Премиерот Алексис Ципрас е одлучен до крајот на неделата да се дојде до решение што ќе ја задржи Грција во еврозоната.
По завршувањето на Самитот на ЕУ, премиерот образложи дека европските лидери слушнале грчки предлози, односно националната стратегија која беше договорена на лидерската средба во понеделникот во Атина, од владата, ПАСОК, Нова демократија, Река и од Независни Грци.
Ципрас со малку посветол тон од европските партнери, истакна дека предлозите и реформите што ги нудат се одржливи и социјално праведни за грчкото општество, а во исто време и во насока на задржување на Грција во еврозоната.
Забележа дека во нив има суштински реформи, инвстициски пакет за справување со невработеноста, план за исполнување на финансиските обврски и почеток за суштински разговор за реконструкција на грчкиот долг.
Грчкиот премиер најави дека целата процедура за поднесување на предлозите, односно барањето за нова програма ќе почне уште во следните часови, за до крајот на неделата да има решение кое ќе ја задоволи волјата на грчкиот народ и договорот со мнозинството од грчките политички лидери за одржливо решение.
– Сите разбираат дека немаме грчки, туку европски проблем на кој сме повикани да дадеме решение – истакна Ципрас.
