Со соопштение на македонски и на ромски јазик, претседателот Стево Пендаровски, го честиташе 5 ноември – Меѓународниот ден на ромскиот јазик. Тој на припадниците на ромската заедница во Република Северна Македонија им порача дека Ромскиот јазик е значаен дел од идентитетот на ромскиот народ.
„Тој претставува сведоштво за историјата на ромската заедница и придонесува во зачувувањето на нивната уникатна култура којашто со своите карактеристики ја збогатува севкупната културна ризница во нашата држава“, рече Пендаровски истакнувајќи го значењето на негувањето на ромскиот јазик како чувар на традицијата, фолклорот и културата.
„Прикажувајќи ја суштината на ромскиот начин на живот, нивните приказни и нивните вредности, ромскиот јазик претставува мост до разновидното наследство на ромската заедница“, рече Пендаровски.
Според него, унапредувањето на севкупниот образовен процес на децата Роми и обезбедувањето на соодветните услови е од клучно значење за натамошното негување на ромскиот јазик.
