Рускиот претседател Владимир Путин денеска оцени дека украинскиот напад врз областа Курск претставува сериозна провокација.
„Киевскиот режим започна уште една сериозна провокација“, им рекол Путин на членовите на руската влада, пренесува Ројтерс.
Путин рече дека украинските сили вршат недискриминирачки артилериски напади врз цивилни цели во областа Курск.
Претходно, вршителот на должноста гувернер на руската област Курск, Алексеј Смирноф, ги повика локалните жители да даруваат крв поради нејасните информации за упад на борци од Украина на територијата.
„Во последните 24 часа нашиот регион херојски се спротивстави на нападите на украинските борци“, напиша Смирнов на Телеграм, додавајќи дека сите служби за итни случаи се на готовност.
Руското Министерство за одбрана во вторникот објави дека околу 300 украински војници, поддржани од 11 тенкови и повеќе од 20 оклопни борбени возила, преминале во Русија.
Се вели дека тие сили претрпеле големи загуби, без да се дадат дополнителни детали. Киевските власти одбија да го коментираат настанот, соопштуваат светските медиуми.
Рибар, телеграмски канал управуван од Михаил Звинчук, пензиониран офицер за печат на руското Министерство за одбрана, рече дека украинските војници зазеле три населени места во регионот и продолжиле да напредуваат подлабоко на руска територија.
Друг воен блог кој го поддржува Кремљ, „Два мајора“, тврди дека украинските војници напреднале до 15 километри длабоко во областа.
Ниту едно од тврдењата не е независно потврдено.
Границата на Курската област со Украина е долга 245 километри, што им овозможува на диверзантските групи да започнат брзи упади и да заземат дел од теренот пред Русија да распореди засилување.
