!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

МВР проверила над 15 локации во обид да ги најде Грујовски и Бошковски


       
Скопје, 28 август, 2017 - 11:54 (META) 

Над 15 локации досега проверила полицијата во обид да ги пронајде Горан Грујовски и Никола Бошковски, кои се во бегство откако Врховниот суд ја потврди одлуката тие да заминат во притвор, објави телевизија „21“.

Tелевизијата претходно објави дека Горан Грујовски веројатно при бегството се претставува и како Владимир Варелов, затоа што има двоен идентитет.

Полицијата која веќе го бара во Македонија, но и во странство, со меѓународна потерница од Интерпол, ја известила меѓународната полиција – по што е распишана и дополнителна меѓународна истрага. Официјално МВР не потврдува, но велат дека и Грујовски и Бошковски се добро упатени во можностите кои им стојат на располагање.

„МВР во рамките на овластувањата и обврските ги презема сите мерки со цел лоцирање и лишување од слобода на споменатите лица. За таа цел се направени проверки на повеќе локации во Македонија, но со оглед на упатеноста на овие лица со можностите кои се на располагање, потрагата значително е отежната“, велат од МВР.

Специјалното јавно обвинителство во предметите „Тврдина“ и „Таргет“, Грујевски и Бошковски ги товари за злоупотреба на службената положба и незаконско прислушување, како и за уништување на системите со кои се прислушувале илјадници луѓе.