Туристичката дејност која се најде меѓу првите најпогодени од пандемијата со корона вирусот, продолжува да бележи катастрофални резултати. Според денешните податоци на Државниот завод за статистика, ДЗС, во јуни бројот на туристите изнесувал 5.210, а на остварените ноќевања 14.179. При тоа, туристи имало за 95,6 отсто помалку во споредба со истиот месец лани, а остварени ноќевања за 94,6 отсто.
Бројот на домашните туристи, пак, во јуни оваа година, во однос на истиот месец минатата година, е намален за 88,9 отсто, а на странските туристи е помал за 97,9 отсто.
Домашните туристи оствариле за 90,1 отсто помалку ноќевања, а странските за 96,6 отсто, споредено со месец јуни 2019 година.
Во првите шест месеци од годинава, јануари-јуни, во однос на истиот период од претходната година, бројот на туристите е намален за вкупно 71,8 отсто и тоа: кај домашните туристи падот е 64,8 отсто, а кај странските 74,8 отсто. Во шесте месеци од 2020 година, во однос на истиот период од 2019, вкупниот број на ноќевањата е помал за 71,3 отсто, кај домашните туристи намалувањето е за 64,1 отсто, а кај странските 75,3 отсто, објави ДЗС.
