Исполнети се двата услови за да се одржи неопходна лидерска средба за спроведување на брзи, фер, слободни и демократски избори, вели портпаролот на СДСМ, Петре Шилегов.
– Исполнети се двата услови, а тоа е одложување на изборите поради неисполнети услови и укинување на аболицијата. Оттука се создадени услови за лидерска средба. Неопходно е да има лидерска средба или политички дијалог за што е можно поитно да се договорат и исполнат условите за да може Република Македонија да спроведе брзи, фер, слободни и демократски избори – додаде Шилегов.
Шилегов во изјавата за медиуми рече дека приоритет за Уставниот суд треба да биде уставноста на Законот за СЈО затоа што само така ќе се обезбеди непречена работа на единствената независна институција којашто вистински се бори против криминалот и корупцијата.
– Граѓаните знаат, Уставниот суд за само пет дена поведе постапка и за само седум дена да донесе одлука за иницијативата на ДУИ. Повеќе од осум месеци Уставен суд не прави ништо околу иницијативата за законот за СЈО и го држи во заложништво судството и владеењето на правото. Тоа е недозволиво. Никој не е над правото и над правната држава. Граѓаните мора да бидат сигурни дека пред законите се сите еднакви, исти се и граѓаните и политичарите. Само на тој начин Договорот од Пржино може да преживее – рече Шилегов.
