Европа сериозно ја разгледува кризата што ја предизвикаа хрватските власти со одлуката за 22 пати да се зголемат таксите за фитосанитарна контрола на увозот на овошје и на зеленчук од трети земји, меѓу кои Македонија.
Како што јавува српскиот портал „Новости“, се очекува многу набргу Брисел да го изнесе својот став и да се обиде да ја реши кризата, од која се погодени и Србија и Босна и Херцеговина.
– ЕУ го поддржува развивањето на трговски и на економски интеграции. Сите страни мора да ги почитуваат своите обврски. Во контакт сме со властите на државите на кои се однесува ситуацијата. Во моментов ја проценуваме ситуацијата – изјавиле од Брисел за „Новости“.
Хрватска на 14 јули ги зголеми надоместоците за фитосанитарната контрола на овошјето и на зеленчукот на нејзината граница од 12 на 274 евра, а притоа како причина го наведе усогласувањето со стандардите на Европската Унија. Србија и БИХ веќе реагираа до хрватските власти и до Брисел и најавија дека ако не се реши проблемот, ќе воведат контрамерки, но не соопштија какви.
Министерот за земјоделство, шумарство и водостопанство, Љупчо Николовски, вчера соопшти дека ќе достави нота до хрватското министерство за земјоделство и до Европската комисија. Тој најави дека в понеделник надлежните министри на Македонија, Србија и на Босна и Херцеговина ќе се сретнат во Сараево за да изградат заеднички став и за заедничка реакција до хрватската страна.
Вредноста на извозот на овошје и на зеленчук од Македонија во Хрватска е околу 5 милиони евра годишно. Најмногу се извезуваат свежи пиперки, зелка, домати, краставици, трпезно грозје и лубеници.
