На новинарско прашање во врска со методологијата за прочистување на избирачкиот список, портпаролот на СДСМ, Петре Шилегов, истакна дека од партијата очекуваат „конечно искрен пристап од ВМРО- ДПМНЕ и од ДУИ во рамки на работните групи за да се усогласи методологијата, за да може ДИК да почне со постапката за прочистување на избирачкиот список“.
– СДСМ, како што знае целокупната македонска јавност, за време на разговорите, преговорите и на договорите во работните групи е единствената афирмативна политичка партија. Другите политички партии, особено ВМРО-ДПМНЕ, директно од посредникот во преговарите и од дипломатскиот кор се обвинети како луѓе што го бојкотираат процесот на имплементација на Договорот од Пржино – истакна Шилегов.
Тој додаде дека тие не се откажуваат од целосна теренска проверка.
– Доколку ДИК се формираше до крајот на септември, СДСМ ќе инсистираше на активна регистрација. Кога се проби тој рок од активната регистрација, бидејќи и ДУИ се противеше и немаше време, имајќи го предвид тогаш утврдениот термин за априлските избори, рековме дека ќе преминеме на целосна теренска проверка. Парцијални решенија не можат да доведат до целосно прочистување на избирачкиот список, со што ќе се доведе во прашање кредибилноста на изборите, коишто очигледно нема да можат да се одржат на 24 април – додаде Шилегов.