Presidenti Gjorgje Ivanov fjalimin vjetor solemn sot në Parlament ia kushtoi krizës politike në Maqedoni, sfidat me të cilat ballafaqohet bota, ekstremizmi, kriza e refugjatëve dhe emigrantëve.

Ivanov tha se po lëmë pas nesh vit ku Maqedoni është ballafaquar me sfida të shumtë, si në plan global ashtu edhe në atë vendor. Presidenti shtoi se vitin e kaluar vendi është ballafaquar me tre kërcënime, krizën politike, në planin e sigurisë dhe krizën e refugjatëve.

Ai përmendi gjithashtu Marrëveshjen e Përzhinos, rekomandimin e kushtëzuar për Maqedoninë dhe anëtarësimin e Maqedonisë në NATO.

Ivanov tha gjithashtu se në 6 vitet e kaluara në Maqedoni ka pasur tre kriza politike, secila më e thellë se ajo më herët. Ai përkujtoi se në fjalimin e tij të vitit të kaluar ka thënë se dialogu duhet të jetë fjala kyçe në vitin që lëmë pas, por sipas presidentit, i njëjti ka ngecur ndërsa ajri politik është i ndotur nga dyshimet saqë ka filluar të ngufat shoqërinë.

Sipas tij, raporti i BE-së është objektiv madje edhe pjesa ku përmendet kultura politike e ndasisë, që është emri elegant për mos- kulturën politike. Ai shtoi se kjo është mësim se si nuk duhet të sillen partitë politike. Sipas presidentit, ashtu siç mungesa e dialogut politik ka sjellë krizë politike, ashtu kriza ka hapur derën për kërcënime në pjesën e sigurisë.

Për krizën e emigrantëve dhe refugjatëve, presidenti tha se është një prej sfidave më të mëdha me të cilën ballafaqohen shtetet dhe njerëzimi në 50 vitet e fundit. Sipas tij, BE ishte e shqetësuar për rastin me emigrantët ndërsa Maqedoni pësoi pasojat nga lëshimet e BE-së.

Në fjalimin vjetor, Ivanov foli edhe për mediumet ku përmendi se mediumet janë ndërgjegjja e shoqërisë dhe për këtë shkak duhet të jenë revizori më u fuqishëm në funksionimin e institucioneve.