Единаесеттиот ден на протести на граѓанската иницијатива „Протестирам“ поради одлуката на претседателот Иванов да аболира 56 политичари од судски процеси, ќе почне во 18 часот пред СЈО, а ќе продолжи пред Уставен суд.

– Протестираме и денеска, гласно против режимот, здружено во целата наша шареноликост! Ако врне, понесете чадор и дојдете со нас! Во 18 часот се собираме на старо место, пред канцелариите на Специјалното јавно обвинителство, а потоа преку мостот Гоце Делчев маршираме до еден од симболите на неправда и на корумпираност, „неуставниот суд“ – се вели во најавата за протестот.

Вчера демонстрантите ја обоија новата зграда на Агенцијата за аудио и аудио-визуелни медиумски услуги и на Агенцијата за млади и спорт. Тие извикувајќи „Ова беше парк“ и „Боја“, фрлија неколку дестици топки со боја кон објектот, за да го обојат во боите на, како што велат демонстрантите, „Шарената револуција“, што симболично означува дека „Македонија се бои со слобода и со демократија“.