Одредбата во предложениот закон за плати на јавните обвинители, која го овластува јавниот обвинител на Република Македонија, по претходна согласност од министерот за финансии, да одлучува за додатоците на јавните обвинители во Специјалното јавно обвинителство, се кршат воспоставените принципи на автономност и на финансиска незвисност на ова oбвинителство, стои во денешното писмено обраќање до јавноста на специјалната обвинителка Катица Јанева.

„Законот за јавното обвинителство за гонење кривични дела поврзани и што произлегуваат од содржината на незаконското следење на комуникациите јасно ги предвидува додатоците за јавните обвинители во ова јавно обвинителство, а нивната реализација никако не може да биде поврзана со согласност од министерот за финансии, од причина што Министерството за финансии е должно финансискиот план за работа на ова јавно обвинителство да го вгради во буџетот и не може никако да го менува. Воедно, принципот на автономност подразбира мое автономно постапување како специјален јавен обвинител и исклучено е секакво влијание во работата од страна на јавниот обвинител на Република Македонија. Оттука очекувам во предложениот закон за плати на јавните обвинители да биде изоставено ова јавно обвинителство“, стои во дописот на Јанева.

Специјалната обвинителка, исто така, ги повикува и бара од сите политички партии да го поддржат законот за јавнообвинителска служба на специјалното обвинителство, со што би ги искажале „своите искрени намери за непречено и функционално работење на ова јавно обвинителство“.

„Автономното, независно и професионално функционирање на специјалното обвинителство може да се обезбеди само со доследно почитување на веќе воспоставените принципи за негова работа и со исполнување на законските обврски и со носење на законот за јавнообвинителска служба на ова јавно обвинителство“, се вели во дописот.

Јанева информира и дека во текот на оваа недела ќе бидат соопштени нови информации за работата на специјалното обвинителство, кои изминатиов период предизвикуваат интерес во јавноста.