!На 1 февруари 2017 година, завршува промотивниот период на слободно користење, без регистрација и без претплата, на содржините на „Мета“, кое беше воведено за да им овозможиме полесен пристап на корисниците до навремени и проверени вести. За начинот на пристап и за претплата, од 1 февруари 2017 година ќе информираме дополнително. При пренесувањето и преземањето на содржините од „Мета“, задолжително е атрибуирање и линкување.

Министерство за финансии: Намалена каматата на хартиите од вредност


Скопје, 10 јануари, 2017 - 16:28 (META) 

И покрај политичката пропаганда на СДСМ, кој настојува да ги прикаже државните хартии од вредност како нешто ненормално во јавноста, иако самите ги воведоа, довербата на инвеститорите во економските политики е огромна, што продонесе за намалување на каматата на државните хартии од вредност, се вели во реакцијата на Министерството за финансии на соопштението на СДСМ за задолжувањето.

Во него се додава дека инвеститорите побарале државни хартии од вредност во износ кој надминувал 5 милијарди денари, а Министерството запишало 1,9 милијарди денари во согласност со понуденото во проспектот.

– Како резултат на големата побарувачка на државните хартии од вредност на пазарот на капитал, каматата, односно цената што ја плаќа Министерството за финансии на инвеститорите е намалена за 0,2 процентни поени, што воедно е и најниската камата последниве години – се вели во соопштението на Министерство за финансии.

Во него се додава дека со буџетот за 2017 година предвидено е буџетскиот дефицит да се покрива и од домашни извори.

– Во моментот на пазарот на капитал има голема побарувачка за државните хартии од вредност, што значи дека тие можат да се издадат со пониска камата, односно со помала цена на капиталот – додаваат од министерството.


ВМРО-ДПМНЕ: Поради пропагандата на СДСМ, зедовме помалку средства со повисока камата


Скопје, 9 јануари, 2017 - 13:04 (META) 

СДСМ со својата шпекулативна политика и со манипулирањето со јавниот долг, не направи ништо друго освен што ја зголеми каматата на еврообврзницата, што македонските граѓани ги чинеше 30 милиони евра, се вели во реакцијата на ВМРО-ДПМНЕ на соопштението на СДСМ за утрешното задолжување.

– Тоа се 300 локални патишта, стотина градинки или 38 училишта, кои отидоа во ветер затоа што СДСМ не ги гледаше државните интереси, туку тераше партиска пропаганда со еврообврзницата. Единствено што СДСМ успеа да го направи пишувајќи писма до странските инвеститори за еврообврзницата е да ја зголеми цената на капиталот – каматата. Така, народски кажано, поради политичка пропаганда на СДСМ, земавме помалку средства, но по повисока цена – се додава во реакцијата на ВМРО-ДПМНЕ.


СДСМ: Власта во заминување за утре планира нови милионски долгови


Скопје, 9 јануари, 2017 - 10:27 (META) 

Владата во заминување сака утре да ги задолжи граѓаните 15 милиони евра повеќе од обврските што се стигнати за враќање оваа недела, се вели во соопштение на СДСМ.

Во него се додава дека Министерството за финансии, според најавената аукција, утре ќе побара 31,7 милиони евра, а за враќање се доспеани 15,8 милиони евра.

– Бараме од Кирил Миноски веднаш да објасни за кого и за што бара 15 милиони евра повеќе, што треба да ги враќаат граѓаните. СДСМ и со ограничените ингеренции во Министерството за финансии во Владата за организирање и за спроведување на изборите им заштеди на граѓаните повеќе од половина милијарда евра, или точно 570 милиони евра нов долг, без притоа да биде доведена во прашање редовната исплата на платите, пензиите, субвенциите, социјалната помош – се додава во соопштението на СДСМ.


СДСМ: Расипничкото трошење на Груевски ни остави јавен долг од 4,7 милијарди евра


Скопје, 1 декември, 2016 - 11:09 (META) 

„Расипничкото трошење на буџетските пари од страна на ВМРО-ДПМНЕ резултираше со историски највисок јавен долг во висина од 4,7 милијарди евра“, обвини денеска Социјалдемократскиот сојуз на Македонија.

Според СДСМ, огромниот јавен долг и непродуктивното задолжување се единственото наследство од десетгодишното владеење на Никола Груевски и на ВМРО-ДПМНЕ.

„Додека илјадници млади ја напуштаа земјата, а граѓаните преживуваа, Никола Груевски, Зоран Ставрески и Кирил Миноски неконтролирано ја задолжуваа државата за да си ги задоволат сопствените желби и каприци. Наместо да спроведуваат издржани економски политики, тие десет години се занимаваа со задолжување и со криење на долгот кон домашните компании. Груевски и ВМРО-ДМНЕ ја донесоа економијата пред бездната, а со расипничкото задолжување ги заглавија идните генерации да ги враќаат долговите направени заради популизам“, велат од СДСМ.

Оттаму истакнуваат дека новата влада предводена од СДСМ со буџетот ќе раководи транспаретно и одговорно, а криењето на јавниот долг ќе биде кривично дело.

„Ќе формираме независен фискален совет кој ќе обезбеди транспарентност во фискалната политика и кој ќе биде составен од независни експерти кои ќе се избираат во Собранието. Како најважна мерка против задолжувањето, ќе биде ставањето крај на непродуктивното задолжување. Никогаш повеќе Македонија нема да се задолжува за градење споменици, галии и панорамски тркала. Никогаш повеќе нема да се задолжува за да се финансираат скапи и неодржливи проекти“, стои во соопштението од најголемата опозициска партија.


Министерство за финансии: Аукциите се во согласност со законите, Наумов шири невистини


Скопје, 28 ноември, 2016 - 15:49 (META) 

Со ребалансот на буџетот, износот на аукции на државни хартии од вредност не е зголемен, туку е намален, велат од Министерство за финансии по повод соопштението на дополнителниот заменик-министер за финансии, Кире Наумов, во кое тој бара усогласување на задолжувањата од ДХВ со буџетот на РМ.

– Владата на почетокот на годината носи одлука за максималниот износ за аукции на државни хартии од вредност. Тоа е максималниот лимит кој не смее да се надмине. Сепак, сумата на издадените хартии од вредност може да биде помала од овој лимит, во согласност со износите на буџетот. Со аукциите годинава се издадени државни хартии од вредност кои се неколкукратно помали од лимитот предвиден и со одлуката на Владата и од лимитот предвиден со ребалансот, што може секој граѓанин да го провери на веб-страницата на Министерството за финансии – велат оттаму.


Наумов бара усогласување на задолжувањата од ДХВ со буџетот на РМ


Скопје, 28 ноември, 2016 - 15:18 (META) 

Дополнителниот заменик-министер за финансии, Кире Наумов, бара итно усогласување на издавањето државни хартии од вредност со буџетот на РМ.

Тој бара свикување на итна седница на Владата за усогласување на максималниот износ на ново задолжување преку државни хартии од вредност (ДХВ) за тековната година, кој е утврден со одлука на Владата на РМ, со буџетот за 2016 година.

– Со актуелната одлука на Владата од 29 декмеври 2015 година, максималниот износ на ново задолжување преку издавање државни хартии од вредност во 2016 година изнесува 10.455.000.000 денари и е во рамките на износот од 18.860.000.000 денари, утврден во првично изгласаниот буџет за 2016 година. Меѓутоа, со вториот ребаланс на буџетот усвоен од Собранието, износот од 18.860.000.000 денари е променет на 8.405.000.000 денари. Како последица на усвоениот ребаланс, одлуката на Владата е над законски утврдениот лимит. Владата на РМ била должна да ја усогласи одлуката за максимално задолжување во рамките на лимитот предвиден со ребалансот на буџетот – се вели во соопштението на дополнителниот заменик-министер за финансии, Кире Наумов.

Исто така, Наумов во писменото барање до министерот за финансии, Кирил Миноски, посочил дека реализираниот износ на домашно финансирање врз основа на државни хартии од вредност го има надминато износот предвиден со буџетот на РМ за 2016 година.

Заклучно со 18 ноември, домашното финансирање од државнихартии од вредност изнесува 9.435.000.000 денари и го надминува износот утврден со буџетот, односно 8.405.000.000 денари.


Наумов: Миноски ги задолжи граѓаните со 18 милиони евра


Скопје, 8 ноември, 2016 - 15:58 (META) 

На денешното задолжување на домашниот пазар на капитал министерот за финансии, Кирил Миноски, иако побаруваше 12,1 милиони евра, ги задолжи граѓаните со нови 18 милиони евра, се вели во реакцијата од дополнителниот заменик-министер за финансии Кире Наумов, на денешното задолжување на државата.

Во него се додава дека јавниот долг поради ова темпо на задолжување ги надминал критичните 50 проценти од домашниот бруто-производ, граница која Меѓународниот монетарен фонд препорача да не се надминува.

– Министерот за финансии јавно се обврза дека по секое ново задолжување ќе ја објавува состојбата на државните депозити. Досега ниту еднаш го нема сторено тоа – се додава во соопштението.


Наумов: Јавниот долг и во ноември продолжува да се зголемува


Скопје, 4 ноември, 2016 - 14:39 (META) 

„И покрај тоа што во периодот од 8 до 15 ноември, за кога е планирано ново задолжување на домашниот пазар на капитал, не доспеваат долгови за враќање, министерот за финансии на аукцијата на домашни хартии од вредност на 8 ноември побарува 12,2 милиони евра. Jавниот долг ќе го зголеми за нови 12,2 милиони евра“, се вели во соопштението од кабинетот на дополнителниот заменик-министер за финансии, Кире Наумов.

Во него се додава дека јавниот долг поради ова темпо на задолжување ќе ги надмине критичните 50 проценти од домашниот бруто-производ БДП, граница која Меѓународниот монетарен фонд препорача да не се надминува.

– Министерот за финансии јавно се обврза дека по секое ново задолжување ќе ја објавува состојбата на државните депозити, но досега ниту еднаш го нема сторено тоа – се додава во соопштението.


Тевдовски: Долгот по жител денес изнесува 2.350 евра


Скопје, 3 ноември, 2016 - 16:24 (META) 

„Загрижувачка е брзината со која актуелната власт го зголемува долгот. Долгот по жител денес изнесува 2.350 евра и тој е трипати поголем во однос на 2008 година кога изнесуваше 750 евра по жител“, изјави претседателот на комисијата за економија и член на извршниот одбор на СДСМ, Драган Тевдовски.

Тој додаде дека од 2008 година, актуелната власт ја задолжува Македонија со еден милион евра на ден, односно го задолжува секој жител со половина евро на ден просечно.

– Годинава, темпото на задолжувањето е уште посилно и изнесува речиси два милиони евра на ден, односно едно евро на ден по жител. Згора на сè, јавниот долг е поголем од тоа што го кажуваат бројките на Министерството за финансии, бидејќи тие не го вклучуваат долгот на Народната банка, негарантираните долгови на јавните претпријатија и преземените, а неплатени обврски од страна на државата – додаде Тевдовски.

Тој истакна дека намерата на СДСМ е, кога ќе дојде на власт, да се откажат од непродуктивните трошења за фасади, споменици и за административни згради. Како што посочи, нема да се дозволи владини претставници да користат по пет возила од администрацијата.

– Нашиот прв чекор ќе биде граѓаните да имаат увид во тоа како се троши секој денар од државниот буџет. Нашата цел е да обезбедиме поголеми приходи преку посилно оданочување на најбогатите граѓани. Нашиот план е да воведеме независен фискален совет и правила за јавниот долг, кој ќе ги ограничи политичарите да се водат само од сопствениот интерес при донесувањето одлуки за долгот – додаде Тевдовски.


СДСМ: Власта на Груевски нè задолжува по 2 милиона евра на ден


Скопје, 1 ноември, 2016 - 12:59 (META) 

„Секој ден во 2016 година власта на Груевски ги задолжувала граѓаните по два милиона евра. За последниве девет месеци, вкупниот јавен долг на Македонија се зголемил за повеќе од половина милијарда евра или неверојатни 532 милиони евра“, се вели во соопштението на СДСМ во врска со објавата на јавниот долг од страна Министерството за финансии.

Од опозициската партија порачуваат дека „ќе има ревизија на сите задолжувања на граѓаните што ги направи и продолжува да ги прави неодговорната власт на Никола Груевски“.

– Вкупниот јавен долг со секој нов ден од овие неодговорни луѓе на власт достигнува историско ниво. Од вчера долгот и официјално е 4 милијарди 760 милиони евра. Секое бебе се раѓа со долг од 2.274 евра – се додава во соопштението.