Поголемата вклученост на жените во работната сила може да придонесе за побрз и поинклузивен економски раст, којшто може да е повисок и до 30 отсто во економиите во развој, имајќи го предвид вклучувањето дополнителна работна сила на пазарот на труд. Исто така, според истражувањата во оваа сфера, за тоа придонесуваат и посебните карактеристики и вештини со кои вообичаено располагаат жените како работнички, како повисоката одбивност кон ризик, прагматичноста, емпатијата и друго.
Ова го истакна гувернерката Анита Ангеловска-Бежоска на панел-дискусијата „Жени лидери“ којашто ја отвори претседателката на Словенија, Наташа Пирц Мусар, во организација на Центарот за извонредност во финансиите (ЦЕФ) во Љубљана, Словенија.
Настанот е во рамките на проектот „Ние водиме“, поддржан од ЕУ, а наменет е за поддршка на млади професионалци во регионот на Западен Балкан.
Во своето излагање, гувернерката посочи дека родовата нееднаквост сѐ уште претставува еден од клучните глобални предизвици, којшто по пандемијата стана уште поизразен.
„Во глобални рамки пандемијата доведе до укинување на 54 милиони работни места пополнети од жени, со што се намали стапката на учество на жените во работната сила на 47 проценти и се зголеми јазот во однос на мажите, чија стапка на учество во работната сила е 70 проценти. Во македонската економија учеството на жените во работната сила е околу 40%, додека оние жени кои се активни се помалку застапени на раководните позиции и се платени помалку од мажите за 20%“, рече Ангеловска-Бежоска.
Гувернерката нагласи дека, сепак, постојат и добри примери во нашето општество, како Народната банка, каде што 71 процент од раководните позиции во институцијата се пополнети од жени.
На панел-дискусијата учествуваа и министерката за стандарди и услуги на Албанија, извршната директорка на Центарот за европски политики во Србија и директорката на ЦЕФ.
