје, 2 ноември, 2016 - 19:28 (META) 

Владата на ВМРО-ДПМНЕ во изминатите десет години инвестираше повеќе од една милијарда евра во енергетски проекти и во модернизација на постојните енергетски капацитети, се вели во реакцијата на партијата на власт, на прес-конференцијата на претседателот на комисијата за енергетика на СДСМ, Митко Андреевски.

Од владејачката партија додаваат дека успешно е либерализиран пазарот на електрична енергија, а почнало и искористувањето на обновливите извори на енергија.

– Создадена е соодветна регулатива врз која во изминатите десет години изградени се повеќе од 60 мали хидроелектрани, изградени се редица значајни капацитети за пренос на електричната енергија, а во моментов се спроведува и проектот за целосна гасификација на Македонија – се додава во соопштението на ВМРО-ДПМНЕ.


Кучи – Тимоние: Има потенцијал за инвестиции од француски компании


Скопје, 6 октомври, 2016 - 16:54 (META) 

Министерот за економија, Дритон Кучи, денеска оствари средба со новоименуваниот амбасадор на Франција во Македонија, Кристијан Тимоние.

Кучи и Тимоние ја оцениле економската соработка меѓу Македонија и Франција како успешна, со голем потенцијал за нејзино продлабочување во сферата на нови инвестиции од француски компании, нивни ангажман во изградба на енергетските капацитети, како и зголемување на бројот на туристи од Франција во нашата земја.

Амбасадорот на Франција, Тимоние го поздрави успешниот развој на билатералните односи меѓу двете земји и изрази уверување дека Франција ќе остане посветена на продлабочување на економската соработка и ќе продолжи со поддршката на Македонија на нејзиниот европски пат.


МЕПСО го стави под напон новиот 110-киловолтен далекувод помеѓу Скопје и Тетово


Скопје, 30 јуни, 2016 - 13:22 (META) 

МЕПСО го изгради и денеска го стави под напон, во пробна работа, новиот 110-киловолтен далекувод што ги поврзува трансформаторските станици Скопје 1 – Југохром -Теарце – Тетово 1.

Oвој проект ќе овозможи стабилно и доверливо снабдување со електрична енергија на Тетовскиот и на Скопскиот Регион, две најголеми консумни подрачја во електроенергетскиот систем на Република Македонија.

– Новиот далекувод е изграден за да се одговори на сè поголемите потреби за потрошувачка на електрична енергија на Полошкиот Регион и да се обезбеди стабилно и доверливо снабдување на сите потрошувачи со квалитетна електрична енергија за среднорочен период во идните дваесетина години – истакна генералниот директор на МЕПСО, Синиша Спасов.

Оваа инвестиција на МЕПСО чини повеќе од 3,5 милиони евра. Проектот е финансиран од сопствени средства на МЕПСО и со кредитна линија од Светска банка.

Изградбата на далекуводот траеше една година.