Нова најсовремена, најквалитетна и најсофистицирана клиничка болница ќе се гради во Штип, која воедно ќе биде современа здравствена установа за повеќе од 200.000 граѓани во тој регион, најави министерот за здравство, Никола Тодоров.
Ќе почне да се гради во средината на октомври 2015 година, а според прoцените ќе биде готова во средината на октомври 2017 година.
– Квалитетот на еден здравствен систем првенствено зависи од квалитетот и од знаењето на здравствените работници, квалитетот и софистицираноста на опремата, како и од квалитетот на здравствената инфраструктура. Денеска сакам да го промовирам проектот за изградба на најсовремената, најмодерната и најквалитетната здравствена инфраструктура во Македонија. Реализацијата на овој проект ќе значи изградба на болница со карактеристики и со функционалност какви што досега немало во Македонија. Изградбата на оваа болница ќе постави стандард кој ќе треба да се достигне не само во Македонија, туку и пошироко во регионот – изјави Тодоров.
Вчера од банката на Советот на Европа во официјалниот гласник на Европската унија беше објавен тендерот за градба на Клиничката болница во Штип.
Објектот ќе се гради на местото каде што во моментов се наоѓа штипската клиника и ќе претставува грандиозна енергетски ефикасна клиника на површина од 34.000 квадратни метри, која ќе има 17 амбуланти на осум нивоа, поврзани со 14 лифтови.
