Numri i aksidenteve në trafik, ku janë përfshirë çiklistë, brenda periudhës prej një dekade e gjysmë pothuajse është dyfishuar. Të dhënat e Entit Shtetëror Statistikor tregojnë se në vitin 2019, tre çiklistë kanë humbur jetën në aksidente trafiku, ndërsa 232 çiklistë janë lënduar. Ky numër është më i ulët në krahasim me vitin 2018, por dukshëm më i lartë nëse shikoni statistikat e çiklistëve të lënduar dhe të vrarë për periudhën e një dekade e gjysmë më parë, njofton Meta.mk.
Një dekadë e gjysmë më parë, në vitin 2004, në aksidente të trafikut jetën e kanë humbur nëntë çiklistë, ndërsa 167 kanë qenë të lënduar. Në periudhën para vitit 2004 madje ka numër edhe më të ulët të vdekjeve dhe lëndimeve. Sidoqoftë, në periudhën e kaluar prej një dekade e gjysmë, rreziku që çiklistët të pësojnë në trafik është rritur dhe kjo rritje ka qenë paralelisht me rritjen e numrit të automjeteve të regjistruara në vendin tonë, por edhe me rritjen e shkeljeve të rregullave të trafikut nga drejtuesit.
Statistikat tregojnë se numri më i madh i çiklistëve të vrarë dhe të lënduar janë në grupmoshën 25 deri në 64 vjeç (gjithsej tre të vdekur dhe 125 të plagosur në vitin 2019), e pas tyre është grupmosha mbi 65 vjeç, me 33 të lënduar gjatë vitit të kaluar.
Maqedonia është një nga vendet e pakta evropiane ku nuk është ndërtuar rrugë e veçantë për biçikleta për të lidhur dy qytete në vend, dhe nuk ka as shtigje biçikletash që lidhin periferitë e afërta me qytetet. Ekziston një hapësirë e veçantë për çiklistët të lëvizin vetëm në zonat urbane. Sidoqoftë, edhe në Shkup, disa vendbanime urbane, siç janë Radishani, Saraji dhe Draçeva, nuk kanë shtigje biçikletash që do të lejonin lëvizjen e pandërprerë të çiklistëve deri në qendër të qytetit dhe mbrapa.
