Македонското Министерство за надворешни работи информира дека е откриен сторителот на вчерашниот напад врз Б.К. од струшкото село Лабуниште. Во текот на вечерните часови, со осомниченото лице за нападот, А.Н. од Велешта, бил извршен службен разговор и известен е јавниот обвинител.
Од македонското МНР апелираат за воздржаност од предвремени квалификации до моментот на целосно расчистување на случајот.
„Овој настан не смее да фрла сенка врз институционалните напори за негување на правата и интересите на помалите заедници, вклучително и напорите за уставно правно загарантирани права за нив, меѓу нив и Бугарската заедница. Ја повикуваме јавноста и политичките субјекти од соседна Бугарија да им овозможат на институциите на државата да ги расчистат околностите на настанот и соодветно процесуираат, согласно законската регулатива“, стои во соопштението на македонското МНР.
Реакцијата на македонското МНР следи откако бугарското Министерство за надворешни работи информираше дека испратиле вработен од Генералниот конзулат во Битола за да го расчисти случајот во Струга, односно да се установи дали овој инцидент има етничка позадина.
Лицето Б.К. од Лабуништа е копретседател на Здружението на Бугарите во Македонија „Шемето“. Од СВР Охрид го потврдија случајот на физички напад, информирајќи дека нападнатото лице веднаш по инцидентот било хоспитализирано во болница.
