Екипи на Министерството за внатрешни работи (МВР) утрово спровеле акција за пронаоѓање лица поврзани со терористичката група од Диво Насеље, во рамките на која биле извршени претреси на повеќе локации во Скопско и во Кумановско.
Од МВР за „Мета“ ја потврдуваат акцијата и велат дека таа била спроведена по наредба на судија на претходна постапка за лоцирање лица кои се осомничени за терористичко загрозување на уставниот поредок.
– По налог на судија на претходна постапка, извршени се претреси на повеќе локации во скопскиот и во кумановскиот регион. Во акцијата нема приведени лица. Осомничените лица не се пронајдени и по нив се трага – велат за „Мета“ од МВР.
Оттаму додаваат дека при претресите се пронајдени повеќе предмети што ќе бидат доставени за анализа до Обвинителството за организиран криминал и за корупција.
Повеќе детали за денешната акција, од МВР најавуваат за подоцна во текот на денот.
