Претседателот на САД, Барак Обама, ги повика Американците да го поддржат неговиот наследник Доналд Трамп, нагласувајќи дека сите првенствено треба да бидат патриоти и „во еден тим“.
Тој најави дека ќе има мирна транзиција на власта во земјата и соопшти дека го поканил Трамп утре да го посети во Белата куќа.
Обама ги повика приврзаниците на неговата Демократска партија да не бидат разочарани од победата на републиканецот Трамп и да го поддржат во заложбите за успешно обединување и раководење на земјата.
Во своето прво обраќање до јавноста по победата на Трамп на вчерашните избори, Обама изјави дека е охрабрен од најавите на идниот претседател дека ќе допре до сите сонародници, посочувајќи дека на САД им се потребни единство, инклузивност и почитување на институциите.
– Сите ние, пред сè, сме Американци и патриоти и го сакаме најдоброто за нашата земја – истакна Обама, повикувајќи ги, пред сè, младите да останат храбри и да не бидат цинични.
Тој нагласи дека неговата администрација ја остава земјата посилна и подобра отколку што била пред осум години и истакна дека е горд на демократскиот претседателски кандидат Хилари Клинтон, за која оцени дека „не можела да биде подобар државен секретар“.
