!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Ќе се испитува водата во Гостивар, резултатите од анализата – следната недела


Скопје, 27 октомври, 2017 - 16:21 (META) 

Министерството за здравство информира дека денеска екипа од Институтот за јавно здравје зела дополнителни мостри за испитување на квалитетот на водата во Гостивар, во однос на бактериолошка исправност, периодично физичко-хемиска, како и анализа на остатоци од пестициди, информираат од таму.

Резултатите од анализите се очекуваат на почеток на следната недела.

Bо текот на ноќта, во гостиварската болница лекарска помош побарале уште 60 нови лица со симптоми на дијареа и на изнемоштеност и со ова, вкупната бројка на заболени се зголеми на 360 лица.


Уште 60 лица од Гостивар побарале лекарска помош поради дијареа и изнемоштеност


Гостивар, 27 октомври, 2017 - 12:33 (META) 

Bо текот на ноќта, во гостиварската болница, лекарска помош побарале уште 60 нови лица со симптоми на дијареа и на изнемоштеност, информираат од Министерство за здарвство.

Со ова, вкупната бројка на заболени се зголеми на 360 лица.

Од Министерство за здравство уште еднаш потврдуваат дека „од епидемиолошките и од другите спроведени мерки, со сигурност може да се констатира дека не постои поврзаност за консумирање храна од еден ист објект“.

„Од Центарот за јавно здравје (ЦЈЗ) и од Државниот санитарен и здравствен инспекторат (ДСЗИ) се на терен и ја следат состојбата. Во тек е обработка на податоци, по што надлежните институции ќе излезат со соопштение. Од податоците и информациите што ќе ги добијат од подрачниот ЦЈЗ, доколку има потреба, ДСЗИ ќе издаде решение за конкретни мерки“, се вели во соопштението на Министерство за здравство.


Три нови случаи на заболени со мали сипаници


Скопје, 20 октомври, 2017 - 13:41 (META) 

Во текот на изминатата недела, од 14 до 20 октомври, регистрирани се три нови случаи на мали сипаници, со што вкупниот број на заболени е 17 лица, информираат од Институтот за јавно здравје.

Од вкупниот број на заболени, 10 лица живеат во населбата Маџари – Кванташка депонија, две лица се од Чаир, а по едно лице е регистрирано во село Сопиште, населба Шуто Оризари и во село Кондово. Едно од пријавените заболени деца е државјанин на Косово. Едно лице од новопријавените во последната недела е со место на живеење во Прилеп, на привремена работа во Скопје.

Од заболените, два случаи се на возраст под една година, кога не подлежат на задолжителна вакцинација против мали сипаници. Седум заболени се на возраст од една до четири години, а три се над 30-годишна возраст.

Симптомите на првиот пријавен случај од мали сипаници се јавиле на 15 септември. На 25 септември, Центарот за јавно здравје Скопје пријави епидемија на мали сипаници на територијата на општина Гази Баба – Кванташка депонија.

Од 17 регистрирани случаи, 16 се лабораториски потврдени, а еден е клинички и епидемиолошки поврзан случај. Само кај два случаи биле регистрирани компликации во вид на пневмонија.


Светскиот ден на мирот утре граѓаните ќе го одбележат со протест за чист воздух


Скопје, 20 септември, 2017 - 12:55 (META) 

Светскиот ден на мирот (21 септември), Коалицијата О2 за чист воздух и Првата детска амбасада во светот „Меѓаши“ ќе го одбележат со мирен марш за право на чист воздух.

Маршот ќе почне пред Владата со почеток во 17 часот, ќе продолжи по булеварот Илинденска и на булеварот 8 Септември, граѓаните ќе се спојат со здруженијата од Карпош, кои претходно ќе одржат протест пред Општина Карпош.

Здруженијата порачаа дека проблемот со загадениот воздух сериозно треба да го сфатат како централната, така и локалната власт. Тие ќе бараат нивните предлог-мерки да бидат вградени во изборните програми на кандидатите за градоначалници.

– На прагот на зимата сме, сите вредности за загаден воздух ќе скокнат драматично, а потоа ќе биде предоцна да реагираме. Последиците се чувствуваат во сите поголеми градови, во Скопје, Тетово, Битола. Срамно е за државата, од 10 најзагадени градови во Европа три да се во Македонија. Се зголемува бројот на заболени деца и на возрасни, но и на смртни случаи како последица на загадениот воздух – вели Ели Пешева од Коалицијата О2.

Меѓу мерките што здруженијата ги предлагаат е и усогласување на регулативата со меѓународната. Исто така, бараат одговорност за загадувачите, зголемување на свесноста на граѓаните, здрави животни навики, алтернативни решенија за чист воздух, санација на критични извори на загадување, кои иако не работат, загадуваат, како ОХИС и Топилница во Велес. За РЕК Битола бараат затворен систем на отпрашување, а посочуваат дека индустриските капацитети треба да се градат најмалку 10 километри надвор од населените места.

Како причинители за загадувањето ги наведуваат работата на индустриските капацитети без филтри и непочитување на пропишаните законски процедури, намалување на урбаното зеленило, лошото управување со отпадот.

Предлог-мерките кои се итни, среднорочни и долгорочни тие ги доставиле до Министерство за животна средина и до Владата, а ќе ги достават и до кандидатите за градоначалници.

– Долг и бавен е процесот за менување на свеста. Ако сега се почне, резултати ќе има за пет години. Потребна е соработка со локалната и со централната власт. Без оглед на разликите, чистиот воздух и здравата животна средина се прашање на здравје и од заеднички интерес за сите – додава Пешева.

Драги Змијанац од „Меѓаши“ изјави дека децата се ранлива група, така што сè поголем е бројот на оние со респираторни заболувања.

Тој додаде дека утре основните и средните училишта ќе се вклучат во акцијата за подигнување на еколошката свест кај децата.

Граѓанските здруженија велат дека новата влада покажала интерес за решавање на оваа проблематика.


За половина намален бројот на заболени од грип


Скопје, 26 јануари, 2017 - 16:14 (META) 

Во текот на третата недела од јануари, пријавени се 2.417 новозаболени лица од грип, што претставува намалување од 55,8 проценти во споредба со втората недела (од 9 до 15 јануари), кога беа пријавени 5.472 случаи, информира Институтот за јавно здравје за состојбата со грипот до 22 јануари.

Во истиот период, бројот на регистрирани случаи кај децата до 14 години е намален за три пати.

Најголем број заболени (71,8 проценти) се пријавени во најголемата возрасна група, од 15 до 64 години, а најмал број на заболени има кај децата до 4 години.

Во сезоната 2016/2017, вкупниот број на заболени од грип изнесува 31.732 лица, а има два смртни случаи поради грип.


Две деца неделава починале од грип, соопшти ИЈЗ


Скопје, 12 јануари, 2017 - 13:49 (META) 

Во текот на оваа недела регистрирани се два смртни случаи „асоцирани со грип“, соопшти денеска Институтот за јавно здравје на Република Македонија, кој го презентираше извештајот за состојбата со грипот во период од 1 до 8 јануари.

Според извештајот, станува збор за деца на возраст од три и од четири години од Кичево и од Гостивар, кои биле хоспитализирани на Клиниката за детски болести во Скопје, на одделот за интензивна нега.

„Во текот на првата недела од 2017 година, во Република Македонија пријавени се 8.067 новозаболени лица на групни пријави за заболени од грип, што претставува намалување од 14,9 отсто во споредба со претходната недела, кога беа пријавени 9.485 случаи“, се наведува во извештајот.

Оваа недела, како и минатата, најголем број заболени, односно 1.046 лица, се регистрирани на територијата на Центарот за јавно здравје Скопје, а поголем број случаи пријавени се од центрите за јавно здравје Струмица -­ 935, Битола ­- 932 и подрачната единица во Кавадарци ­- 764.

Во првата недела од годинава, најголем број заболени, односно 70,4 отсто од сите случаи, се пријавени во најголемата возрасна група од 15­ до 64 години, што претставува мало зголемување на процентуалното учество од претходната недела, кога изнесуваше 65,9 отсто. Во пријавените случаи од првата недела, децата на возраст од 5 до ­14 години учествуваат со 11,7 отсто, лицата над 65 години со 10,7 отсто, а најмал процент отпаѓа на децата од ­4 години, односно 7,2 отсто.

„Највисока инциденца од 500 на 100.000 жители е регистрирана кај децата на возраст од ­четири години, a кај децата на возраст од пет­ до 14 години инциденцата изнесува 408,7 на 100.000 жители. Во однос на претходната недела, бројот на регистрирани случаи и инциденцата кај децата на возраст од 5 до ­14 години се речиси двојно намалени“, стои во извештајот на Институтот за јавно здравје на Република Македонија.


Грипот коси, но далеку сме од условите за прогласување епидемија


Скопје, 6 јануари, 2017 - 17:57 (META) 

Надлежните институции досега не прогласија епидемија на грип иако бројките на заболени се алармантни и далеку поголеми од вообичаените случаи во претходниот период. Сепак, еден од условите за прогласување на епидемија е да има „невообичаено зголемување на бројот на заболени со компликации или смртен исход“.

Институтот за јавно здравје вчера соопшти дека заклучно со први јануари биле пријавени 9.485 новозаболени лица од грип, што е повеќе од двојно зголемување во споредба со претходната недела, кога биле пријавени 4.194 лица.

„Со исклучок на пандемската сезона 2009/2010, бројот на пријавени случаи оваа недела е највисок регистриран во последните 10 години, како за овој период од сезоната така и воопшто. Вкупниот број на пријавени случаи оваа недела ја надминува границата на многу висока активност“, се вели во соопштението на Институтот.

Епидемија според Законот за јавно здравје е пораст на заболувања од одредена заразна болест кој по време и место го надминува вообичаениот број на случаи во претходниот период, како и невообичаено зголемување на бројот на заболените со компликации или смртен исход.

Според член 56 од Законот за заштита на населението од заразни болести, при појава на епидемија на подрачје за кое е основан завод за здравствена заштита, епидемијата ја прогласува надлежниот завод. Во случај кога постои опасност епидемијата и заразната болест да се шират и на други подрачја, Министерството за здравство прогласува епидемија и наложува мерки за сузбивање.

Член 64 од истиот закон вели дека Државниот санитарен и здравствен инспекторат има право и должност додека трае опасноста од епидемија да забрани собирање на лица во училишта, кина, театри, јавни локали и други јавни места, додека трае опасноста од епидемија.

Вкупно 15.800 лица заболени од грип побарале помош во здравствените установи, заклучно со минатиот петок, информираше на прес-конференција, државниот советник во Министерството за здравство, Јованка Костовска.


Рано е да се каже дали грипот и студот ќе го продолжат зимскиот распуст


Скопје, 4 јануари, 2017 - 15:26 (META) 

Сè уште е рано е да се размислува за тоа дали зимскиот распуст за учениците, кој трае до 18 јануари, ќе биде продолжен поради состојбата со грипот, велат неофицијално од Министерството за образование и наука (МОН).

Официјален одговор на прашањето на „Мета“ дали поради грипот се размислува распустот за учениците да биде продолжен, сè уште не сме добиле.

Оваа мерка за спречување на ширењето на грипот ја презедоа некои соседни држави.

Министерството за здравство на Албанија вчера предупреди дека се „создаваат поволни услови за понатамошно ширење на вирусниот грип“ и наложи цела недела да бидат затворени градинките, основните и средните училишта, иако требаше да почнат да работат денеска.

Комисијата за заразни болести при Институтот за јавно здравје на Македонија на седницата одржана на 27 декември, препорача да се изврши темелна дезинфекција на сите детски градинки и училишта, како и континуирано да се одржува зголемено ниво на хигиена и почесто да се проветруваат просториите.

Според податоците на Институтот за јавно здравје, во последната недела на декември биле заболени 4.195 лица од грип, а минатата година во истото време овој број изнесувал 109 лица, што значи бројот на заболени е 40 пати поголем.


Во Албанија 18.000 лица заболени од сезонски грип


Тирана, 4 јануари, 2017 - 14:44 (META) 

За една недела, повеќе од 18.000 лица се официјално избројани како погодени од сезонскиот грип во Албанија.

Лекарите велат дека ситуацијата е загрижувачка и дека оваа бројка на заболени е само од тие што побарале помош, но не се вбројани заболените што не се обратиле на доктор или во здравствени установи.

Артан Меси, директорот на епидемиолошкото одделение при институтот за јавно здравје во Скадар, вели дека бројот на тие што се заразиле со грип е во пораст затоа што покрај вирусот, во Албанија има многу ниска температура.


Во Охрид се зголемува бројот на заболени од грип


Охрид, 4 јануари, 2017 - 10:40 (META) 

Последниве неколку дена, во Охрид рапидно се зголеми бројот на заболените од грип.
Од Институтот за јавно здравје потврдуваат дека сезонскиот грип во општина Охрид ги наполнил здравствените установи.

Ситуацијата била особено тешка за време на празниците, кога не работеле матичните лекари, така што за преглед во општата болница се чекало во редица.

Мајка со болно дете ситуацијата ја опиша како алармантна, бидејќи родители со деца чекале и на скалите.

Најмногу новозаболени имало во последната недела од минатата година, кога бројот на заболени бил приближно 300 лица, а неделата претходно имало стотина.