Дополнителниот заменик-министер за внатрешни работи, Оливер Андонов, побара оставка од министерот Оливер Спасовски бидејќи, според него, Спасовски креирал криминално-полициска местенка за дискредитација на функционери на ВМРО-ДПМНЕ, меѓу кои, нагласи Андонов, веќе настрадал дополнителниот заменик-министер за труд и социјална политика, Диме Спасов.
– Имав средба со еден искусен новинар и бев запрепастен дека сме следени од лица кои се поставени од Спасовски. Истиот новинар тоа го посочи на социјалните мрежи. Беше следен и Спасов, за кој беше изрежиран инцидент. Од која причина и со која цел, дали во врска со активностите има поведено процедура за истражни постапки или тоа го прави по налог на менторот Зоран Заев? – праша Андонов.
