fbpx

Макрон: Поразот на Русија во Украина е од суштинско значење за безбедноста во Европа

Ова е првпат да има отворена дискусија државите колективно да разгледуваат обезбедување на трупи за поддршка на осиромашената украинска воена сила, додека руските трупи напредуваат

-

Францускиот претседател Емануел Макрон вчера рече дека не ја исклучува можноста за испраќање копнени трупи во Украина, но додаде дека нема консензус за таков чекор. Тој ова го изјави на состанокот на 20 главно европски лидери во Париз, кој го свика за да се засили европскиот одговор на напредокот на руската војска во Украина, пренесува Гардијан.

Макрон кажа дека е клучно за безбедноста на Европа да се победи Русија во Украина, јавува Би-би-си.

„Според ова, ништо не треба да биде исклучено. Ќе направиме сè што можеме за да се осигураме дека Русија нема да надвладее“, рече Макрон.

Ова е првпат да има отворена дискусија државите колективно да разгледуваат обезбедување на трупи за поддршка на осиромашената украинска воена сила, додека руските трупи напредуваат.

Францускиот претседател рече дека сојузниците не се во војна со рускиот народ, туку не сакаат да ѝ дозволат на Русија да победи.

„Има промена во ставот на Русија. Се стреми да заземе понатамошна територија и ги има погледите не само кон Украина, туку и кон многу други земји, така што Русија претставува поголема опасност“, рече Макрон на крајот од состанокот.

Инсистирајќи дека поразот на Русија е суштински за мирот и безбедноста во Европа, Макрон рече дека е неопходно Европа да премине од зборови на дела за да се донесат јасни одлуки за изградба на европски одбранбен столб независен од Америка.

„Не можеме да го чекаме исходот од американските избори за да одлучиме каква ќе биде нашата иднина. Во прашање е иднината на Европа, па затоа на Европејците е да одлучат. Ако другите сакаат да се приклучат и да помогнат, фантастично, но тоа е само дополнителен бонус“, кажа Макрон.

Меѓу присутните на состанокот беа германскиот канцелар Олаф Шолц, министерот за надворешни работи на Обединетото Кралство Дејвид Камерон, полскиот претседател Анджеј Дуда и холандскиот премиер Марк Руте. Присуствуваа и помлади претставници од САД и Канада.

На средбата, присутните се согласиле да се фокусираат на пет клучни области: сајбер одбрана, заедничко производство на воено оружје и муниција во Украина, одбрана на земјите директно загрозени од руски офанзиви како Молдавија, поголема воена заштита на Украина на нејзината граница со Белорусија и деминирање на Украина.

Макрон кажа дека европските лидери се согласиле да формираат коалиција за да ѝ дадат на Украина бомби и ракети со среден и долг дострел.

Минатиот викенд, украинскиот министер за одбрана рече дека половина од целата помош на Западот за Киев е одложена, што чинеше загуба на животи и територија.

Украинскиот претседател Володимир Зеленски, кој исто така учествуваше на состанокот преку видео врска, рече дека „сè што правиме заедно за да се одбраниме од руската агресија, додава вистинска безбедност на нашите нации во децениите што доаѓаат“.

Макрон рече дека во моментов 30 отсто од целото финансирање на Украина доаѓа од Европа, додавајќи дека финансирањето може да се зголеми преку дополнителни билатерални договори и договори на ниво на ЕУ.

Нашите вести во вашето сандаче

Секој ден во 17 ч. добивајте ги вестите од Новинската агенција Мета директно на вашата електронска адреса.

Ве молиме одберете на кој начин сакате да добивате информации од нас:
Можете да се отпишете од оваа листа преку линкот на крајот од нашите пораки.

Лага е дека САД финансираат украински нацисти

Тврдењата дека САД финансирале украински нацисти, а Путин исправал некакви неправди во Украина и почнал операција за денацификација, се неточни и имаат за цел само да ја оправдаат руската воена агресија....