Aко може во Скопје да има и лавови и бикови, можеби цела зоолошка градина, зошто да не и двоглавиот орел кој е од овој крај. Поставени се стотина споменици од другата страна, каде реално еден Македонец и не ги познава повеќето од нив кои се и што се. А во Чаир во овие десет години ги поставивме Скендер-бег, Хасан Приштина и двоглавиот орел – вели градоначалникот на Чаир, Изет Меџити, во неделното интервју на „Радио Слободна Европа“.
Во однос на поставувањето на крстот, пак, вели дека „и да бил одговор на двоглавиот орел, логично било таму да се постави лав или некој етнички симбол на Македонците.“
– Наш став е дека не смеат да се злоупотребуваат верските симболи за дневна политика. Но, ризично прашање е и нема сила за да нè упати ние да влеземе во таква игра и да возвратиме со минариња или друго. Бидејќи Албанците припаѓаат на три верски заедници. Ние цениме дека минарето треба да биде до џамија, а крстот над црква или манастир. Не е место на крстот или на минарето сред крстосница или на улица – смета Меџити.
