Министерот за здравство Фатмир Меџити на својата страница на социјалната мрежа Фејсбук напиша дека го решава „наследениот проблем со недостаток на ленти за мерење на шеќер во крвта“. Меџити информираше дека на пат кон државата е „доволна количина која ќе ги задоволи потребите на дијабетичарите“.
Од Министерството за здравство преку соопштение велат дека дијабетичарите веќе во текот на следната недела ќе може да ги набават лентите за мерење шеќер во аптеките.
Министерот во својата објава додава дека се прават и максимални напори за наскоро да пристигнат и сензорите за дијабет кои ќе може да ги користат децата за безболно мерење на шеќер.
„Со ова ќе исполниме едно од најзначајните барања на дијабетичарите. Им се заблагодарувам на трпението на пациентите и жалам за настанатата ситуација која е резултат на непостапувањето и негрижата на Беким Сали. Како што ветив, додека сум јас министер доцнење на лекови кои ги обезбедува Министерството за здравство нема да има“, пишува Меџити во својата објава на социјалната мрежа Фејсбук.
