Вицепремиерот за економски прашања Фатмир Битиќи вели деки последните проценки покажале оти на Македонија ѝ недостигаат околу 10.000 работници. Недостигот на работна сила најмногу се чувствува во градежништвото, хотелиерството и туризмот. За да се пополнат слободните работни места, Битиќи рече дека најпрво ќе се бараат доквалификации на работниот кадар во земјава, а ако има потреба, ќе се увезат и работници од странство.
Тој посочи дека владата преку оперативниот план за вработување, работи на различни форми на квалификација и доквалификација, за да го подготви домашниот работен потенцијал за пазарот на труд.
Владата во моментов разговара со стопанските комори, за тоа во кои гранки евентуално би се увезла работна сила.
„Просечната плата кај нас достигна 550 евра, платата каде што одат нашите работници да работат е 100 евра, а земјите од каде што најверојатно ќе доаѓаат работници во рударството, па и во градежништвото е просечни 200 евра“, вели Битиќи.
Иако засега не е дефинирано, тој смета дека недостигот на работници најпрво би требало да се решава со потрага од земјите во регионот, бидејќи веќе се склучени договори од иницијативите „Отворен Балкан“ и „Берлински процес“.
Вицепремиерот објаснува дека земјава се соочува со природен циклус на движење на работната сила, кој е диктиран главно од висината на платите.
