Богатиот научен и книжевен фонд на библиотеката на МАНУ од сите области, отсега на интернет ќе биде лесно достапен за домашната и за светската јавност на македонски јазик.
Со неодамнешното потпишувањето на меморандумот за соработка меѓу МАНУ и „Споделено знаење“, застапник на светската фондација „Викимедија“, во библиотеката на МАНУ ќе се воспостави функцијата „матичен википедијанец“.
– Главна задача на матичниот википедијанец во библиотеката на МАНУ ќе биде наоѓање и употреба на материјали од богатиот научен книжен фонд од сите научни области за поквалитетно, веродостојно и референцирано уредување и создавање статии на слободната интернет-енциклопедија „Википедија“ на македонски јазик, а воедно и отсликување, односно скенирање и дигитализирање на книги во согласност со авторските права, кои потоа ќе бидат достапни за слободно користење на широката научна и општествена јавност – објаснува Марио Шаревски, магистер по геополитика и волонтер за организациски работи во секретаријатот и во библиотеката.
Од 2010 година, светската фондација „Викимедија“ го почна проектот за воспоставување ваква соработка со врвните научни и образовни установи во светот, за уредување и за споделување поквалитетни и поверодостојни податоци.
Досега се опфатени повеќе од 110 институции, меѓу кои Британскиот музеј, Националниот архив на САД, националните библиотеки на Велика Британија, Данска, Израел.
По потпишување ваков договор со Државниот архив, МАНУ е втора установа во Македонија во која ќе се воспостави матичен википедијанец.
