Фактите говорат дека претседателката Сиљановска-Давкова положила венци во Рим, но на нив не пишувало „нашата земја“, туку „претседател Гордана Сиљановска-Давкова“ и на венците во никој случај не стоело знамето со Сонцето од Вергина, туку македонското, државно знаме, пишува Вистиномер.
Текстот го пренесуваме во целост:
Објава на Фесјбук тврди дека претседателката Гордана Сиљановска-Давкова, при посетата на Рим по повод денот на сесловенските просветители 24 Мај, положила венец на кој пишувало „нашата земја“ и на кој стоело знамето со Сонцето од Вергина.
Поздрав од Рим. НАШАТА ЗЕМЈА повторно горда!, стои во објавата која споделува и фотографија од наводно положениот венец.
Тврдењето изнесено во објавата не е точно, а фотографијата е фотошопирана.
Имено, фактите говорат дека претседателката Сиљановска-Давкова положи венци во Рим, но на нив не пишувало „нашата земја“, туку „Претседател Гордана Сиљановска-Давкова“ и на венците во никој случај не стоело знамето со Сонцето од Вергина, туку македонското, државно знаме.
Ова може да се провери доколку се посети официјалниот Фејсбук профил на Сиљановска-Давкова.
Една од објавите е од посетата на базиликата „Сан Клементе“ во Рим, во рамки на манифестацијата „Македонија во чест на Св. Кирил“, каде претседателката положила венец на гробот на сесловенските просветители, браќата Кирил и Методиј.
На фотографиите под објавата се гледа венецот кој го положила Сиљановска-Давкова и на кој се гледа дека пишува „Претседател Гордана Сиљновска-Давкова“ и на кој го има македонското знаме.
Во друга објава од Рим има објавено фотографии од посетата на базиликата „Санта Марија Маџоре“ каде, како што е наведено во објавата, „положивме цвеќе на спомен – плочата напишана на македонски јазик“.
Тука, всушност, се гледа фотографијата која е злоупотребена и фотошопирана, со цел да се манипулира јавноста и да се изнесуваат невистини.
На фотографијата јасно се гледа дека на венецот е напишано „Претседател Гордана Сиљновска-Давкова“ и дека на него го има македонското знаме.
Значи, не е точно дека на венецот кој го положила претседателката стоел напис „нашата земја“ придружен со знаме од Сонцето од Вергина, како што тврди објавата.
Поради сето ова, оценуваме дека објавата е погрешна.
