Узурпаторите продолжуваат да ги принудуваат граѓаните да плаќаат на дивиот паркинг позади поликлиниката „Бит Пазар“, и покрај тоа што вчера МВР им поднесе кривични пријави, објавува Порталб, кој прв го обелодени случајот пред пет месеци.
Министерството за внатрешни работи (МВР) вчера поднесе кривична пријава против две лица за „узурпација на имот“ и „неправедно градење“, откако државното земјиште беше претворено во див паркинг на кој се наплатуваше. И покрај ова, узурпаторите продолжуваат да собираат пари од граѓаните.
Според денешните видео-снимки на Порталб.мк, може да се види дека и покрај вчерашната контрола од полициски службеници и инспектори на Државниот инспекторат за труд и на Управата за јавни приходи, државниот простор продолжува да биде место каде што се извршуваат незаконски дејствија.
Во отворените кабини на нелегалниот паркинг стојат лица во работнички униформи, додека во близина на рампите има луѓе кои незаконски им земаат пари на граѓаните кои сакаат да ги паркираат своите автомобили. Узурпаторите не даваат фискални сметки, а цената на услугата е иста како претходно – 50 денари за еден час, 100 денари за цел ден.
Истражувањето на Порталб.мк докажа дека земјиштето позади поликлиниката „Бит Пазар“ е државно и истото незаконски се користи како паркинг со наплата. Институциите меѓусебно се обвинуваа за тоа кој треба да постапи, иако земјиштето се наоѓа на територијата на Општина Чаир и според децентрализацијата, таа е и надлежна да постапи.
Овие импровизирани паркинзи се наоѓаат на земјиштето на поликлиниката и за нив поликлиниката нема издадено никаква дозвола за користење.
