Од денеска па сè до 20 јули во Брисел, според скрининг агендата, македонската делегација заедно со албанската ќе го следи објаснувачкиот скрининг за Кластер 5, „Ресурси, земјоделство и кохезија“, соопштија од Секретаријатот за европски прашања.
Од таму велат дека се работи за важен и обемен кластер кој регулира пет поглавја поврзани со економскиот развој на земјата како земјоделство и рурален развој, безбедност на храната, ветерина и фитосанитарна политика, рибарство, регионална политика и координација на структурните инструменти, како и финансиските и буџетски одредби.
„Во текот на овие четири дена од објаснувачкиот скрининг за Кластер 5, експерти на Европската комисија ќе ги презентираат пред делегациите на Северна Македонија и Албанија новите директиви и регулативи од легислативата на ЕУ донесени после 2018 година, а нашата делегација треба да ја посочи временската рамка, во која се очекува земјата да ја усвои и вметне новата легислатива во националното законодавство“, велат од Секретаријатот за европски прашања.
Земјава досега го заврши билатералниот и објаснувачки скрининг за четири кластери или вкупно 26 поглавја и три области.
До ноември годинава, останува да се комплетира и билатералниот скрининг за последните два кластери – „Ресурси, земјоделство и кохезија“ и „Надворешни односи“.
