Камен-темелник на новиот водоводен систем денеска беше ставен во општина Шуто Оризари.
Проектот предвидува изградба на резервоар од 4.350 кубни метри во близина на постојните резервоари на ЈП „Водовод и канализација“ на улицата Гвадалахара, пумпна станица кај поранешната фабрика на „ТИПО“ на булеварот Словенија, цевковод со должина од 2,3 километри, со профил од 500 милиметри кој ќе води од пумпната станица, па по улиците Шуто Оризари, Виничка, Че Гевара, Плаковица и Бутелски венец. Пумпната станица ќе се поврзе на градската доводна линија од изворот Рашче. Изградбата на водоводот во Шуто Оризари претставува заеднички проект на Градот, ЈП „Водовод и канализација“ и на Општина Шуто Оризари.
Вкупната вредност на инвестицијата изнесува 182.367.800 денари. Во финансирањето на проектот Градот ќе учествува со 79,7 милиони денари, со исто толку пари и „Водовод и канализација“, а Општина Шуто Оризари со 22,9 милиони денари.
Градот ќе ги обезбеди финансиските средства по пат на заем од Светска банка, додека ЈП „Водовод и канализација“ од сопствени извори.
