fbpx

Општина Центар не знае кој ја отстранил таблата со украинскиот град Севастопољ од „руското“ игралиште

-

Општина Центар не ја отстранила таблата со името на украинскиот град Севастопољ од детското игралиште со руска тематика позади Универзалната сала. Од општината немаат одговор на прашањето кој и зошто ја отстранил таблата со името на украинскиот град што се наоѓаше помеѓу имињата на руски градови.

„Досега немаме добиено информации за тоа кој ја отстранил таблата од игралиштето“, велат за Мета.мк од Општина Центар.

Меѓу таблите со руските градови Велики Новгород и Сочи стоеше и таа со името на украинскиот град Севастопољ. Таа беше целосно отстранета од детското игралиште кон крајот на декември 2021 г.; Фото: Мета.мк

Во однос на тоа кој ја финансирал изградбата на детското игралиште со руска тематика, од општината велат дека најголем дел од средствата (над 40.000 евра или повеќе од 90 отсто од вкупната сума) дошле токму од општинските власти, односно од буџетот на граѓаните на оваа општина. Руската амбасада во Скопје дала само 150.000 денари или околу 2.500 евра.

„Општина Центар ја финансираше реконструкцијата на игралиштето со 2.481.928 денари, а Амбасадата на Руската федерација учествуваше со дополнителни 150.000 денари“, велат од Општина Центар за Мета.мк.

Локалните власти додаваат дека Одлуката за реконструкција на игралиштето ја има во Годишната програма за работа за 2021 година на Секторот за уредување на градежно земјиште во Општина Центар. Истата таа програма е поднесена до Советот и одобрена од страна на минатиот состав на Советот на Општина Центар.

Од Општина Центар посочуваат дека во однос на правниот статус на градот Севастопољ, тие во целост ги поддржуваат одлуките на Владата на РСМ и надлежното Министерство за надворешни работи.

Македонскиот министер за надворешни работи Бујар Османи на 31 јануари годинава на средбата со рускиот амбасадор во Скопје, Сергеј Баздникин го повтори ставот дека Северна Македонија ги почитува суверенитетот и територијалниот интегритет на Украина во меѓународно признатите граници, а политичка поддршка за украинскиот суверенитет и територијалниот интегритет неколку дена подоцна пристигна и од премиерот Димитар Ковачевски, кој на 3 февруари годинава се сретна со генералниот секретар на НАТО, Јенс Столтенберг.

Детското игралиште со руска тематика предизвика своевиден дипломатски скандал во земјава, бидејќи во негови рамки беше вметната табла со името на украинскиот град Севастопољ. Станува збор за најголемиот град на полуостровот Крим на Црното море, кој беше анектиран од страна на Руската Федерација и за кој се води спор за нарушување на меѓународното право и територијалниот интегритет на Украина.

Претходниот градоначалник Саша Богдановиќ во октомври објави, а Руската амбасада во Скопје потврди дека детското игралиште со руска тематика е заеднички финансирано од Општина Центар и од Руската амбасада во Скопје.

Мета.мк пред Нова Година ја контактираше Украинската амбасада во Скопје, од каде потврдија дека за поставената табла со името на градот Севастопољ на руското игралиште реагирале и до Министерството за надворешни работи (МНР) и до Градот Скопје.

„Амбасадорката на Украина во земјава г-ѓа Наталија Задорожњук оствари и низа релевантни средби во МНР каде го изрази ставот за недозволивото учество на официјални претставници од Северна Македонија, посебно раководството на Општина Центар, во обидот на руската страна да го легализира статусот на привремено окупираните територии на Автономната Република Крим и г. Севастопољ како посебен субјект на Руската Федерација“, информираа од Украинската амбасада.

Оттаму ни рекоа дека од МНР го потврдиле својот цврст став за поддршката на Северна Македонија на територијалниот интегритет и суверенитет на Украина, но и од МНР ги увериле дека ова прашање ќе биде решено.

Од Град Скопје и од МНР до денеска Мета.мк не доби одговор на поставените прашања во врска со руското игралиште.

Изминатиов период речиси секојдневно има јавни реакции од Украинската и Руската амбасада во Скопје, во кои се пренесуваат изјавите на официјалните државни функционери на двете земји во врска со можен нов руски напад врз Украина.

Нашите вести во вашето сандаче

Секој ден во 17 ч. добивајте ги вестите од Новинската агенција Мета директно на вашата електронска адреса.

Ве молиме одберете на кој начин сакате да добивате информации од нас:
Можете да се отпишете од оваа листа преку линкот на крајот од нашите пораки.

„Шорткат“: Апликацијата ДИА како асистент на лицата со дијабетес

Во вечерашното издание на емисијата „Шорткат“ ги имаме Ѓорѓина Ристовска и Марио Мијатовиќ - млади иноватори кои ја креираа апликацијата ДИА, како асистент на лицата со дијабетес. Инспирирани од...