Граѓанското движење АВАЈА вчера одржа Марш за правда, откако Основниот кривичен суд Скопје донесе пресуда за случајот на полициска бруталност во Битола, со која обвинетиот полициски службеник е прогласен за виновен и е осуден на казна затвор од една година.
Протестот започна од пред Основниот кривичен суд Скопје, каде што Ремзи Медик, тим лидер на АВАЈА од Битола, ја објасни голготата низ која поминале жртвите на полициската бруталност, од прибирање на здравствена документација по претепувањето и односот на здравствениот систем, сѐ до притисоците кои ѝ се вршат на ромската заедница во Битола.
Протестот продолжи пред Основното јавно обвинителство, каде што пред присутните се обрати Селвије Мустафи. Таа упати порака до Јавното обвинителство за подеднакво третирање на пријавите против полициските службеници со останатите пријави.
Зера Аметова од АВАЈА, пак, ја поздрави одлуката на Основниот кривичен суд за донесената пресуда за една година казна затвор, побара Апелациониот суд да ја потврди истата одлука и додаде дека полициските службеници не се имуни пред правдата и фактите.
„Денес Ромите се борат за своите права со тоа што е пропишано. Денес тука сме сите собрани во име на сите жртви на полициска бруталност, на сите оние кои молчеле, на сите оние кои се плашат да говорат јавно за насилството, на сите оние кои не ја добиле правдата во судските постапки и за сите оние кои и никогаш не стигнале да ја имаат можноста за судска постапка“, рече Марија Сулејманова.
Минатата година во септември, во Битола обвинетиот полицаец Гоце Петковски при обезбедување на место на сообраќајна несреќа, го совладал Невзад Јашаровски. По завршувањето на судскиот процес, Судот констатираше дека полицаецот употребил прекумерна сила и го понижил Јашаровски и изрече ефективна казна затвор од една година за полициски службеник за прекумерна употреба на сила.
