Покрај поранешниот градоначалник, во денешната полициска акција во Охрид приведени се и негови блиски соработници од општината, меѓу кои имало и жени, како и лица кои ги добивале тендерските договори за одредени активности во градот вредни околу два милиони евра, јавува охридското „Супер Радио“.
Градоначалникот бил под лупа на истражните органи откако минатата година ја загуби изборната трка за трет мандат. Тој во неколку наврати бил повикуван на разговор во СВР Охрид, додека се „чешлале“ документите од неговото финансиско работење како прв човек на општината.
Дека се испитува работењето на Општина Охрид во периодот кога со неа раководеше претходниот градоначалник потврди и директорот на Бирото за јавна безбедност (БЈБ), Митко Чавков кој за таа цел, на 27-ми мај минатата година во Охрид се сретнал со новото раковдство на општината, предводено од ВМРО-ДПМНЕ.
– Целта на посетата и на состанокот беше еден општ разговор околу одредени состојби кои се индикативни и кои укажуваат на постоење на криминални активности во претходното работење со општина Охрид, односно поврзано со работењето на претходниот градоначалник. Имаме првични информации за финансиски криминал, корупција и така натаму – изјави тогаш Чавков.
Како што потврди тој, во испитувањето на финансиското работење на општината тогаш била вклучена финанската полиција, а подоцна, како што појасни, ќе се прошири тимот со претставници од Јавното обвинителство на Република Македонија, од Јавното обвинителство за организиран криминал и со инспектори од СВР Охрид.
