Две активистки на организацијата „Фемен“ викендов упаднаа на бината и прекинаа исламска конференција во близина на Париз, извикувајќи феминистички пароли на арапски и на француски јазик, пред да бидат совладани од петнаесетина мажи, кои насилно ги избркаа од сцената.
Активистките биле облечени во традиционални исламски наметки, за да можат да се доближат до бината, на која двајца фундаменталистички свештеници држеле предавање на тема „Дали сопругите треба да се тепаат или не?“. На снимката може да се види како жените на своите тела ги имаат напишано пораките „Никој не ме потчинува“ и „Јас сум својот пророк“.
По инцидентот ативистките се уапсени. Според портпаролката на Фемен, Ина Шевченко, полицијата ги заштитила активистките, на кои им се заканувал линч. Еден од мажите повикал „убијте ги“, а на снимката се гледа како ги клоцаат и ги туркаат. По испрашувањето во полиција, неидентификуваните активистки се пуштени на слобода, а организаторите на конференцијата најавија дека ќе ги тужат.