Локалната самоуправа во Охрид денеска по пат на електронско јавно наддавање го понуди на продажба градежното земјиште наменето за изградба на дом за стари лица во локалитетот Грашница.
Површината на градежната парцела е 8.425 квадратни метри, a површината за градење e 6.299 квадратни метри. Цената за еден квадратен метар изнесува 1.393 денари.
Право на учество на јавното наддавање имаат физички и правни лица, кои ги исполнуваат критериумите што ги поставија локалните власти.
Отуѓувањето на земјиштето се врши според одлука донесена од Советот на Општина Охрид во октомври минатата година, која беше усвоена од мнозинството советници, но без амин од опозицијата.
Опозицијата е со став дека одлуките за отуѓување на градежно земјиште, сопственост на државата за изградба на катна гаража, автобуска станица и на дом за стари лица не е во интерес на граѓаните.
Од локалната самоуправа напоменуваат дека отуѓувањето на земјиштето ќе се врши со строго дефинирана намена.
