Министерот за надворешни работи, Бујар Османи, вчеравечер во Охрид, под мотото: „Мудро е да имаш добри односи со соседите, но вистинска победа е да ги имаш за пријатели“, ја почна новата регионална иницијатива „Б6, со првата неформална вечера на министрите за надворешни работи од регионот и нивните претставници.
„Намерата да се воспостави неформален „Б6“ формат на состаноци на министрите одговорни за надворешни работи беше за да се придонесе кон продлабочување на соработката и врските меѓу нас во областите на европската интеграција и областите од заеднички интерес. За да можеме да ги искористиме придобивките од засилениот политички дијалог меѓу ЕУ и ЗБ, ќе треба да ја интензивираме нашата меѓусебна координација за клучните области од заеднички регионален интерес“, истакна Османи.
Присутните министри и учесници го поздравија формирањето на „Б6“, карактеризирајќи ја како корисна рамка за меѓусебна координација. Беше заклучено, да се состануваат неформално во редовни интервали – барем еднаш во шест месеци. Состанокот треба да прерасне во форум за поедноставна, брза и непосредна комуникација на министрите за надворешни од регионот ќе биде налик на сличните форуми во рамките на европските земји, како што се Ц5 или В4“, соопшти МНР.