Иран се враќа на светската економска сцена откако Соединетите Американски Држави, Европската унија и Обединетите нации ги укинаа санкциите против земјата. Овој чекор следува по објавата на Меѓународната агенција за атомска енергија дека Иран ги исполнил сите обврски од договорот со меѓународната шесторка за иранската нуклеарна програма, склучен во јули минатата година.
Изразувајќи огромно задоволство во обраќањето до нацијата во парламентот во Техеран, претседателот Хасан Рохани порача дека во наредните месеци договорот ќе биде во целост имплементиран.
По објавувањето на веста за укинување на санкциите кон Иран, синоќа во Виена, американскиот државен секретар, Џон Кери, високата претставничка за надворешна политика на ЕУ, Федерика Могерини, и шефот на иранската допломатија, Мохамад Џавад Зариф, оценија дека станува збор за историски важен договор со кој се гарантира безбедноста на светот.
