Студентите од техничките факултети ја бојкотираа наставата еден ден пред седмиот пленум наречен „Автономна зона“, на кој треба да се дискутира за окупација на универзитетите. На официјалната фејсбук-страница на „Студентски пленум“ стои соопштение за бојкот на техничките факултети.
„Бојкотот на техничките факултети е успешен! Ајде пленумци, битката за подобро високо образование е далеку од завршена“, стои на фејсбук-страницата.
Денеска во Собранието треба да се гласа за одложување на примената на последните измени на Законот за високото образование. Седницата беше најавена за 13 часот, но сè уште не е почната.
Вчера за „Мета“ од „Студентски пленум“ рекоа дека се подготвени за окупација, но дека за тоа ќе одлучат утре, в среда, на седмиот пленум.
– На пленумот в среда ќе се дискутира за тоа дали да се окупира универзитетот и одлуката ќе зависи од расположението на студентите. По ветувањето од Владата дека ќе се формираат работни средби од двете страни за носење нов закон за високо образование, сè уште нема конкретна најава за таква средба. Такви ветувања сме виделе и порано, но засега сè останува само на најава – рече Анастасија Петреска од „Студентски пленум“.
За пленумот најавен за утре, на фејсбук-страницата стои дека одложувањето на примената на членовите од законот е само прв чекор кон она што го бараат студентите, а тоа е нов закон со кој системски ќе се ревидира концептот на високо образование.
„Ветувања чувме, но немаме намера да седиме дома и да се надеваме дека кармата ќе го стори останатото. До овде стигнавме затоа што сложни, гласно, на сите начини се спротиставуваме на наметнатите реформи во високото образование“, стои во соопштението.
