Во продолжение ја пренесуваме проверката на „Вистиномер“ на исполнетост на изборно ветување на сегашната градоначалничка на Скопје, Данела Арсовска:
Ветување: Бесплатен јавен автобуски превоз
Сообраќајниот хаос во Скопје ќе биде минато доколку имаме лесно достапен и бесплатен јавен превоз. Предвидуваме ЦЕЛОСНО БЕСПЛАТЕН квалитетен јавен градски автобуски превоз што ќе се реализира етапно во период на прилагодување. Скопјани тогаш ќе имаат еколошка алтернатива на автомобилите и ќе знаат да го направат вистинскиот избор.
[Извор: Изборна програма на Данела Арсовска – „За модерно Скопје“(стр.8); датум: октомври 2021 г. ]
ОБРАЗЛОЖЕНИЕ:
Бесплатен јавен автобуски превоз, вети градоначалничката на Скопје, Данела Арсовска во кампањата за локалните избори кои се одржаа на 17 октомври минатата година. Ова ветување на Арсовска, наведено во нејзината изборната програма, „За модерно Скопје“, стр.8, со којашто ја бараше довербата за локалните избори во 2021 година, досега (26.09.2022) е неисполнето.
Ова е еден од приоритените проекти на Арсовска кои таа ги најави за време на изборната кампања, уверувајќи ги скопјани дека на тој начин ќе се реши сообраќајниот хаос во градот.
Сообраќајниот хаос во Скопје ќе биде минато доколку имаме лесно достапен и бесплатен јавен превоз, ветуваше Арсовска пред да дојде на градоначалничката функција.
Сепак, тоа досега не се случи. Бесплатен градски превоз нема за сите граѓани, туку како и претходно, бесплатно во автобусите се возат учениците, студентите на додипломски студии и пензионерите кои оваа можност ја користат четири дена во неделата – вторник, петок, сабота и недела. Бесплатинот превоз за овие категории граѓани беше укинат пролетта 2020 година поради заштита од ширење на коронавирусот, а повторно е вратен на крајот на март оваа година по разлабавувањето на ковид мерките.
Билетот за автобуски превоз за едно возење за сите линии, според тарифниот систем на ЈСП чини 35 денари со електронска картичка, а доколку се плати со мобилен телефон е 40 денари. Билет за десет возења со важност од 15 дена за градските линии во Скопје чини 250 денари, а за сите линии 300 денари.
Па, со оглед на тоа што јавниот автобуски превоз не е бесплатен за сите граѓани на Скопје, ова ветување на градоначлничката Арсовска го оценуваме како неисполнето.
Во изминатиот период опозицијата повеќепати ја критикуваше Арсовска за неисполнување на ова изборно ветување. Таа, пак, во своите настапи вели дека не се откажла од проектот и уверува дека ова ветување ќе се реализира етапно, во фази во наредните две години.
Инаку, нејзиниот претходник и противкандидат за градоначалничкото место во Скопје, Петре Шилегов, овој предлог на Арсовска тогаш во кампањата за локалните избори го оцени како популистички, нагласувајќи дека ако Град Скопје буџетски да го финансира целокупниот јавен превоз, тогаш нема да останат пари за другите активности на градот.
ИЗВОРИ:
- Изборна програма на Данела Арсовска – „За модерно Скопје“(стр.8) (октомври 2021): [Проверено на: 26.09.2022]
- 360 степени (28.09.2021): Арсовска ветува бесплатен јавен превоз [Проверено на: 26.09.2022]
- Официјална Фејсбук страница на Данела Арсовска (28.09.2021) Бесплатен јавен градски автобуски превоз за сите граѓани на Скопје : [Проверено на: 26.09.2022]
- Тајм.мк (11.03.2020): Се укинува бесплатниот автобуски превоз во Скопје за пензионерите, учениците и студентите [Проверено на: 26.09.2022]
- Тајм.мк (23.03.2022): Oд петок се враќа бесплатниот јавен превоз, за пензионери, средношколци и студенти [Проверено на: 26.09.2022]
- Официјална страница на ЈСП – Ценовник [Проверено на: 26.09.2022]
- Макфакс (14.02.2022): (Видео) Шутаров: Сѐ уште нема 250 нови автобуси, ниту бесплатен јавен превоз [Проверено на: 26.09.2022]
- Макфакс (11.04.2022): СДСМ: Наместо бесплатен автобуски превоз, Арсовска во време на криза воведе поскап билет од 120 денари [Проверено на: 26.09.2022]
- МКД (12.05.2022): СДСМ: Арсовска не само што не воведе бесплатен превоз, туку нема ни автобус за Шуто Оризари [Проверено на: 26.09.2022]
- Република (10.03.2022): Арсовска: Бесплатен јавен превоз ќе има! [Проверено на: 26.09.2022]
- 360 степени (17.12.2021): Арсовска: Проектот за бесплатен јавен превоз ќе се реализира за две години [Проверено на: 26.09.2022]
